رواية جزيرة غراب الوادي الفصل الثامن
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«حين تَسُلّ الأُخُوّةُ خَنَاجِرَهَا فِي الخَفَاء، تُصبِحُ القَرَابَةُ أَلعَنَ العَدَاوَاتِ وَأَشَدَّهَا إِيلَامًا»
(صِرَاعُ الأَشِقَّاء)
﷽
مرّ الليل بهدوءٍ حذر على موج كانت تستلقي في تختها تتذكر كل تفصيلة حدثت معها في هذا اليوم الطويل.
تذكرت حديث جلال حين قال إن المصائب أصبحت تلاحقه منذ أن رآها فتبسمت بصوت خافت وقالت:
موج: والله محد نحس غيره وأنا اللي من يوم ما قابلته وحياتي اتقلبت حتى شغلي اللي ليّا فيه سنين سُبته.. ابن البومة!
ظلت الأفكار تراودها؛ ورغم كل شيء وقسوة ذلك الشخص إلا أن شهامته وحمايته للنساء كانت ملفته ونالت إعجابها رغماً عنها وبعد وقت غفت لتمر ليلتها هادئة.
ــــــــــــــــــــــــــــــــــــــــ**
أما في الجانب الآخر فكان العكس تماماً..
أصبحت مندرة سرايا العمدة تطن بالصراخ وجمر الغضب يشتعل من غنام على جلال.
وكالعادة كان شاهين ووليد يبثان سمهما كأمّهما ليزيدا النار اشتعالاً بين جلال ووالده.
جلال: يا بوي يوم مش فارق أنا من غير ما التجار وأصحاب البضاعة ياجوا هُوصلها لغاية عندهم.
غنام (بتهكم وثورة): وماله أقولك اعمل فرشة أسهل كيف بياعين الخضرة في اليابس واقف بيعلهم كمان!
خرجت ضحكة مستفزة من وليد فنظر إليه جلال بغضب مكتوم ثم سار نحوه بخطوات متسارعة أمسك بيده وجذبه بعنف نحو باب المندرة ودفعه خارجاً ثم أغلق الباب في وجهه بقوة.
شاهين (باعتراض): وليد اللي منرفزك قوي عشان ضحك صراحة الموضوع قِلِب مسخرة!
جلال (بنبرة حادة): شغلي وهحله.. خليك في شغلك انت!
غنام: ده اللي باخده منكم خُناق كيف العيال وانت يا جلال كل ما نطَلع شغل الحكومة تكبس.. خير؟! إيه الشغل تِقِل عليك ونشوفوا حد يسندك يا سيد جلال؟!
جلال: يا بوي طيب كنت أعمل إيه؟!
غنام: أنا عاوز اعرف ليه اليامين دول رجل الحكومة داست الجزيرة كتير؟!
صمت جلال دون رد فصاح غنام بغضب:
غنام: إيه سكتّ يعني مش الحرس تبعك والحماية؟! يعني تعرف دبة النملة في الجزيرة.. ليه بقينا كيف بيت الغزية كِده ده طالع وده داخل؟!
جلال (بعينين جادتين): الظابط اللي جه كان بيفتش في الأماكن اللي بنداري فيها حاجتنا بالظبط.. مش جاي يخبط وخلاص!
غنام: يعني إيه؟!
جلال: حد مِخبَره!
غنام: حد مين ما فتشتش في رجالك ليه؟!
جلال: رجالي محدش يعرف غير أهل السوق واكيد محدش منهم هيتكلم ويفتن والا هيقول ويقعد يبيع وينحبس؟!
غنام: بتلمح لإيه؟!
جلال: مش لحاجة يا بوي.. هعرفه إن شاء الله والبضاعة بكرة هتوصل لأصحابها.
غنام (بقلة صبر): هنشوفوا بكرة هتوصل ولا نجهزوا الغدا للحكومة!
جلال: إن شاء الله هتوصل.. بعد إذنك يا بوي.
تركهم جلال وغادر المجلس والدم يغلي في عروقه.
ــــــ**
ما إن خرج جلال حتى وجد وليد يجلس خارج المندرة بملامح متربصة.
