رواية عين مش شايفه وروح دافيه الفصل السابع
_ الحقوني يا نااس
_ هشش أسكتي في أي!!
_ خلي بالك .. أو قربت مني أنا أنا أنا في أيدي سكـ.ينة، أنت مش شايفها بس ممكن أغز.ك بيها عشان تحس
ضحك واسترخى أكتر على الكنبة
_ ماكنتش أعرف إنك كتكوت مبلول وجبانة كدا، أومال أي اللسان الطويل دا، طلع على الفاضي!
_ أنا مش جبانة على فكرة، مش بحب التلزيق بس، هروح أعمل شاي أعملك معايا!
_ اعملي قهوة م بحب الشاي
خرجت حطيت الصينية على الترابيزة
_ عصيرك أهو
_ قولت عايز قهوة عندك مشكلة في السمع ولا أي!
_ ظريف أوي، أنت عارف إن مش بعملك قهوة بالليل، وهي مرة واحدة في اليوم
اتنهد لكنه فضل الصمت، لكن أنا كالعادة ماسكتش
_ بقولك أي
_ اممم
_ هو أبوك عرف إنك كتبت الكتاب النهاردة!
رد ببرود وهو بيسند راسه على ضهر الكنبة بكئابة
_ أكيد عرف
_ ومارفعش سماعة التليفون حتى!
_ مش عايز أتكلم في الموضوع دا يا مريم
إنتفض فجأة على صوت السماعات العالي وحط أيده على ودنه
_ أي دا وطي الزفت دا
_ أي بفرح شوية أنا اتجوزت على الصامت، سيبني أفرح وأنا بنضف البيت
_ اقفلي يا مريم خرمتي ودني، حرام عليكي
اتنهدت بنفاذ صبر وقفلت السماعات
_ أنت هتفضل قاعد في البيت كدا! ما تنزل شغلك ولا تعملك حاجة
رد ببرود
_ لحقني تزهقي مني في أول يوم جواز؟
_ طب أنا زهقانة بجد، مفيش حاجة أعملها، أنضف البيت طيب؟
قال فجأة بتردد
_ أي رأيك نخرج! .
إنتفضت من مكانة بسعادة
_ بجد؟ ورحمة أمك بجد، قول والله كدا!
_ والله
_ قول الجملة كاملة
_ يابنتي أنا باخد رأيك
_ دقيقة وأكون جهزة، ماشي والله لو غيرت رأيك لهروح أجيب الفراخ اربيه على سريرك
_ كان زمانك خلصتي بدل الرغي العقابي دا
أخيرًا خرجت أخيرًا
_ هنروح فين!
_ أنتِ حابه أي، أي رأيك نروح نتعشى
_ نتعشى! بس أنا مش معايا فلوس
_ هو أنتِ خارجة مع قرطاس لب!
ضحكت ومسكت دراعه عشان نروح ناحية العربية و السواق
_ معلش والله نسيت إنك جوزي
_ لا افتكري كويس
روحنا على مطعم راقي أوي، لا أوي زيادة عن اللزوم
_ نوح المكان شكله فخم اوي
_ آه بحبه عشان راقي
قولت بضيق وأنا ببص حواليا
_ لا أنا معدتي قلبت من الرقي دا، ما كنا نروح نضرب سندوتشات كبدة ولا حاجة
_ أسكتي يا مريم وشوفي هتاكلي أي
فتحت المنيو وقولت بضيق
_ نوح المنيو بالانجليزي
قال ببرود وهو قاعد ثابت
_ أي المشكلة مش قولتي متخرجة من كلية، اكيد بتعرفي انجليزي
_ لا مش فاهمة الكلام غريب، طب أنت هتطلب أي .
_ هطلب ماشروم اند اتشيكن سوب، و بيكاتا
سألت بتردد
_ دا حلو دا ؟
قال بهدوء مستفز
_ أنا بحبه، بس اطلبي إللي عايزاه
قولت بجدية
_ أنا عايزة لحمه أو فراخ
قال بسخرية
_ اطلب لك زيّ طلاما مش عارفة تقرأي!
