رواية عين مش شايفه وروح دافيه الفصل الثامن
في أي! في أي حرام عليكم في أي
_ مريم مريم أي الصوت دا!!
خرجت على ناس غريبة مفيش في قلبهم رحمة بيكسـ.روا في البيت، ولما نوح خرج من أوضته كان سامع صوت التكسير منغير ما يفهم في أي
كنت خايفة ومش مستوعبة إللي بيحصل فمسكت في أيده بسرعة، لحد ما واحد جه وقف قدامه وقال بصوت خشن
_ دا سلام من أبوك، عشان تبقى تعصي أوامر
صرخت وقولت بقوة وأنا من جوايا برتجف
_ هبلغ عنكم و أوديكم في داهـ.ية
نوح ضغط على أيدي بتحذير
_ بس يا مريم
خرجوا البلطجية ببرود زي ما دخلوا وكأن البيت بيتهم
نوح دخل قعد على السرير وحط راسه بين أيديه
_ أنا ماكنتش أتخيل أن في أب بالج.حود دا
فضل على سكوته
_ أنت ساكت لي! أوعى تقول إنك هتسكت عن إللي عمله
_ أخرجي برا عايز أكون لواحدي
_ أنا لو خرجت هطلع على القسم أعمل محضر
ضحك بمرارة وهو بيقول بسخرية
_ وهتقولي أي، جوزي ماعرفش يحمي بيته من بطلجية أبوه
استوعبت إنه حاسس يالتقيد والعجز، فقعدت جنبه
_ أنت مالكش ذنب
_ دخلوا بيتي وأنا ماعرفتش أعمل حاجة ... ماعرفتش عشان عاجز وهو أستغل إن عاجز
مسكت أيده وقولت بهدوء
_ أنت مش عاجز يا نوح هو إللي شخص مش كويس إنه يعمل كدا، قاسي وحتى ما احترمش حرمة بيتك
_ أنا .. مصدوم
قالها بوجع الدنيا كله
_ بحاول أكون كويس بس أنا بعاند نفسي أنا مش كويس، أنا تعبان ومن يوم الحادثة بحاول اتأقلم مش عارف، بمثل القوة لكن أنا فقدتها، كنت متهور وغبي ومش عارف بعمل أي، كنت مغرور و بعمل كل إللي عايزة، عندي كل حاجة، وفجأة الدنيا بقت عدم في وشي، أقرب الناس ليا سابوني، الضهر انكسر وبقيت لواحدي .... حتى إلي معايا معايا شفقة وأنا أكتر شعور بكرهه الشفقة
_ بس أنت مابقتش لواحدك ... أنا معاك
اتنهد ومال براسه على كتفي وسكت، لكن أنا قولت
_ أنت هتنام ولا أي، والله ماهيغمض ليا جفن غير لما أعلم أبوك الأدب
_ عيب يا مريم
_ وهو إللي عمله دا مش عيب!! أنت عايز تسكت! عايزه يقول عليك ضعيف!
_ هنعمل أي يعني؟
_ هقولك هنعمل أي
دخلنا شركة نوح وأنا ماسكة أيده، برشده للطريق بكل هدوء ورغم إنه مش شايف ومهزوز من جوا، إلا أن كنت معاه في كل خطوة، وكان ماشي بثقة ظاهرية كبيرة، وكل الموظفين اتصدموا من وجوده ولما قربوا يسلموا عليه قال بقوة
_ أنا رجعت تاني يا شباب عشان نشوف الشغل ماشي إزاي، عايز التزام ودقة ومش عايز أي غلط، وأحب اعرفكم مريم مراتي .. وهتكون مساعدتي هنا واحترامها من احترامي ووجودها زي وجودي
باباه خرج من مكتبه وهو بيقول بذهول
_ أنت بتعمل أي هنا؟
_ راجع لشغلي ولشركتي .. وآه نسيت أقولك أنا لغيت توكيل الإدارة شكرًا على مجهودك معايا، وصلني سلامك
كانت صدمته كبيرة وأنا أبتسمت بحماس وقولت بإستفزاز
_ ماتنساش دواء الضغط يا عمي، شكلك هتت.جلط
_ هي دي بقا إللي وثقت فيها وجايبها تتحامى فيها!