وقبل أن يغادر جلال المكان وقف وليد ممثلاً البراءة والأسف:
وليد: جلال.. على فكرة مكنش قصدي عارف الموضوع مضايقك!
اقترب منه جلال بخطوات ثقيلة ونظر إليه ببرود يسبق العاصفة ثم قال:
جلال: اسمع يادّ.. أبعد عني صدقني اتحملتك كتير وإياك تفكر إن أبوك وشاهين لو نزلت ذراعي عليك حد هيحلك مني أنا بالذات اتجنبني!
وليد (بمسكنة): يادّ ماشي يا خوي.. الله يسامحك.
وضع جلال يده على كتف وليد ثم ضغط عليه بقوة وغلظة جعلت الآخر يتأوه مكتوماً وأكمل تحذيره بنبرة حادة كالسيوف:
جلال: ويونس كمان بعد عنه انت مش كبيره ولا رئيسه في الشغل زيك زيه.. هتتعالى وتشوف حالك عليه أو تضايقه عشان يطفش ويسيبلك الليلة تنهب براحتك فيها من غير رقيب له.. يبقى بتحلم!
وليد: مالي أنا بيونس إحنا تمام في الشغل!
جلال: هاتبقي تمام وغصباً عنك عشان لو شكا منك تاني واتمنظرت عليه قدام اللي يسوى واللي ميسواش هجيلك شغلك وأقل قيمتك قدام الناس!
هتعتبرها انحياز عشان يونس ولد أمي آه.. انحياز ونص أخوي وأنا في ضهره وخلي بالك من نفسك!
ـــــــــــــــــــــــــــــ**
تركه جلال وصعد على ظهر حصانه ليغادر في عتمة الليل بينما وقف وليد بأنفاس متسارعة وصدره يعلو ويهبط بالغل والحقد يرقب أثره بصرير أسنان:
وليد: قُلت هخلص منكم.. بس حظوظ والجايات كتير!
ــــــــــــــــــــــــ**
صعد شاهين إلى الجناح الخاص بكريمة.
كانت نائمةً هادئة؛ أبدل ثيابه بخطوات خفيفة واقترب منها على الفراش ليحتضنها فانتفضت مذعورة!
كريمة (وهي تضع يدها على قلبها بتنفس متسارع): شاهين؟!
شاهين (بابتسامة ساخرة): مالك اتفزعتي كِده نسيتي إن ليكي راجل إياك؟!
كريمة (بعدما استوعبت وجوده): له مش ناسية.. بس الناس تتنحنح تفوق اللي نايم مش تتسحب كِده ولا فاكرني واحدة من إياهم؟!
شاهين (بنفاذ صبر): يا بووووي هنبتدي مابتملّيش من السيرة دي أبداً؟!
كريمة (وهي تعير وجهها عنه): له مَليت.. تصبح على خير.
شاهين (ممسكاً بكتفها): تصبح على إيه انتي هتسوقي فيها ولا إيه؟!
التفتت كريمة إليه بنظرة حادة وقاطعة:
كريمة: روح لوعد.. أنا قلتلك بقرف أكل مكان حد من نفس المعلقة وعد مرتك وضرتي حتى لو كسرتني بيها هي حلالك.. إنما الباقي واللي بره الجزيرة له!
شاهين (بذهول وغضب مكتوم): معلقة أنا معلقة يا كريمة؟!
كريمة: تشبيه!
شاهين (بصوت أهدى يحمل رجاءً دفينًا): تعرفي المشكلة إيه إني محبيتش قَدِك ولا برتاح غير في فرشتك.. لا وعد ولا غيرها أنا بحايل بس نفورك طول وهاّمِل!
كريمة (ببرود مزيف): والله لو مَليت.. اتجوز وسيبني أنام عيالك بيصحوني بدري.
شاهين (بقلة حيلة): ماشي بكيفك!
التفت شاهين ليعطيها ظهره ويلزم جانبه من الفراش فبادرته كريمة بنبرة خفية الترقب:
كريمة: مش هتروح لوعد؟!
شاهين: مطرح ما أحب هكون مش بحديتك.. نامي يا كريمة!