_ أنت بتألس عليا، شكرًا هطلب لنفسي
لما الويتر جه، شاورت ليه على أي حاجة في المنيو ووهو قال طلبه
قولت بملل
_ بس أنا ماكنتش عايزة أخرج كدا، دي خروجة رخمة دي، وحتى الناس بتبص ليا بإستغراب مش عارفة لي
_ طب عايزة تخرجي فين، عريس وعروسته هيروحوا فين مثلًا الملاهي !!
عيني لمعت وقولت بتأثر
_ والله ياريت كان أحسن من الناس المزيفة إللي هنا دي، شوف الست إللي هناك دي عماله تبص عليا ازاي!
_ سيبك منهم يا مريم، فين ثقتك في نفسك، وبعدين أنتِ كنتي عايزة تروحي ملاهي بجد!
قولت بإحراج
_ عادي يعني، ماروحتش قبل كدا أصلًا فمش عارفة
_ بجد عمرك ما روحتي! لي؟
_الظروف ماسمحتش
الأكل جه وأنا بصيت على أكلي بإستغراب وقولت بضيق
_ دا أي دا!
بدأ ياكل وهو بيقول بسخرية
_ كان نفسي أفيدك بس مش شايف
اعترضت
_ دي سلطة، هو جايب سلطة لي!
_ أكيد دل إللي طلبتيها
_ أنا مش هاكل سلطة أنا، في حد ياكل سلطة كدا بس
ضحك بسخرية
_ أنتِ إللي طلبتيها
_ طب أطلب ليا حاجة تاني، بقولك عايزة لحمة يقوم يجي ليا سلطة؟ هو أنا أرنب!
_ لي الرغي والله أنتِ إللي طلبتي
اتنهدت وقولت بحزن
_ خلاص مش عايزة
ساب الأكل ورفع راسه تحيتي بإنتباه
_ قوليلي طيب عايزة أي!
_ أي حاجة
_ عايزة تاكلي لحمة صح! اطلب لك استيك؟
_ ماشي
بعد شوية جه الأكل وكنت مستمتعة بيه جدًا
_ امممم تحفة، أنا لازم أعرف البتاع دا بيتعمل إزاي
_ شوفيه على النت
_ ما نسأل الشيف، أنا لازم أعمله بجد طعمه جميل أوي، أفتح بوقك كدا
_ لالا مش عايز
قومت من مكاني وأنا مادة الشوكة بإصرار
_ بقولك أفتح بوقك
_ مش عايز والله مش عايز، أنتِ بتعملي أي أقعدي هتفضحينا
مسكت دقنه وقولت بحزم
_ أسمع الكلام لازم تدوق
فتح بوقه بإستسلام واخد قطعة اللحم
_ ها أي رأيك
_ صدقيني لما نروح هعجنك على إللي عملتيه دا
_ أي رأيك بس !
_ حلوة ما أنا عارف طعمها
_ طب ما تريحني وقولي حلوة
_ حلوة ..
سكتنا ولما لقاني ساكته قال بتردد
_ قوليلي عايزة تروحي الملاهي بجد؟
_ عادي مش عارفة، في أي نخرج فيه طيب ممكن نروح نتمشى
_ متأكدة من الحوار دا؟
_ أيوا جدًا، مش عايز ولا أي!
_ بصراحة لا مش عايز
قولت بعند
_ طب خلص يلا عشان نروح نتمشى
بعد ما أكلنا روحنا نتمشى على الكورنيش، كان مصمم نتمشى في مكان من بتوع الناس إللي مش عاجبني دا، بس مارضتش وأصريت نروح على الكورنيش
_ هي الدنيا زحمة!
بصيت للناس الكتير جدًا
_ لا خالص
_ أنا سامع دوشة جامدة أوي يا مريم متأكدة!!
_ ثق فيا، أنا ماسكة إيدك أهو
مع أول خطوة واحد خبط فينا، ونوح ألتفت بعصبية، والشخص قال
_ مش تفتح يا أعمى
_ طب أنا أعمى مش تفتح أنت بقا ولا أي !!
