رواية جزيرة غراب الوادي الفصل التاسع
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«أحيانًا يكون الإنسان مغرمًا بالمعاناة حبًا لا يُضاهى هذه حقيقة. قد يبدو الأمر سخيفًا لكنه كذلك.
فالمعاناة في نهاية المطاف هي المصدر الوحيد للوعي.» دوستويفسكي
(عِشْقٌ خَفِيّ: بداية الثورة)
﷽
بعد أن ألقى شاهين بكلماته المسمومة بالخبث لإثارة غضب جلال عقب حديثهما الأخير عنها ساد الصمت للحظات؛ فالأغلبية سمعوا عن تلك العائلة من قبل لكن بخصوص "فرح" ليست"موج".
التفت جلال إلى شاهين بنظرة ساحقة غير مصدقٍ خبث نواياه؛ فحتى وإن كانت لا تعني له شيئاً إلا أنه أخبر شاهين من قبل أنها تخصه كي يبتعد عنها لا ليتزوجها!
وأثناء نظرات جلال الغاضبة وقبل أن ينطق تساءل غنام:
غنام: عرفتها فيندي.. زينة يعني؟!
تدخل جلال لقطع الأمر برُمّته فألقى ما في يده ووقف فارداً قامته على المائدة ثم قال بنبرة هادرة:
جلال: لدرجادي وسخ ومفيش في يدك ملة؟!
التفت الجميع نحو جلال باستغراب وذهول بينما وقف شاهين هو الآخر وقال ببرود مستفز:
شاهين: إيه الجواز حرام ولا إيه.. انت مالك انت؟!
جلال (بصياح هزّ أرجاء المكان): مالك إيه اشمعنى "موج" بالذات خلصت البنات من الدنيا يعني؟!
غنام (بذهول وعصبية): فيه إيه يا جلال وطي حِسك جرى إيه لـ عقلك؟!
جلال (وهو يشير بأصبعه في وجه شاهين): اسمع.. قدام أبوي والسرايا كلها ورحمة أُمي لو قربت عليها لقتلك بيدي!
هنا أراد شاهين إشعال النار أكثر أمام والده فقال بغمزة حقيرة:
شاهين: ليه بقى إيه بينك وبينها.. اتكلم وخَبّر أبوك لو فيه حاجة اتحمقت عليها إكدة ولا البت دي هي سبب رفضك للجواز من اختها؟!
جلال: السبب ميخصش حد غيري وتنسى إني هسيبك تقربلها!
غنام (بصوت كالصعداء): اخرسوا انتوا الاثنين حد يفهمنا فيه إيه هنا؟!
خضرة (بفضول وحيرة): مالها البت يعني فيه إيه فهمونا؟!
شاهين: والله اسألوه هو أنا سألت عن البنت لما عجبتني وجلال بيه عرف من الحرس إني سألت هددني مقربلهاش.. ولما قلت جواز اهه زي ما انتوا شايفين وسامعين!
غنام (بنبرة حادة ونافذة): انت تعرفها يا جلال انطق!
صمت جلال وانعقد لسانه دون رد لكن مائدة الغداء كانت قد انفضّت بالفعل واشتعلت قلوب الجميع بالفضول الشديد نحو تلك الفتاة التي قلبَت راحة السرايا.
اقترب شاهين من جلال بابتسامة خبيثة ثم قال بهمس مستفز:
شاهين: خير فيه شوية نار طالعين من عينيك ناحيتي.. إيه اللي بينكم والا تكون قربت عليها وخايف؟!
في هذه اللحظة لم يستطع جلال التماسك أمام تلميحات شاهين القذرة فاندفع ونفض يده ليمسك بتلابيب ثوبه وهوى به بقوة فوق مائدة الطعام لتتكسر الأطباق ويبدأ صراعٌ جديدٌ ودموي بين الأخوين!