التفتت هي الأخرى لتغفو ولكن كعادتها.. تظهر شيئاً وداخلها يغلي بشيءٍ آخر تماماً؛ كانت تشعر بثقل شديد في سحب أنفاسها بينما سالت دموعها الصامتة على وسادتها بللًا كاوياً.
فلا حيلة لها في أمرها غفت على تلك الحال المعقودة التي اعتادتها بسبب أفعال شاهين وطيشه.
ـــــــــــــــــــــــــــــــــــــــــــ**
في صباح اليوم التالي..
دخل هاني إلى مكان عمله مع جلال ففوجئ به يغفو وهو جالسٌ على كرسيه.
استغرب وجوده في هذا الوقت فاقترب منه وأيقظه بخفة.
اعتدل جلال في جلسته بألم في ظهره إثر تلك الغفوة غير المريحة وبدأ يتململ قليلاً ليفيق.
هاني: خير بايت هنا ولا إيه استغربت لما شفت حصانك برة وقلت جيت بدري بس الظاهر إنك نايم هنا من عشيه!
جلال (بنبرة مجهدة): اه.. عندك مانع؟!
هاني (بابتسامة ومزاح): له يا عم بطمن بس.. ولد الحاكم ينام على الحرير مش هنا!
جلال (بسخرية مريرة): حرير صوح.. ابقى تعالى نام مكاني.. شيع حد يجيب فطور.
هاني: أنا مرتي فطرتني ودلعتني قبل ما أنزل إنما أجيبلك انت؟ وماله!
تبسم جلال قائلاً بنبرة تحمل شجناً خفياً:
جلال: الله يسهلك.. عقبالي!
هاني: والله كل حاجة في يدك إيه مانعك تتجوز؟!
جلال (متهرباً من الإجابة): روح شيع حد.. وشوف منعم فين!
ــــــــــــــــــــــــــــــ**
بعد وقت الإفطار اعتدل جلال في جلسته بجدية صارمة ثم قال:
جلال: إحنا اللي هنطلعوا البضاعة من الجزيرة المرة دي!
هاني (باستغراب): ليه إحنا؟!
جلال: مش هستنى الحكومة تاجي تاني وتعطلنا خصوصاً إني شاكك إن حد قالهم!
منعم (بتوجس): طيب وكيف ده يا جلال بيه يعني صعب..
جلال: له مش صعب سهل إن شاء الله.. المهم التجار كل واحد يستنى في مكان قريب برة الجزيرة عشان ياخد حاجته مش هنوصلوهالو البيت يعني!
التفت هاني لمنعم بنظرة سريعة ثم عاد ببصره نحو جلال وقال:
هاني: تمام.. هنطلعوها كيف؟!
جلال: هتُنشر بين الحرس إننا هنطلعوا البضاعة النهاردة الساعة تنين الليل مع المراكبية اللي في الجزيرة من ورا.. حتى أبوي عنده علم إني هطلعها النهاردة!
منعم (بعدم فهم): هننشروا يعني هنطلعوها ولا له؟!
جلال: له.. هنطلعوا صناديق سِباخ مكانها!
هاني (وهو يعقد حاجبيه): أنا مش فاهم حاجة قصدك بدالها طيب والبضاعة الأصلية هي فين؟!
جلال: بكرة الجمعة.. التجار اللي بيطلعوا بمحاصيل من الجزيرة وغنم يبيعوها في سوق الجمعة هتطلع معاهم البضاعة بس مش في مكانها هندسوها بينهم ولما تعدي بخير تتلم مطرحها وتوصل لأصحابها!
جلال: وقت ما هتطلع الضهر أنا هكون في البيت نايم مش هنا!
هاني (بذهول وهو ينظر إليه بريبة): جلال.. انت نمت زين ولا رأسك مصدعة؟!
جلال: هاني صحصح أنا وجودي هيزيد الشك لكن لو طلعت وأنا في البيت مستحيل حد هيظن إن البضاعة طالعة مع تجار سوق الجمعة!