الراجل أتحرج ومشى وهو قال بضيق
_ هو دا إللي مش زحمة؟
_ مش زحمة الناس إللي دماغها تعبانة
خطوة تانية و أنا شديته بعيد عن طوبة، وكان هيتعثر ويقع
_ يلا نروح
_ أهدى بس شوية وكل حاجة هتكون تمام، إحنا لسه بنقول بسم الله، خلي روحك مرنة شوية
قال بنرفزة
_ لا أنا مش عايز يلا نمشي
_ يوه يلا
فضلت مقموسة طول الطريق ساكته، لقيته فجأة مسك أيدي
_ أوعدك هتبقى ننزل في يوم مش زحمة، بس أنتِ عارفة مش بعرف اتأقلم في الزحمة
_ ماشي، ما نلف شوية بالعربية
قال بإستسلام
_ تمام
طلب من السواق وفضل يلف، وأنا فتحت الشباك، وكنت مستمتعة جدًا بالهواء وهو بيضرب في وشي، أول مرة أركب عربية و أفضل ألف بيها كدا
بعد مدة وصلنا البيت، كانت أول مرة أبقى خايفة أدخل، فضلت قاعدة مش عايزة انزل
_ أي قاعدة كدا لي!
_ ما تنزل أنت وأنا هاخد لفه كمان
_ يلا يا مريم
دخلنا البيت، ولقيت أبوه قاعد جوا
_ بسم الله الرحمن الرحيم أي دا حد يقعد كدا زي عفريت العلبة
أبوه تجاهل كلامي وقام وقف يقول ببرود
_ برضو عملت إللي في دماغك؟!
رد نوح ببرود
_ أظن دا مش وقت حد يجي يزور حد فيه
_ ازاي تعمل حاجة زي دي منغير ما ترجعلي!
_ وراجعلك لي هو أنا صغير!
أبوه زعق جامد
_ آه يوم ما تتجوز خدامة مش من مستواك تبقى صغير
وش نوح قلب من البرود للعصبية
_ ما تتكلمش عليها كدا، مش هسمح لأي حد يقلل منها نهائي
_ والله! هي دي اختياراتك!
_ أيوا هي دي اختياراتي، إللي مش هخلي حد يقلل منها أبدًا ولا يتكلم عليها كلمة، مش أنت عايزني اتجوز، أنا اتجوزت
كان لسه هيتكلم بس أنا زعقت
_ هو في أي داخل عمال تشوط فينا لي، أنت مش ملاحظ إن إحنا لسه كاتبين الكتاب وأنت جاي منغير معاد حتى ؟
_ معاد! هاجي لبيت أبني بمعاد؟؟
_ لا هو مابقاش بيت إبنك لواحده هو بقا بيتي معاه، فلازم تستأذن قبل ما تيجي
_ أنت راضي بالكلام دا!!
رد نوح بإبتسامة
_ آه راضي
_ ماشي يا نوح بس افتكرها بقا، وافتكر أن قولت لك أي
_ أنت بتهددني بالإدارة!
_ لا أنا مش بهدد أنا بنفذ على طول
أتدخلت وقولت بثقة
_ بتهدد مين وبتنفذ مين، أنت بتكلم عدوك ولا إبنك!! أنت فاكر إنه هيشيبك تضيع تعبه وشقاه وتاخده ليك؟! نوح هيرجع من بكرا شغله
نوح أتدخل بتحذير
_ مريم!!
سكت وسيبته يتصرف، وهو قال لباباه بضيق
_ هنتكلم بكرا في الكلام دا، مش وقته ولا مكانه ولا ظروفه
ماقدرتش أسكت وقوت بإستفزاز
_ فوتك بعافية يا حمايا، ولا أحضر العشى تتعشى معانا!!
خرج والنار بتخرج من ودانه
وأنا بصيت لنوح
_ أدخل أغير ولا ألاقي مرات أبوك طالعة من درج الدولاب
قال بتحذير
_ مريم؟
قولت ببرود
_ خلاص يا عم أنا داخله اتخمد
_ يا عم!
_ يا سي نوح حلو كدا !
ضحك وهو راسه برضى
_ حلو جدًا
_ طب تعالي أقولك
_ لالا مش عايزة لا
_ مش عايزة أي! بقولك تعالي
_ قول من عندك أنا مش واقفة في المريخ
_ هقولك كلمة سر
_ ينهارك أبيض، تصبح على خير
تاني يوم صحينا على خبط جامد جدًا وصوت تكـ سير رهيب، قلبي وقع في رجلي من الخوف على نوح طلعت أجري على برا وقلبي بيدق جامد