_ بتحامى في مين، دا عشان أنت أبوه فهو بار بيك ومش عايز يعمل حاجة تغضب ربنا، لكن أنا ممكن اغلط عادي أنت مش أبويا، بس أنا مش هغلط وهحترم نفسي ومش هقول إنك راجل ناقص وباعت بلطجية لابنك في نص الليل
عليت صوتي جدًا في آخر جملة عشان الكل يسمع وكمان بهدوء
_ عمري ما أقول كدا برضو وأفضح حمايا دي أصول
بعد شوية كان نوح قاعد وبيسمع التقارير إللي بقراءها ليه
_ واحدة واحدة يا مريم، نطقك كله غلط
_ ماتعصبنيش في حصة القراءة دي بقا، وبعدين لي يكتبوا التقرير نص أنجلش ونص عربي، هو إحنا عايشين في بريطانيا، ما كلنا مصريين
_ كفاية هري ورغي، قولي المفيد
قولت بتفكير
_ تفتكر مشروع الفراخ، كان هيكسب أكتر ولا شركتك
هز راسه بذهول
_ دا هوس بالفراخ بقا مش معقول والله
_ هو أنت هتديني مرتب ولا هتاكل فلوسي عليا وتقولي الحبتين الحمصي بتاع أنتِ مراتي مرتب أي!
خرج الفيزا من جيبه ومدها نحيتي
_ خدي الفيزا كلها مرتب أي بس!
_ لا شكرًا أنا عايزة مرتب ليا عشان ماترجعش تقول صرفتي أي ومش صرفتي أي
دلك جانب راسه وقال بتعب
_ حاضر حااضر، ممكن تخلصي التقرير
_ ماشي، بس خلي بالك مش هطبخ النهاردة، مش هقدر
_ ماشي هطلب أكل، خلصيني
_ هتطلب أكل أي!
_ يا مريم يا أمي، قولي التقرير الأول خلينا نخلص وبعد كدا هنشوف الأكل
قلبت عيني بملل وسألته بفضول
_ طب ممكن طلب
_ يا الله يا ولي الصابرين، نعم!
_ ممكن تقعدني على الكرسي إللي بيلف دا عشان خاطري؟ نفسي أجربه أوي
قال بصرامة
_ لا خلصي التقرير الأول
روحت ناحيته وبدأت أشده من أيده عشان يقوم
_ عشان خاطري، عشان خاطري، شوية صغيرين
قام بإستسلام، وساعدته يقعد على الكرسي إللي قدام المكتب
_ أنتِ مجنونة بجد
قعدت وبدأت الف وأضحك
_ وربنا جامد، ينفع ناخده معانا البيت
_ يا مريم التقرير، يا الله جاية تعملي أي معايا بقا
_ حاضر حاضر
بدأت أقرأ التقرير، وإللي ما اعرفوش اصوره واخلي برنامج يقراءه بالانجلش، كان بيدخل ناس معاه و بيعرضوا الشغل، وأنا بتأكد من الأوراق، ومن الفلوس إللي مكتوبة وبتمم على الحاجات إللي قالي عليها
لحد ما بدأت أحس بالملل وبالجوع
_ ممكن ناكل بقا، شغلك ممل أوي
_ مش عايز مجادلة مش اصريتي تيجي معايا!!