هاني: مش عارف أقول إيه بس متأكد من فكرتك دي ده غير إن لازم نخبروا التجار أو ندسوا بينهم حرس تبعنا برضه يوصلوا الحاجة لأصحابها!
جلال: له دي شغلة منعم.. يشوف حد ثقة وقليل كلام ولا إيه يا منعم؟!
منعم: عيني يا بيه اعتبرهم جاهزين متقلقش.. وزي ما عاوز الطَوع كتير!
جلال: زين.. المهم لغاية الليل الكل يعرف اللي اتفقنا عليه إنما موضوع سوق الجمعة محدش يعرفه غيرنا! ولغاية الصبح تخبر اللي هيطلعوا.
منعم: ماشي حصل.
هاني: إن كان على الخبر يوصل للحرس.. فـ في ثواني!
جلال: ماشي.. دلوك شوفوا هتعملوا إيه.
ــــــــــــــــــــــــــــــــــ**
في الناحية الأخرى كانت موج قد وصلت إلى مكان عملها فاستقبلتها زينب قائلة بنبرة لائمة:
زينب: يا بت مش قلتلك تعالي بدري عشان العروسة؟!
موج (باعتدال وتهكم): وه مش ده معادي هي العروسة هتفوت من دلوك للمغرب ليه هننحتوا حجر؟!
زينب: اتريقي اتريقي البنات بتعمل كذا حاجة دلوك يا أم جهل عشان تنور!
موج: ربنا ينور قلبك يا خالة.
زينب: أمين يا ختي.. أنا وانتي يالا جهزي الدنيا زمانهم على وصول.
بدأت موج في العمل بهدوء حتى مر اليوم وكان كل شخص في الجزيرة يهتم بأمره كالعادة والحرس وصلتهم الأخبار وبدأ التجهيز للخطة الوهمية.
قبل المغرب كانت موج قد أنهت عملها فاقتربت من زينب وقالت:
موج: يا خالة أخرت قوي ولازم أمشي أُمي هقولها أي حاجة وتسكت إنما أبوي لو رِوح هيفتحلي تحقيق!
زينب: ماشي خلاص روحي انتي.. أنا قربت أخلص والعروسة كلها شوي وعريسها ياخدها.
موج: ماشي.. صوح بكرة كنت باخد إجازة من المشغل هنا فيه شغل ولا له؟!
زينب: فيه أكيد كل يوم.. لو قدرتي تعالي مقدرتيش مش مشكلة عشان فايز.. يالا روحي!
موج: ماشي.. سلام!
ـــــــــــــــــــــــــــــــــ**
تركتها موج وخرجت مسرعة تمد خطواتها التي كانت أقرب للهرولة لتصل بيتها قبل أذان المغرب.
وأثناء سيرها رأت جلال يقترب من بعيد أدارت وجهها سريعاً ودلفت إلى أحد الشوارع الجانبية قبل أن يصل إليها.. لكنه كان قد لمح طيفها بالفعل.
وقف جلال أمام ندور الشارع بعد زوال أثرها وتبسم وهو ينظر لنفس الاتجاه ثم قال لنفسه بهمس:
جلال: بتتخبي مني ليه؟!
ثم انتبه لنفسه فجأة فجمدت ملامح وجهه وتلفت حوله محذراً قلبه:
جلال: خير مبسوط ليه اعدل روحك.. ده حتى وشها نحس عليك بدل ما الخطة تبوظ!
ـــــــــــــــــــــــ**
بعد عدة دقائق وصلت موج إلى المنزل.
كانت والدتها تنتظرها على أحر من الجمر وما إن دخلت حتى استقبلتها بنبرة قلقة:
سعدية: كنتِ فين كل ده المغرب دخل خلاص!
موج: كان الشغل كتير وأخرونا.. مش قلت لـ ليلى في التلفون؟!
سعدية: ومن ميتا بياخروكي لدلوك؟!
موج: صدفة يا أمي شغل هيتسلم وكل المشغل اتأخر مش أنا بس.. أدخل أغير قبل ما أبوي ياجي ويسأل.
تركت والدتها ودلفت إلى الغرفة ثم جلست على طرف الفراش تتنهد بتعب:
موج: يا بوي.. اتأخرت كتير الشغل ده هيجيب أجلي!
