رواية عمر وليلي الفصل الثامن 8 بقلم نون لاشين


 رواية عمر وليلي الفصل الثامن 

ليلى ليه رميت نفسك قدام الرصاصة؟ عايزني أعيش إزاي من بعدك؟!"

ليلى.. كانت بتحاول تفك الحبال من إيديها بجنون 

في نفس اللحظة.. طارق هجم على عبد الرحمن وضربه بقبضة إيده في وشه وقعه على الأرض وطار المسدس من إيده.. ودخلت قوات الشرطة وحاصرت المكان بالكامل وقبضت على عبد الرحمن وسارة اللي كانت بتصرخ، وكريم اللي قعد على الأرض وحط إيده على راسه باستسلام وندم بعد ما ضيع مستقبله وحياته.

طارق جري بسرعة وفك الحبال من إيد ليلى .. ليلى اترمت على الأرض جنب عمر وحطت راسه على رجلها وهي بتصرخ بهستيريا "عمر! فتح عينك يا عمر عشان خاطري! متسبنيش يا حبيبي أنا مليش غيرك في الدنيا! طارق اطلب الإسعاف بسرعة عمر بيموت!"

 ليلى استجمعت قوتها.. قلعت الجاكيت اللي لابساه وكبست بيه بكل قوتها على الجرح اللي في صدر عمر عشان توقف النزيف.. 

ليلى وهي بتعيط وبتضغط على الجرح: "استحمل يا حبيبي.. استحمل عشاني.. قلبك قوي.. خليك معايا يا عمر أرجوك!"

وصلت عربية الإسعاف المجهزة في دقايق.. شالوا عمر وحطوه على الترولي.. وليلى طلعت معاه  وحطتله ماسك الأكسجين وهي بتراقب شاشة النبض اللي كانت بتنزل بشكل مرعب!

بعد نص ساعة.. وصلت الإسعاف للمستشفى بتاعتهم.

كانت ندى واقفة قدام باب الطوارئ ومجهزة فريق جراحة القلب والصدر بالكامل بعد ما طارق كلمها في الطريق.. أول ما ندى شافت ليلى نازلة من الإسعاف وهدومها وإيديها كلها غرقانة بدم عمر.. حطت إيدها على بقها بصدمة!

ليلى صرخت في الدكاترة وهي بتجري : "جهزوا أوضة العمليات فوراً! الرصاصة قريبة جداً من الشريان التاجي وفي نزيف داخلي في الرئة.. مفيش وقت!"

دخلوا عمر أوضة العمليات.. والدكتور الكبير استشاري الجراحة بص للأشعة السريعة وقال
 "يا دكتورة ليلى الحالة خطيرة جداً.. الرصاصة مستقرة على بعد مليمترات من القلب.. أي غلطة في الجراحة معناها وفاة فورية!"

ليلى مسحت دموعها 
 "عمر مش هيموت! أنا هدخل معاك العملية يا دكتور.. 

ندى مسكت إيدها بخوف: "يا ليلى إنتي منهارة ومينفعش تدخلي أوضة العمليات لجوزك.. القانون الطبي بيمنع ده عشان مشاعرك!"

ليلى بصت لندى بعيون كلها إصرار : "من تلات سنين.. عمر دخلي المستشفى وهو مضروب بالنار في نفس المكان وأنا اللي ساعدت في إنقاذ حياته وهو غريب عني.. النهاردة هو جوزي وروحي.. ومحدش هيخرج الرصاصة دي من جسمه غيري!"

لبست ليلى لبس التعقيم ودخلت أوضة العمليات.. وقفت قدام عمر المتوصل بالأجهزة.. وبصت لوشه الشاحب.. وافتكرت الليلة اللي شافته فيها من تلات سنين.. نزلت دموعها وهمست بصوت واطي: "عيشت عشاني زمان وإنت متعرفنيش.. عيش عشاني النهاردة عشان أنا بقيت بعشقك يا عمر.. 

بسم الله الرحمن الرحيم."

ومسكت المشرط.. وبدأت العملية الأصعب في حياتها!

بره أوضة العمليات.. كان طارق رايح جاي ودموعه في عينه.. وندى قاعدة بتعيط وبتدعي.. وفجأة جت ممرضة تجري وقالت: 

"دكتورة ندى! الحاج راشد فاق في العناية المركزة وعرف اللي حصل لعمر باشا من التلفزيون اللي في الأوضة ومصمم ييجي هنا!"

وبالفعل.. بعد دقايق ظهر الحاج راشد قاعد على كرسي متحرك ومعلق المحاليل في إيده ووشه غرقان في الدموع وهو بيردد: 
"يارب.. يارب احفظلي حفيدي.. ماليش غيره يارب!"

عدت تلات ساعات كأنهم تلات سنين.. وجوه أوضة العمليات، كانت ليلى بتسحب الرصاصة .. خلاص الرصاصة خرجت 

تنفست ليلى .. وفجأة!!

جهاز رسم القلب صفر بصوت عالي ومستمر.. (تييييييييييييييت)!!

