رواية تاني فرصة الفصل السابع 7 بقلم هاجر سلامه

 

 

 

رواية تاني فرصة الفصل السابع بقلم هاجر سلامه



الليلة دي كانت أطول ليلة مرت على ندى الشقة رجعت تاني باردة وموحشة وصوت العياط المكتوم بتاعها كان مالي الأوضة التانية اللي نامت فيها لوحدها
قعدت على السرير وضامة رجليها لصدرها وبتفكر في كلام طارق وقسوته وشكه اللي بقى بيخنق كل حاجة حلوة بتحاول تبنيها
سألت نفسها هو أنا بجد مذنبة للدرجة دي عشان حبيت زمان في السر وماقولتش لحد ولما نسيت وحبيته هو مش عايز يصدقني
على الناحية التانية طارق كان قايد سيجارة ورا سيجارة في أوضته وعينه على السقف والنار بتاكل في قلبه
الشيطان كان عمال يوز في ودنه ويقوله إن ندى بتشفق عليه أو بتمثل عشان خايفة تترمي في الشارع وهي مش فاكرة حد وإن حبها لشريف لسه عايش في عقلها الباطن وهيطلع أول ما الذاكرة ترجع
الصبح جه والشمس طلعت بس مفيش دفا دخل الشقة
طارق خرج من أوضته لابس بدلة الشغل ووشه ناشف وجاف
لقى ندى صاحية ومجهزة الفطار وحاطة كوباية القهوة بتاعته على السفرة زي كل يوم
وقفت قصاده وبصت له بعيون منفوخة من كتر العياط وقالت بصوت مبحوح وهادي صباح الخير يا طارق الفطار جاهز عشان متنزلكش من غير ما تاكل
طارق بصلها بطرف عينه وحس بنغزة حنين في قلبه لما شاف وشها الباهت بس كبريائه وشكه عموه وقال بجفاء متشكر ماليش نفس واعملي حسابك الأسبوع الجاي خطوبة شريف وبابا اتصل بيا وقالي لازم ننزل نشتري مع العيلة الفستان والحاجة بتاعة العروسة وأنتي هتيجي معايا عشان منظرنا قدام الناس
ندى بلعت غصتها وهزت راسها وطوعته حاضر يا طارق اللي تشوفه أنا هعمله

مرت الأيام والبرود هو سيد الموقف وطارق بقى يهرب من الشقة وينزل الشغل من بدري ويرجع نص الليل عشان يتهرب من نظرات ندى اللي كلها رجاء وعتاب

لحد ما جه اليوم اللي المفروض ينزلوا فيه مع العيلة عشان يختاروا شبكة وحاجة العروسة الجديدة اللي اسمها رانيا
ندى لبست فستان هادي وأنيق ونزلت مع طارق وعينها في الأرض وطارق كان سايق العربية وساكت تماماً
وصلوا المحل الكبير ولقوا الحاج سلامة بدر وزياد وأم ندى ومعاهم شريف ورانيا العروسة وأهلها
أول ما دخلوا زياد جري على أخته واحتضنها ندى وحشتيني يا حبيبتي عاملة إيه انهارده وشك باين عليه التعب ليه طارق بيزعلك والا إيه
ندى ابتسمت لزياد وطبطبت عليه لا يا حبيبي أنا كويسة بس قلة نوم مش أكتر
الحاج سلامة قرب وبارك لطارق وشريف وبدأ الكل ينشغل في تدوير واختيار الذهب والشبكة
رانيا العروسة كانت بنت لطيفة جداً وقربت من ندى وقالت بذوق ندى أنا شريف حكالي عنك كتير وعن ذوقك في اللبس والهندسة ممكن تيجي معايا تنقي الطقم ده محتارة بين الاتنين دول
ندى ابتسمت لها بحب حقيقي وقربت معاها وبدأت تساعدها وتتكلم معاها وتضحك من قلبها عشان تفرح العروسة

طارق كان واقف من بعيد وعينه زي الرادار بتراقب كل حركة
شاف ندى وهي واقفة جنب رانيا وشريف واقف وراهم بيبتسم
طارق فسر الضحكة الهادية اللي على وش ندى والراقة اللي هي فيها إنها بتمثل القوة قدام شريف عشان متبانش مكسورة أو إنها بتملي عينها منه للمرة الأخيرة قبل ما يضيع منها للآبد
الشك عنده وصل لمرحلة المرض ومبقاش شايف أي تصرف طبيعي من ندى
شريف قرب من طارق وحط إيده على كتفه وقال بفرحة عقبال ما نفرح بأولادك يا طارق أنت وندى شايف ندى انهارده منورة إزاي والضحكة مش مفارقة وشها ربنا يسعدكم يا خويا
طارق ضغط على سنانه وحاول يبتسم بالعافية تسلم يا شريف ربنا يخليك وعقبالك يا رب
بعد ما خلصوا خروج الشبكة الكل قرر يقعد في كافيه كبير يشربوا حاجة سوا
ندى كانت قاعدة جنب طارق وحاولت تمد إيدها تحت الترابيزة وتمسك إيده عشان تطمنه وتقدم له رسالة صامتة إنها معاه هو وبس
بس طارق أول ما حس بإيدها سحب إيده بسرعة وبعنف خلى كوباية المية اللي قدامه تتهز وندى لفت وشها بسرعة والدموع لمعت في عينيها وحست بكسرة نفس قدام أهلها وزياد الصغير اللي كان بيراقبهم من بعيد وبدأ يحس إن فيه فجوة كبيرة ومش طبيعية بين أخته وجوزها

اليوم خلص ورجعوا العربية وتاني السكات القاتل كان هو البطل
أول ما دخلوا الشقة ندى مقدرتش تستحمل ووقفت في نص الصالة وقالت بصوت كله قهر وعياط لغاية إمتى يا طارق لغاية إمتى هعش في المحكمة دي لغاية إمتى هتعاملني على إني متهمة وأنا مش فاكرة أي ذنب عملته في حياتي القديمة

طارق لف ليها وزعق بكل قوته وعصبيته وشك المحكمة دي أنتي اللي بنيتيها يا ندى شفتك انهارده وشفت ضحكتك مع شريف ورانيا كنتي بتمثلي عشان تباني قوية والا كنتي بتبصي للراجل اللي كان نفسك يكون مكانى
ندى صرخت فيه بعلو صوتها أنا كنت ببارك لأخوك يا طارق ببارك لأخوك أنت ليه مريض بالشك كد أنا بحبك أنت أنت مش عايز تفهم ليه مخي مش فاكر شريف وقلبي مش عايز شريف أنا روحي بقت معاك أنت يا طارق
طارق بصلها بنظرة مليانة قسوة وخذلان وقال بصوت واطي ومرعب وأنا مبقتش قادر أصدقك يا ندى ومبقتش قادر أعيش في الوهم ده خطوبة شريف الأسبوع الجاي هنحضرها قدام الناس وبعدها كل واحد يروح لحاله وأنا هطلقك والمرة دي مفيش حاد..ثة هتمنعني
ندى الكلمة نزلت عليها زي الخنجر في قلبها وبصت له بذهول وكسرة حقيقية ومبقتش قادرة تنطق وسابته وجريت على أوضتها وقفلت الباب وهي حاسة إن الدنيا كلها ضاقت في وشها وإن حبها الجديد لطارق بقى هو لعنتها الأكبر


شكرا لزيارتكم عالم روايات سكيرهوم

تعليقات