ثم تذكرت أنها رأت جلال في طريقها فتمتمت لنفسها:
موج: أحسن إني مشيت قبل ما يوصل.. كان هيوقفني يسال ويتأمر وكنت جيت على العشا!
وقفت وأبدلت ثيابها لتخرج قبل عودة والدها.
ـــــــــــــــــــــــــــــــــــــــــ**
وفي سرايا العمدة..
كانت النساء يجلسن خارجاً حتى أتت إليهن "حكمة" الخادمة وقالت:
حكمة: ست خضرة.. خلصت شغلي فيه حاجة تاني ولا أروح؟!
خضرة: له تشكري يا حكمة.. روحي لعيالك!
التفتت حكمة إلى نجاة قائلة:
حكمة: ست نجاة.. معرفناش برضه ندخلوا أوضة جلال بيه ننضفوها!
نجاة: صوح.. نسيت أسأله مش مشكلة روحي انتي.
استأذنت الخادمة وغادرت فتساءلت خضرة باستغراب:
خضرة: أوضة جلال مقفولة ليه؟!
نجاة: مخبراش بيقفلها بقاله يامين كل ما يطلع.
وعد: وليه حد بيدخلها غيره؟!
نجاة: هو حر يا وعد يمكن عنده حاجة تخصه فيها قافل علشانها.
خضرة: ولسة.. كل ما دا بيسوق فيها!
نجاة: يسوق في إيه أوضة ويقفلها ولا له.. حد هيدخل منكم يريح ساعتين.. غريبة!
خضرة (بضيق): اهه.. قلت لأخوكي والتجهيز لأجل عروسة وليد وزي ما إحنا!
نجاة: الصبر.. يوم تنين تلاتة أسبوع.. هيفرق في إيه؟!
خضرة: مش ولدك.. عادي عندك يا نجاة!
نجاة (بحدة خفيفة): قصدك إيه كلهم عيالي انتي اللي قليلة صبر!
خضرة (بغلّ وسخط): له.. لو كان جلال ولا يونس كنتِ قومتي الدنيا وما قعدتيهاش إنما عيالي مش على هواكي.. بتحبي ولاد نعيمة!
نجاة (بحدة وأسف): نيتك سودة يا خضرة طيب ما جلال اهه مامجوزش.. مقومتش الدنيا ليه زي ما بتقولي؟!
خضرة (بلسان حاد): عشان هو مش رايد يجوز دلوك!
نجاة (وهي تهز رأسها بقلة حيلة): ربنا يهديكي ويهدي عيالك يا خضرة.. الله يساعد أخوي ويساعد رأسه منك!
خضرة (بتهكم ومط شفتين): أيوه يا ختي.. وماله!
ظلا يتحدثان حتى مر الوقت..
ــــــــــــــــــــــــــــــــــــــــ**
وفي المساء كان شاهين يجلس مع والده ووليد. وقبل أن يصعد شاهين إلى غرفته أتاه اتصالٌ هاتفي فأجاب بنبرة مقتضبة:
شاهين: إيه؟!
انتظر قليلاً يستمع للطرف الآخر ثم قال:
شاهين: زين.. ربنا يسهله ماشي.. سلام!
أغلق الهاتف فسأله غنام باهتمام:
غنام: خير فيه إيه؟!
شاهين: جلال هيطلع البضاعة الساعة اتنين الليل من ورا الجزيرة.
غنام: اه.. ومأمن نفسه يعني هيطلعها كيف؟!
شاهين: مخابرش والله يا بوي الحارس ما قالش أصلاً حاجة.. المهم ميكنش اتسرع ويلبسنا في الحيط!
غنام: ربنا يستر إن شاء الله.
وقف وليد متظاهراً بالنعاس:
وليد: أدخل أنا بقى.. تصبحوا على خير!
ردوا عليه فدلف مسرعاً إلى الداخل ليحيك أمراً خبيثاً كعادته في الخفاء.
ـــــــــــــــــــــــــــــــــــــــــــــــ**
في منتصف الليل وفي الوقت الموعود تجهّز الجميع وقاموا بتحميل الصناديق على المراكب.