فزع الجميع وتصارخت النساء قبل أن يهرولن للخلف في ذعر بينما تمزق الصمت بصوت جلال الهادر وهو ينفض شاهين عنه:
جلال: ليه فاكر الناس كلها وسخة زيك ومفيش في عقلهم غير الحريم؟!
صاح غنام بصوت كالسوط كي يفض هذه المعركة لكن الجحيم الذي اشتعل بين الأخوين كان أعتى من أن يطفئه صوت أب. اندفع يونس ووليد وعلي لفصلهما وبعد لحظات من الشد والعراك استطاعوا رد كل منهما بعيدا عن الآخر.
اقترب غنام بخطوات غاضبة من جلال، وجذبه من طوق جلبابه بعنف:
غنام: إيه قلة العقل دي انجنيت؟! تاني مرة تمسك في أخوك الكبير من غير ما تحسبلي حساب ولا تعمل حساب إنه أكبر منك؟!
رد جلال بنبرة مريرة خانقة:
جلال: أيوه.. زي كل مرة أنا اللي غلط والبيت ده كله صح!
نهره غنام ليفرغ شحنة غضبه ثم دفعه للخلف كي لا يفقد السيطرة على أعصابه أكثر.
لكن شاهين الذي طعنت كبرياءه تلك الإهانة أمام زوجاته اندفع مجددا نحو جلال ليرد اعتباره.
اعترض يونس طريقه محاولا تهديته فسدد له شاهين لكمة قوية ليبعده فاشتعل جلال وانثنى مندفعا نحوه من جديد!
هرولت نجاة بينهما والبكاء يسبق خطواتها:
نجاة: ارجع يا جلال خلاص يا شاهين الله يرضى عنكم.. العيال الصغيرة انرعبت ليه كده بس؟! عيب عليكم!
وقع بصر الأخوين على وجوه الأطفال الخائفة فتمالكا أنفسهما قليلا ورجعا للخلف.
انتهزت خضرة الفرصة وقالت بنبرة شامتة:
خضرة: رينا ينتقم منك يا جلال كل شوية تقيد نار في البيت على إخواتك غيران إنهم هيتجوزوا؟! البنات كتير حد قالك تقعد كده.. سيبهم!
غنام: اخرسي انتي وملكيش صالح!
نجاة: متدعيش عليه يا خضرة.. بعيد الشر عنه!
التفت غنام إلى أولاده ونهرهم بصوت يحمل خيبة أمل وغضبا:
غنام: أنا مش مصدق عيال غنام أبو جهدان بيتخانقوا على بت النجار اللي متسواش مداس واحد منكم هي وأبوها حتى؟!
شاهين: أنا مغلطش يا بوي أنا قاصد حلال!
جلال: انت كلك غلط وشيطنة!
حسم غنام الأمر ومشى نظره بينهما:
غنام: عاوز تتجوز يا شاهين البنات كتير نقي اللي تلد عليك واجوزها!
ثم التفت إلى جلال بعينين تنفثان نارا:
غنام: وانت.. باين من همجيتك وقلة أدبك إنك تعرفها ومتقولش له واعمل حسابك انت وهو.. البت دي ماهتدخلش بيتي لو على جثتي ولا ياخدها واحد والتاني عينه فيها مش علي آخر الزمن تفضحوني علشان وحدة زي دي !
شاهين: وأنا موافق يا بوي.. وكلمتك على راسي.
التفتت غنام نحو جلال قائلاً:
غنام: منطقتش يعني؟!
جلال: أقول إيه ما اللي عاوزه شاهين هو اللي بيمشي!
وقف جلال أمام والده وملامحه مشدودة بصخرية وثبات ثم قال بصوت هادئ ومحتدم بركانياً:
جلال: بعد احترامي ليك يا أبوي.. لو عاوز أي حاجة مني هعملها بس كل اللي عاوزه منك دلوك إنك تبعد شاهين عن سكتي.. أنا شكيت كتير وانت اتغاضيت كتير بس أنا ليا طاقة بعدوه عني أحسن!
