رواية تاني فرصة الفصل الثامن بقلم هاجر سلامه
ليلة حفلة الخطوبة الشقة كانت مقلوبة تورتة وزغاريط في بيت العيلة بس جوه شقة طارق وندى كان فيه معركة صامتة شغالة
ندى كانت واقفة قدام مراية الأوضة الكبيرة بتأيد الفستان اللي اختارته للحفلة
كان فستان أحمر قطيفة طويل ومجسم على جسمها بشكل فاتن وهادي ورقيق ومفتوح سيكا من عند الرقبة ومبين بياض بشرتها ورشاقتها
سرحت شعرها الأسود الطويل وسابته على ضهرها وحطت ميك اب رقيق جداً بس كان مبرز جمال عينيها الواسعة وملامحها اللي كانت بتنطق أنوثة
كانت بتعمل كل ده وهي قلبها بيدق بسرعة وأملها الوحيد إن طارق يشوفها ويهدى ويحس إنها بتعمل كل ده عشان تملى عينه هو وبس وميشوفش غيرها
الباب اتفتح ودخل طارق وهو لابس البدلة الكحلي وضابط الجرافات بتاعته وأول ما عينه جت عليها اتسمر مكانه في نص الأوضة
طارق بصلها من فوق لتحت وعينيه وسعت والدم طار في عروقه وحس بنار الغيرة بتاكل في صدره أضعاف أضعاف
ملامحه اتغيرت وبقت قاسية وقرب منها خطوات سريعة وعصبيته باينة في نبرة صوته إيه اللي أنتي لابساه ده يا ندى هو احنا رايحين حفلة عادية والا رايحة تلفتي النظر بالفستان الأحمر الملفت ده
ندى لفت له وجمعت شجاعتها وقالت بصوت هادي ورقيق طارق الفستان مقفول وطويل وأنا لابساه عشان أكون مشرفة ليك قدام أهلك والناس ومش قصدي أي حاجة تانية خالص
طارق زعق بصوت مكتوم مش قصدي إيه الفستان مجسم ومبين كل تفصيلة فيكي وأنتي عارفة إن الحفلة هيبقى فيها شريف والعيلة كلها أنتي عايزة شريف يشوفك كد ويتحسر على اللي ضاع منه والا إيه بالظبط
ندى نزلت دموعها من كلامه القاسي وقالت بوجع طارق أرجوك بلاش السيرة دي انهارده وبلاش تظلمني أنا والله العظيم لابساه عشانك أنت وبس ونفسي تشوفني حلوة في عينك أنت
طارق سخر منها وقال ببرود يلا بينا عشان متأخرين والناس مستنية برة والعربية واقفة
وصلوا القاعة الكبيرة والأنوار كانت مالية المكان وصوت الأغاني عالي جداً
أول ما دخلوا ندى كانت لفتة للانتباه بجمالها ورقتها وحسنها الملفت وكل عيون العيلة اتوجهت ناحيتها
الحاج سلامة بدر وقف ورحب بيهم وزياد الصغير قرب من أخته الكبيرة وانبهر بشكلها وقال بفخر إيه الحلاوة دي يا ندى أنتي منورة الحفلة و مغطية على الكل انهارده
ندى ابتسمت لزياد وقالت تسلم لي يا حبيبي عقبال ما نفرح بيك يا رب
شريف والعروسة رانيا جم وسلموا عليهم وشريف قال بذوق ونية صافية منورين يا جماعة وما شاء الله يا ندى ذوقك في الفستان يجنن ومناسب جداً للحفلة
طارق في اللحظة دي كان واقف وجنب ندى وضامم إيده بقوة لدرجة إن ضوافره علمت في كف إيده وعينيه كانت بتطلع شرار من الغيرة العمياء
كان حاسس إن كل نظرة من شريف أو من أي حد في القاعة هي خنجر في كرامته وتأكيد لشكه المريض