الخط الأخضر بقى مستقيم.. وقلب عمر وقف تماماً!

الدكتور الاستشاري صرخ: "القلب وقف! هاتوا جهاز الصدمات الكهربائية بسرعة!"

ليلى عقلها طار.. خطفت جهاز الصدمات من إيد الممرضة وحطته على صدر عمر وهي بتصرخ بجنون ودموعها مغرقة وشها: "لااااا يا عمر! إنت وعدتني إنك هترجعلي! عمر مبيخلفش وعده! ارجع يا عمر!"

ضغطت بالجهاز.. جسم عمر اترفع من على السرير ونزل.. والخط لسه مستقيم!

الدكتور بحزن: "خلاص يا دكتورة ليلى.. مفيش استجابة.. البقاء..."

ليلى صرخت في وشه بانهيار: "اسكت! قولتلك مش هيموت! ارفع الفولت لـ 300!"

رفعت الفولت.. وحطت الجهاز على صدره للمرة التانية وهي بتعيط بحرقة وبتصرخ من جوه قلبها: "بحبااااااااك يا عمر! متسبنيش لوحدي في الدنيا دي بالله عليك!"

وضغطت بالجهاز.. جسم عمر انتفض بقوة.. وساد الصمت لثانيتين..

وبعدها.. (بيب.. بيب.. بيب)!

رجع الخط الأخضر يتحرك على الشاشة.. ورجع قلب عمر يدق من جديد وكأنه سمع صوت استغاثة حبيبته ورجع عشانها!

ليلى رمت الجهاز من إيدها وقعدت على الأرض في أوضة العمليات وهي بتعيط وبتضحك في نفس الوقت وبتسجد لله شكر!

خرجت ليلى من أوضة العمليات بعد ما قفلوا الجرح.. وأول ما شافوها طارق وندى والحاج راشد جريوا عليها بلهفة.

ليلى قلعت الماسك وابتسمت وسط دموعها وقالت للحاج راشد: "عمر عاش يا جدي.. الرصاصة خرجت وقلبه رجع يدق.. عمر بخير!"

الحاج راشد رفع إيده للسما وهو بيعيط: "ألف حمد وشكر ليك
 يارب!"

ومن فرحة طارق اللي مكنش مصدق نفسه.. لف وبص لندى اللي واقفة جنبه.. ومن غير ما يشعر شدها لحضنه بقوة وشالها من على الأرض وهو بيضحك ويقول: "عمر عاش يا ندى! أخويا عاش!"

ندى وشها بقى شبه الطماطم من الكسوف وقلبها كان هيقف.. وطارق لما استوعب اللي عمله نزلها بسرعة على الأرض وحمحم بإحراج وقال: "أحم.. أنا آسف يا آنسة ندى والله الفرحة نستني نفسي.. بس عامة يعني اعتبري ده عربون محبة لحد ما عمر يقوم بالسلامة وأطلب إيدك رسمي!"

ندى بصت للأرض بكسوف وابتسمت.. وليلى ضحكت بتعب وسط وجعها على منظرهم.

في نفس الوقت.. في سجن النساء .

اتفتح باب الزنزانة الحديدي.. واترمت جواها فريال وبنتها مايا، وكان قاعد جوه الزنزانة قبلهم بساعة "سارة" بنت عبد الرحمن!

أول ما سارة شافت مايا.. هجمت عليها ومسكت في شعرها وهي بتصرخ بجنون: "كله بسببك يا غبية إنتي وأمك! قولتولي ليلى هبلـة ومش هتاخد بالها من الساعة.. أهو البوليس قبض علينا وبابا وكريم هيتعدموا وإحنا هناخد مؤبد بسبب خطتكم الفاشلة!"

مايا كانت بتضربها وبتعيط بانهيار: "ابعدي عني يا مجنونة! إنتوا اللي فشلة معرفتوش تخلصوا عليها! أنا مايا هانم أنام على البرش في السجن مع المجرمين؟! أنا هموت نفسي!"

وقعدوا يضربوا في بعض زي الكلاب المسعورة بعد ما فلوسهم وغرورهم وداهم ورا الشمس!

بالليل.. في جناح خاص ومجهز في المستشفى.

كان عمر نايم على السرير ومتوصل بالأجهزة، وحالته مستقرة.. الكل روح يرتاح و ليلى.. فضلت معاه في الأوضة.

سحبت ليلى كرسي وحطته جنب سرير عمر.. ومسكت كف إيده السليم وحطته تحت خدها.. ومن كتر الإرهاق والتعب اللي شافته طول اليوم.. راحت في النوم وهي حاضنة إيده.

عند الفجر.. بدأت جفون عمر تتحرك .. فتح عيونه بتعب.. كانت الرؤية مشوشة في الأول.. ولما وضحت الرؤية.. بص جنبه..

وقلبه دق بقوة لما شاف المشهد ده!

نفس المشهد كان من تلات سنين بالظبط! ليلى نايمة على الكرسي جنبه.. وماسكه إيده.. وملامحها البريئة هادية زي الملاك!