جلس جلال في أكبر تلك المراكب بجوار المراكبي وشقوا عباب النهر باتجاه الضفة الأخرى.
وحين كانوا ينزلون الصناديق بهدوء وتحت ضوء القمر الخافت خرجت من بين الأراضي الزراعية المظلمة أعدادٌ كبيرة من العساكر يتقدمهم الضابط!
كان جلال لا يزال يجلس في مكانه بصلابة وثبات على ظهر المركب.
الضابط (بسخرية وثقة): الله حلو الجو اللي انتوا فيه ده.. رومانسي نزل انت وهو اللي في إيدكم واركنوا على جنب!
جلال (بصوت جهوري يملأ الليل وهو يمسك كوب الشاي الساخن وبجواره منعم): مرحب يا بيه.. تعالى دفي إيدك بكباية شاي بالنعناع!
الضابط (بسخرية واستعلاء): أنا اللي هدفيك في حضن الحجز يا جلال متقلقش فتش يا ابني الصناديق دي بسرعة!
بدأ العساكر بالتفتيش وهم يحطمون أقفال الصناديق لكن المفاجأة كانت صدمة للجميع؛ كل صندوق يفتحونه لا يجدون فيه سوى روث الأغنام والأبقار (السباخ) صندوقاً تلو الآخر والنتيجة واحدة.
استشاط الضابط غضباً حتى كاد يجن جنونه وصعد نحو جلال على ظهر المركب بينما كان الأخير يجلس مستنداً بظهره ببرود تام يتناول شايَه.
الضابط (بصياح وغضب): إيه ده اللي في الصناديق ده؟!
جلال (بهدوء قاتل): سلامة عينك يا بيه.. نور بالكشاف يا ولد هنا سباخ.. هيكون إيه يعني؟!
الضابط: والله وكل الرجالة دي بتنقل سباخ وكمان في صناديق خشب؟!
جلال: انت خابر.. بنحبوا الجزيرة وكل حاجة فيها، ومينفعش ننقلوا السباخ بتاع بهايمنا كِده في جعاب قلنا ننقلوه في صناديق.. خير فيه حاجة؟!
نظر إليه الضابط بضيق وحنق شديد من بروده المستفز ثم قال:
الضابط: وبينقلوه الساعة اتنين بالليل ليه وكمان انت معاهم بنفسك؟!
جلال: له.. أنا مش معاهم أنا قلت أتفسح في المية شوية.. وبننقلوه بالليل؟ اه صوح ليه الليل يا منعم؟!
التفت إلى منعم متظاهراً بالتفكير ثم قال:
جلال: ليه كدة ياراجل حتي النهار له عينين!
ثم عاد ببصره نحو الضابط بابتسامة خبيثة ورزينة:
جلال: لِمؤاخذة يا بيه.. المرة الجاية ننقلوه الصبح إحنا بس قولنا حد ياخدهم للزرع بتاعه سماد يعني!
الضابط (بطفش ): بتستخف دمك يعني يا جلال؟!
جلال (بكل هدوء وثقة): أنا قاعد في حالي.. مجتش المركز انت اللي جيت اديه شاي يا منعم.
وقف منعم بابتسامة خبيثة ليناول الضابط كوباً آخر من الشاي الساخن فبطشه الضابط من يده بغلٍّ والتقطه ليقذفه في مياه النهر ثم نزل من المركب
يصرخ في رجاله ليلملموا خيبتهم وسحبهم عائداً بانتكاسة أشد مرارة من كل مرة سبقت.
انتظر جلال حتى ابتعدتو وتلاشى أثرهم تماماً ثم التفت إلى منعم وهَمَس بنبرة حادة كالصلب:
جلال: دلوك اتأكدت مليون في المية.. فيه خاين وسطينا ولازم نجيبوا قراره!
وعقب ذلك عادوا أدراجهم بهدوءٍ حذر إلى الجزيرة دون أن يفعلوا أي شيء آخر.. منتظرين جلاء الصباح لضربتهم الحقيقية.