طول الحفلة طارق مكنش بيفارق ندى خطوة وكل ما حد يقرب يبارك لهم أو يتكلم معاهم كان بيرد بجفاء وعصبية واضحة خلت ندى قاعدة على أعصابها ومش قادرة تفرح ولا تتنفس
الحفلة خلصت بالعافية وركبوا العربية وراجعين الشقة وطارق كان سايق بسرعة جنونية وعينه حمرا وعروق إيده بارزة من كتر الكبت والعصبية
أول ما وصلوا وفتحوا باب الشقة ودخلوا طارق رزع الباب وراه بكل قوته لدرجة إن الحيطة اتهزت
طارق صرخ بأعلى صوته ارتحتي يا ندى ارتحتي والكل عمال يبص عليكي وشريف واقف يتغزل في فستانك وذوقك قدام العروسة وقدام الناس كلها أنتي كنتي قاصدة تعملي كد عشان تكسريني وتثبتي لنفسك إنك لسه قادرة تلفتي نظره
ندى وقفت قصاده بكل ثبات وهدوء برغم الدموع اللي كانت مخنوقة في عينيها وبصت في عينيه وقالت بنبرة مليانة حب وصبر طارق أنا مش هرد على عصبينك دي دلوقتي ولا هجادلك في شكك أنا داخلة الأوضة وجاية لك حالا
ندى سابته ودخلت الأوضة وقفت قدام التسريحة وقلعت الفستان الأحمر و شالت الميك اب بتاع الحفلة كله
غسلت وشها وسرحت شعرها وخلته ينزل بنعومة على كتافها ولرغبتها إنها تثبت له إنها ملكه هو وبس لبست قميص نو...م رقيق جداً أبيض ستان ناعم كان مخليها زي الملاك وحطت برفان دافي وهادي من اللي هو بيحبه
خرجت من الأوضة بخطوات هادية وواثقة ودخلت الصالة لقت طارق قاعد على الكنبة وحاطط راسه بين إيديه وبيتفس بصعوبة والنار قايدة في جوفه
ندى قربت منه وقعدت على ركبها قدامه على الأرض ومسكت إيديه الاتنين براحة وحنان وسحبتهم من على وشه
طارق رفع عينه وبص لها وانصدم من شكلها الجديد ومن رقتها ومن لبسها اللي عمرها ما لبسته لأجله قبل كد
ندى بصت في عينيه بنظرة كلها عشق وصدق وقالت بصوت دافي ورقيق بيهز القلوب طارق بص في عيني كويس وشوف أنا لابسة إيه وعاملة إيه الفستان الأحمر بتاع برة ده كان للناس وللمنظر العام لكن اللبس ده والبرفان ده والشعر ده وكل تفصيلة فيا دلوقتي معمولة ومجهزة لأجلك أنت وبس
طارق بلع ريقه وجسمه بدأ يترعش من القرب ومن مشاعره المتلخبطة وقال بصوت مخنوق ندى أنتي بتعملي إيه
ندى ضغطت على إيديه وقالت بلهفة وحب أنا بطلب منك فرصة يا طارق فرصة حقيقية ننسى فيها الماضي والمذكرات وكل شكوكك أنا مستعدة أكمل معاك حياتي كلها كزوجة حقيقية ليك وليك لوحدك أنا مش عايزة الماضي وأنا بحبك أنت يا طارق بحب حنانك ووسامتك وخوفك عليا سيب الشك على جنب واديني وادي لنفسك الفرصة دي ونبدأ من اللحظة دي صفحة جديدة بجد
طارق فضل باصص لملامحها الصادقة وقربها الدافي وحس إن الحصون والأسوار الحديدية اللي بناها جوه قلبه بسبب الشك بدأت تنهار وتدوب قدام سحرها وعشقها اللي بقى حقيقة مش وهم
شكرا لزيارتكم عالم روايات سكيرهوم