قومت وقفت في الشباك شوية وقولت بإنبهار
_ نوح بص الفيو هنا رهيب، تعالى بص
مسح على وشه بيأس، هل هي غبية ونست إن مستحيل ابص
_ أنا عارف الفيو يا مريم
سحبت أيده بسرعة وجريته ناحية الشباك
_ شم الهوا المنعش دا، مصر كلها باينه من هنا
_ مش للدرجة دي، بس الشركة في الدور العشرين طبيعي
_ استمتع وأنت ساكت
سكت شوية وبعدين لقيته مسك أيدي واتنهد بصوت عالي
_ شكرًا يا مريم
_ على أي!
_ على إللي عملتيه و وقوفك جنبي، حاجة كبيرة عندي
_ الله يكرمك
قال بسخرية
_ ردك مثالي أوي
ضحكت وقولت بثقة
_ كلهم بيقولوا كدا
_ كلهم مين!
_ كل إللي يعرفني يعني
_اممم
_ هو أنا ينفع أسألك سؤال!
_ لا
_ أنت عملت الحادثة إزاي!!
حسيت وشه انقلب، وبقى جاد وكأنه السؤال أخده على غفلة
_ كنت مع صحابي، في رايد بالبايك، أنا بحب البايكات أوي، والعربيات، وعملوا تحدي الخطـ.ر، إللي يوصل أسرع منغير خوذة وعلى عجلة واحدة ... ومن غروري دخلت فيه لكن ... مش هكذب لأنك يعتبر عرفتي، أنا شربت قبلها سيجارة ..
_ حشيـ.ش أكيد
هز راسه بالإيجاب وأنا استوعبت إللي حصل، وهو كمل بصوت مبحوح
_ و توازني اختل و .. إللي حصل بقا، دا نتائج أفعالي
_ الموضوع صعب، بس هل حسيت بالندم!
_ في كل ثانية، حسيت بالندم إن عملت كدا، وان٢كنت مغرور وأن كنت مع الناس دي أصلًا
_ دا ابتلاء من ربنا، ربنا يعوضك خير
بص ناحيتي وقال بإبتسامة
_ ربنا عوضني خير فعلًا
_ بس سبحان الله فتحت قلبك وبعبعت
ابتسامته راحت وهو بيردد
_ بعبعت! لا دي غلطتي فعلًا قومي نروح قومي
في الطريق قولت بتردد
_ ماتفكر تاني كدا في موضوع الفراخ
_ أنتِ كرهتيني في الفراخ، أنا مش عايز مجادلة في الموضوع دا
_ يبااي
دخلت البيت قبله وقلعت الجزمة بعصبية وهو اتعثر فيها
_ النظام يا استاذة النظام
_ لله واشرب مايته
_ مريم مش بحب الهرجلة
_ وأنا مش بحب العند
_ كل دا عشان الفراخ، ياستي مش مهم تربيها، اطبخيها، عمري ماشوفت حد بيحب يربي فراخ
_ دي هواية، على سطح امي كنت بربي فراخ وبط، أنا مارضتش أقولك بط عشان الريحة، وبعدين ما الناس بتربي قطط و كلاب، أي المشكلة!
_ دي حاجات تتربى منطقية
_ يا سلام، أربي حاجة مش هستفاد منها لكن استفاد منها لا، دماغ تعبانة
_ احترمي نفسك
اتعثر تاني في الترابيزة المكسورة ورجله اتجر.حت، جز على سنانة بألم وهو بيرجع، داس على الإزاز فخرج منه تأوه من الألم قربت منه بسرعة
_ أنت كويس!!
همس بخفوت
_ نسيت أن البيت متك.سر
_ أقعد هنا لحد ما اشيل الإزاز، منه لله إللي كان السبب، إحنا لازم نغير كالون الباب
شيلت الإزاز وبعدت الحاجات المكسرة، ولاحظت الد.م إللي على بنطلونه، فجبت علبه الإسعافات وقعدت على الأرض
_ وجعاك!