ـــــــــــــــــــــــــــــــــــــــ**
مرّ الليل بحذر وأكد جلال على منعم وهاني بقية التفاصيل الأخيرة لتأمين خروج البضاعة الحقيقية صباحاً ثم عاد إلى السرايا بعد أذان الفجر مباشرةً ليتظاهر بالنوم ويبدو الأمر طبيعياً أمام الجميع.
**
في الصباح استيقظت موج في وقت مبكر.. لم تستطع الذهاب إلى المشغل لكنها كانت تشعر بسعادة خفيفة ومبهمة تملأ صدرها دون أن تدري لها سبباً.
وقفت بنشاط وهِمة تبدأ في تنظيف المنزل وترتيبه لتهيئ الجو وترش المعطر قبل صلاة الجمعة.
وفجأة طرق "حليم" الباب بطرقات متتالية فصاحت موج من الداخل:
موج: ادخل!
لاكن يبدو أنه لم يسمع صوتها فكرر الطرق فصاحت بطفق وضيق:
موج: وه اتنيل وادخل ياللي برة!
دلف حليم وهو يبتسم بسخرية:
حليم: اهه.. اتنيلت ودخلت!
نظرت موج إلى قدميه فجأة وصاحت به بغضب:
موج: انت.. اتصبحنا واتربحنا اخلع مداسك برة.. أنا لسة ماسحة الأرض!
حليم: والله ما أنا خالع خالتي فين؟!
موج: أُمي فوق عند الطير.
حليم: اندهيها!
موج: ليه خير.. عاوز إيه؟!
حليم: مالك انتي؟!
في تلك اللحظة خرجت "فرح" من الغرفة الداخلية بابتسامة هادئة ورقيقة:
فرح: إزيك يا حليم؟
حليم (بنبرة ألطف كثيرة): مرحب يا فرح.. عاملة إيه؟!
فرح: زينة.. وانت؟!
تدخلت موج بينهما بسرعة وسخرية:
موج: زين.. يعني مش شايفاه واقف قدامك صاغ سليم اهه؟!
حليم: خمسة في عينك!
موج (موجّهة حديثها لفرح): بعدين بقالي ساعتين أصحي فيكي انتي والهوانم التانيين عملتوا نفسكوا قتلى إيه صحيتي دلوك وفنجلتي عينيكي؟!
نظرت فرح نحو حليم بحرج شديد وأطرقت رأسها فنهرها حليم:
حليم: معندكيش ذوق واصل حتي مع أهلك.. الله يعافينا نادمي خالتي خلصيني!
أتت سعدية في تلك اللحظة متسائلة:
سعدية: إزيك يا حليم؟!
حليم: إزيك يا خالتي.. عاملة إيه؟!
سعدية: بخير الحمد لله.. أُمك عاملة إيه؟!
حليم: زينة!
ثم التفت نحو موج التي كانت تنظر إليه بتفحص شديد وتريد معرفة سبب مجيئه فقال بغيظ:
حليم: ما تغوري جوه يا بت عاوز خالتي في كلام سر!
موج (بترصد وهي تربع يديها): والله ما أنا معتعة من رمشي!
سعدية: هات يا حليم اللي عندك.
حليم: ماشي..
أخرج رزمة من المال ومدها نحو سعدية فشهقت موج بذهول:
موج: الله إيه ده ورثتي يا أما ولا إيه؟!
سعدية (بجفاف لمجاراتها): أيوه.. جدك باع العنزة وده نصيبي!
ضحكت موج وحليم على رد سعدية بينما دلفت الأم بالمال إلى الداخل فاقتربت موج من حليم بغمز ونغز:
موج: إيه منين الفلوس دي طيب؟! شبرق على بت خالتك يا جدع!
حليم (بهدم وضحك خافت): بعنا ممنوعات.. أُمك ديلر يا موج!
موج: ديلر حتة واحدة؟! كان بان على القرد الحلاقة!
حليم (بصدمة ومزاح): قصدك خالتي قرد؟!
موج (بذعر خفيف): وطي حسك بدل ما تمسك في الكلام أكيد دي الجمعية صوح؟!
حليم: هي بعينها.. يالا تقعدي بالعافية.