ابتسم عمر بتعب.. وبإيده.. رفعها  وحط صوابعه يلمس بيها شعرها وخدها بحنان.

ليلى حست بلمسته.. فتحت عيونها بفزع ولهفة.. ولما لقت عيون عمر مفتوحة وبيبصلها وبيبتسم.. شهقت بفرحة وعيونها اتملت دموع!

ليلى بدموع: "عمر! حبيبي إنت فوقت؟! حاسس بإيه؟ أنادي الدكاترة؟!"

عمر مسك إيدها عشان متقومش.. وقال بصوت ضعيف 
 "مـ.. متتحركيش.. خليكي جنبي.. أنا مش محتاج دكاترة.. شوفتك قدامي هي الشفا كله يا ليلى."

ليلى باست كف إيده بدموع وقالت بعتاب: "كده يا عمر؟ كنت هتسيبني؟ ليه رميت نفسك قدام الرصاصة؟ كنت عايزني أعيش إزاي من بعدك؟!"

عمر بصلها : "عمري ما كنت هسمح إن الهوا يجرحك طول ما فيا نفس.. الرصاصة اللي جت في صدري دي كانت راحه لقلبي طالما فديتك بيها.. وبعدين كنت متأكد إن دكتورتي الشاطرة هتنقذني للمرة التانية.. بس المرة دي مش عشان أنا غريب.. عشان سمعتك وإنتي بتصرخي في العمليات وبتقوليلي.. بحبك."

ليلى وشها احمر بخجل وسط دموعها.. وقربت من وشه وحطت جبهتها على جبهته وهمست: "أيوه بحبك.. بحبك أوي يا عمر.. إنت عوض ربنا ليا.. إنت أبويا وأمي وأخويا وحبيبي وكل دنيتي."

عمر غمض عيونه بسعادة وقال: "وأنا بعشق التراب اللي بتمشي عليه.. أول ما هخرج من هنا.. هعملك فرح مصر كلها هتحكي وتتحاكى بيه.. وهتلبسي الفستان الأبيض بتاع والدتك اللي نفسك تلبسيه.. وهتكوني مراتي بجد قدام الدنيا كلها."

ليلى ابتسمت بسعادة.. وقالت: "طب ارتاح دلوقتي يا حبيبي عشان الجرح ميتعبكش.. هروح الحمام أغسل وشي وأتوضى عشان أصلي الفجر وأرجعلك في ثانية."

عمر هز راسه بابتسامة: "متتأخريش عليا.. بتوحشيني وإنتي بعيدة خطوتين."

دخلت ليلى الحمام اللي جوه الجناح وقفلت الباب.. وعمر غمض عيونه بتعب عشان يرتاح تحت تأثير المسكنات القوية.

بعد دقيقتين.. اتفتح باب الجناح الخارجي من غير صوت!

دخلت واحدة لابسة لبس ممرضة أبيض.. ولابسة كمامة طبية ونضارة كبيرة مدارية ملامح وشها بالكامل.. وقفلت الباب وراها بالمفتاح !

عمر كان مغمض عيونه ومش حاسس بحاجة بسبب المخدر.. والممرضة دي قربت من السرير بخطوات سريعة.. وطلعت من جيبها سرنجة كبيرة مليانة "هوا" فاضي.. عشان تحقنها في محلول الوريد بتاع عمر وتعمله جلطة فورية تموته في ثواني!

وفي اللحظة اللي كانت بتحط فيها سن السرنجة في المحلول.. اتفتح باب الحمام وخرجت ليلى وهي بتنشف وشها بالفوطة!

ليلى وقفت باستغراب وقالت: "إنتي مين؟ ومين سمحلك تدخلي هنا في الوقت ده؟ وعمر مش معاد علاجه دلوقتي!"

الممرضة اتفزعت ولفت وشها لليلى.. وبإيدها السليمة شالت الكمامة والنضارة من على وشها.. وابتسمت ابتسامة مجنونة ومرعبة!

الفوطة وقعت من إيد ليلى وشهقت برعب لما شافت وشها: "مـ.. مايا؟!! إنتي خرجتي من السجن إزاي؟!!"

مايا كان وشها متجرح وهدومها تحت لبس التمريض مقطعة وعنيها زايغة زي المجانين.. وطلعت من جيبها التاني "مشرط جراحي" حاد جداً سرقته من الطوارئ وقالت بصوت مرعب:

 "مثلت إني بنزف وبموت.. ولما جابوني مستشفى السجن ضربت الممرضة وسرقت لبسها وهربت وجيتلك مخصوص! قولتلك يا ليلى.. لو عمر مبقاش ليا.. مستحيل أخليه يكون ليكي! أنا هقتلك إنتي وهو دلوقتي وهولع في المستشفى كلها!"

وهجمت مايا بالمشرط الحاد على ليلى بكل جنون.. وعمر نايم على السرير مش قادر يتحرك.. وباب الجناح مقفول بالمفتاح والحرس واقفين بره ومحدش سامع حاجة!

تعليقات