تطلع إليه والده بعينين ثاقبتين يدرك تماماً أن كيل جلال قد فاض وأن الحرب بين ولديه أوشكت أن تخرج عن السيطرة.
نظر جلال إلى ثيابه التي تلوثت بالطعام ثم دلف للداخل بهدوء قاتل أبدلها وغادر السرايا دون أن يجيب على نداءات نجاة المتكررة.
ــــــــــــــــ**
أسرعت الخادمتان لتنظيف آثار المائدة المحطمة بينما جلست وعد بغل وغيرة تأكل في صدرها بجوار كريمة:
وعد: مين البت دي والله عال.. واحدة ولاد الحاكم بيتخانقوا عليها!
كريمة: ده اللي هامك؟!
وعد: كريمة متبينيش حاجة عكس اللي جوة قلبك.. نار قلبك باينة جوزك أخوه قل كرامته قدامنا عشان عينه من واحدة هو عينه منها.. إيه محستيش بشوية غيرة لو تمثال كان هيحس بلاها كدب!
وقفت وعد ودلفت للداخل دون انتظار رد
بينما جلس غنام يفكر بضيق وعصبية حتى اقتربت منه خضرة:
خضرة: عاجبك عمايل جلال؟!
غنام: مش عاجبني حاجة لا لجلال ولا لشاهين ولا البيت كله.. حتى حشريتك دي معجبانيش!
خضرة: والله ده اللي تقدر عليه يا غنام؟!
التفت إليها غنام بنظرة ثاقبة وقال:
غنام: مش ملاحظة إن شاهين مش قاصد جواز قد ماهو قاصد بس قدامنا يطلع جلال من طوره ويفضح أمره مع البت دي مع إنه كل يوم يتمسخر مع الغوازي وأنا ساكت!
خضرة: وانت دخلت عقله عشان تحكم عليه؟!
غنام: عندي عقل وعينين شايفين اللي حصل.. أنا مش صغير وفزي من قدامي بدل ما أسود ضهريتك قدام الخدم انتي كمان!
ـــــــــــــــــــــــــــــــــــــــــ**
كانت موج تجلس في منزلهم أمام التلفاز مع إخوتها في جو هادئ وعيناها مثبتتان على الشاشة لكن عقلها كان يدور في أحداث كثيرة؛ فهي كثيرة التفكير والشرود في الأيام الأخيرة.
ظهرت في مخيلتها صورة "جلال".. كانت تحاول طرد تلك الأفكار من رأسها بكل طاقتها لكنها كانت تعود رغماً عنها؛ تارة تذكر شهامته وموقفه معها وتارة ترى سخط لسانه وكبرياءه إلى جانب أفعاله المشبوهة التي رأتها بعينيها في السرداب.
ـــــــــــــــــــــــــــــــــــــ**
مر الوقت سريعاً حتى حل المساء ولم يكن جلال قد عاد إلى السرايا بعد.
تهيأ غنام وخضرة ووليد للذهاب إلى منزل العروس الجديدة لطلب يدها فنظرت خضرة نحو نجاة وقالت باستغراب:
خضرة: خير مجهّزتيش يعني عشان تروحي معانا؟!
نجاة (بجفاف): مش رايحة.. البركة فيكم ربنا يسهل أموره.
خضرة: وليه بقى مش جاية؟!
نجاة: راسي وجعاني شوية.
خضرة (برفع حاجب وتهكم): والله ولا عشان جلال معاودش ومرضش يعبرك في التليفون؟!
نجاة (بحدة ومواجهة): اه.. انتي صوح ارتحتي كِده؟!
خضرة (بشماتة): براحتك.. أصل ده ولدي أنا!
نجاة (بأسف وألم): نفسي تملي من الموضوع ده وتسكتي يا خضرة عيالك ربنا يخليكي ليهم إنما جلال ويونس أُمهم فاتتهم صغار وأنا قعدت مكانها.. إيه بقى اللي بيزعلك في كِده؟!