موج: اقعد اشرب حاجة طيب!
حليم: شكراً يا ختي!
خرجت موج خلفه حتى الباب ليغادر فالتفت إليها حليم فجأة وقال بهدوء وهو ينظر للداخل خشية أن تخرج سعدية وتسمعه:
حليم: لما فرح تطلع تسلم خلي عندك حساسه ودم شوية.. وغوري من وشنا ولا حتى روحي جيبي كباية مية!
موج (بصدمة وعينين متسعتين): الله الله يخرب بيتك اوعاك تكون بتكلمها يا دّ؟!
حليم: عيب.. مش للدرجادي يعني بس بفهمك بدل ما انتي جِلفة كِده!
تركها وغادر مسرعاً بينما وقفت موج تحدث نفسها باستغراب وحيرة:
موج: دي مش هي بس اللي كِده.. أخ قليلين رباية صحيح!
ـــــــــــــــــــــــــــــــــــ**
وبعد صلاة الجمعة اجتمعت عائلة غنام على مائدة الغداء كعادتهم.
كان قد أتى اتصالٌ هاتفي لجلال فتنحى جانباً بعيداً عن الأعين ليرد عليه.
أخبروه على الطرف الآخر أن تسليم البضاعة مع تجار سوق الجمعة تم بهدوءٍ تام وكل شيء سار كما كان متوقعاً دون أي عقبة أو اعتراض من الحكومة.
تنهد بارتياح عميق وزال الثقل عن صدره ثم خرج للعائلة بملامح هادئة وجلس معهم ليتناولوا الطعام سوياً..
وأثناء تناول الطعام فتحت خضرة موضوع زواج وليد من جديد:
خضرة: إيه يا غنام بيه؟ كلمت أهل العروسة ولا لسة؟!
غنام (بتهكم وهو يضع لقيمته): قوم يا علي جيب المصحف يا ولدي عشان أحلف لأمك إني كلمتهم!
خضرة (بفرحة وعدم تصديق): صوح يعني هنروحوا نتمموا كِده؟!
غنام: إن شاء الله.. بس اللي يشوف فرحتك دي ما يشوفكيش بعد أسبوع جواز وانتي ماسكة ودني تشكيلي من دي ودي!
ضحكت كريمة بصوت خافت وصامت فالتفتت إليها خضرة بغيظ:
خضرة: بتضحكي على إيه يا كريمة؟ هشتكي منك ليه يعني مفيش عندي لسان أوقف بيه كل حرمة عند حدها؟!
كريمة (بهدوء وثبات): أنا مكلمتش ولا قلت حاجة!
قاطعهم شاهين بنحنحة جادة جذب انتباه الجالسين:
شاهين: معلهش يا بوي.. كنت عاوز أخد إذنك ورأيك في موضوع.
غنام (بتأفف): خير انت كمان مش بيحلالكم الحديث غير على الوكل انت وأمك؟!
شاهين: عاوز أتجوز.. بعد إذنك يعني.
التفتت إليه كريمة ووعد بصدمة وذهول في آنٍ واحد بينما تابع غنام بحواجب معقودة:
غنام: تاني.. تاني جواز يا شاهين انتبه لعيالك وأرضى بيللي في يدك!
شاهين: له.. النوبة دي إن شاء الله آخرهم لو وافقت يعني يا بوي.
غنام: نخلصوا من وليد الأول عشان نرضوا أمك وبعدين نشوفوا جوازك انت.
خضرة (مدافعة): وماله الإتنين مع بعض إيه يمنع يعني؟!
وعد (بثورة وغضب مكتوم): إيه يمنع عادي عندك كِده يا عمتي؟!
شاهين (بتحذير ونبرة قاطعة): وعد اسكتي انتي!
غنام: ومين هي التالتة دي.. بت مين عشان نعرفوها؟!
شاهين: له انت متعرفهاش هي.. بس تعرف أبوها عز المعرفة!
غنام: طيب زين.. مين؟!
شاهين (وهو يرمق جلال بطرف عينه بنبرة تحمل التحدي):
بنت فايز النجار الكبيرة.. اسمها موج!