قال بعند
_ لا
أبتسمت بسخرية وحطيت عليها كحول وهو عض على شفايفه من آلام
_ الرجالة عندها طاقة ذكورية عالية من الحاجات دي، ويجي دور برد يحسسوك أنهم خلاص بيفـ.يصوا
_ مصطلحاتك غريبة أوي بجد جيباها منين
_ أقولك منين ومتزعلش
ضحك بعدم تصديق
_ يا الله
_ أنت إللي بتسأل أسئلة غريبة... متأكد أنك مش حاسس بوجع؟!
_ حاسس بس عادي تعويرة
_ تعويرة أي أنت رجلك مفتوحة قد كدا
_ هكلم حد يجي يغير الكالون
_ نوح أنت كويس!
_ آه تمام
عدى شهر على عودة نوح للشركة، و الدنيا كانت ماشية تمام، زي ما أتفقنا، لحد في مرة وأحنا راجعين قولت
_ دا مش طريق البيت
_ آه عامل ليكِ مفاجأة
_ عامل أي!
_ ولو قولت هتبقى مفاجأة إزاي
بعد شوية وقف قدام ملاهي كبيرة
_ نوح بتهزر!!
_ قولت لازم تجربي كل حاجة كان نفسك تجربيها
_ بس أنا عمري ما جيت هنا، وممكن أطلع بخاف منها
_ هنجرب ونشوف
بعد خمس ساعات من تجربة معظم الألعاب
_ نوح نوح
_ ماتصوتيش في ودني كفاية عليا صوت الألعاب والدوشة
_ تعالى نجيب غزل بنات
_ تعالي جيبي أنتِ
_ هتجيب معايا
_ لا مستحيل أكل البتاع الملزق دا
قعدنا على الكراسي ناكل غزل بنات بعد ما اصريت يجيب وهو كالعادة استسلم، أومال مش بيستسلم للفراخ لي؟!
_ عارفة لو كنتي عطياني البينك أنا هعمل فيكي أي!
بصيت للحلاوة البينك اللي في أيده وقولت بهدوء
_ عيب عليك، ها هنلعب أي تاني
_ نعلم! أنا نفسي لعبت عليا يا مريم، أنتِ ماتعبتيش!!
_ طب نلعب آخر خمس لعبات بس
_ لا
_ أربعة طيب آخر أربعة
_ مش عايز مجادلة قولت لا
_ طب تلاتة، آخر كلام تلاتة
_ هنروح يلا
_ طب بص بقا آخر اتنين ومش هتنازل عن رأي
_ قولت يلا
_ مش هيلا
_ يلا يا مريم من فضلك، بلاش تفرجي الناس علينا
_ قولت مش هيلا هنركب يعني هنركب
_ وأنا قولت لا يبقى لا
ضحكت بصوت عالي وأنا بسقف
_ الله البتاع دي حلوة أوي
_ هدومي اتغرفت منك لله
_ هدوم أي بقولك تحفة، شوفت الماية ضربت في وشنا إزاي، تاني بالله عليك نركب مرة كمان
_ خلاص كفاية
مسكت التيشيرت بتاعه وأنا بقول برجاء
_ آخر مرة أخرى مرة أخر مرة
صرخت بحماس
_ تحفة تحفة والله، جميلة أوي، نفسي أنزل بسين، يارب أبوك يموت عشان تورثه ونروح ننزل البيسين إللي في بيته
_ لي أقسم بالله لي، ما ممكن ننزل في أي مكان
_ بجد؟ ممكن نبقى نروح أي مكان، أصل الماية مغرية في البحيرة إللي بننزل فيها دي
_ بحيرة! تمام تمام هنروح
روحنا البيت وأنا كلي حماس وناسية كل حاجة وبضحك ومبسوطة وأومل ما دخلنا وأنا بحكي عن أحداث اليوم إللي هو كان معايا فيها أصلًا، فجأة رفعني من على الأرض بين أيديه وأنا صرخت بخضة، لكن هو قال بخفوت
_ هششش ودني اتخرمت .. أسكتي شوية بقا واسمعيني أنا
_ لالا لا لا لا لا لا لا لالالالا