خضرة (بغرور): مين قال إن أنا زعلانة أنا رايحة أخطب لولدي ومحدش قدي النهاردة!
نجاة: طيب.. ربنا يتمم على خير.
استعجلها غنام من الخارج بصوت حاسم فغادروا جميعاً لتتميم أمر الزواج ورؤية العروس القادمة للسرايا.
ـــــــ*
في تلك اللحظة دلف يونس من الباب الخارجي، فاستوقفته نجاة بقلق:
نجاة: يونس عرفت أخوك فين؟!
يونس: اه.. في مطرح شغله متقلقيش عليه.
نجاة: هو زين يعني؟!
جلس يونس بجوارها وابتسم ل يطمئنها:
يونس: اه يا عمتي.. زي الفل ومفيهوش الهوا!
نجاة: مخبراش إيه بيحصل في البيت ده والله.. بقولك إيه هو صوح يعرف البت دي؟!
تبسم يونس وتذكر على الفور ما حدث بين جلال وموج في السوق ثم قال متهرباً:
يونس: معرفش حاجة عن الموضوع ده!
نجاة (بشك وابتسامة): يا واد أمّال ليه اتبسمت يا ملاوع؟!
يونس: له مش كِده.. فرحان وبقول ياريت لو الكلام ده صحيح أهو يتجوز ويجيب اللي ملت عينه ويرتاح!
نجاة (بتنهيدة): فين بس مسمعتش كلام أبوك؟!
يونس: شاهين هو اللي عملها.. أكيد في حاجة يعرفها ناحية البت دي وإلا ليه اتكلم قدام جلال وخرب الدنيا كِده؟!
نجاة: مخبراش.. شاهين مصايبه كتير وأكيد دي واحدة منهم ربنا يستر.
يونس: يارب.. ربنا يهديهم.
ــــــــــــــــــــــــــــ**
في مكان عمل جلال.
جلس جلال قبالة مكتبه والجمود يكسو ملامحه يسوده صمتٌ ثقيل وفي حلقه غصةٌ خانقة من دناءة شاهين.
ورغم أنه وقف في وجهه سابقاً وأخبره بوضوح أن "موج" تخصه كي يبتعد عنها إلا أن حقارة أخيه دفعت تفكيره الخبيث للمساس بفتاة يعلم أنها على صلة بأخيه!
لم يكن هذا الجرح وحده ما يؤرقه؛ بل صدى صوت والده الحاسم وهو يحذره من الاقتراب منها ويقطع بعدم دخولها السرايا للأبد.
ورغم أن فكرة الزواج منها لم تخطر بباله مطلقاً إلا أن الأمر بات ينهك تفكيره ويشعل في صدره ناراً لا يعلم لها سبباً ولا تفسيراً.
قطع شروده دقيق الخطوات حين أقبل هاني يراقبه باهتمام:
هاني (متسائلاً بهدوء): خير.. شارد في إيه؟!
جلال (وهو يلملم شتات أفكاره بجمود): مفيش.. في الشغل. جيت ليه دلوك الليل هيأخر مش تروح لمرتك؟!
هاني (وهو يسحب كرسياً ويجلس): تغيير جو!
جلال (ترتسم على شفتيه ابتسامة ساخرة): تغيير جو قوام كِده مليت؟!
هاني: مش ملل.. بس لازم الواحد يطلع شوية عشان تعاود بشوق!
جلال (بهز رأس وتهكم): اه يا فيلسوف ولما تطلبك وتنكد عليك في التليفون تقولها شغل ضروري مع جلال بيه؟!
هاني (يضحك بنبرة خفيفة): يعني عاوزني أقولها طالع أغير جو عشان أبيت برة؟!
ابتسم جلال خفية ثم عاد يتغشّاه القلق من جديد. يعلم قسوة شاهين وطيشه في استخدام نفوذه؛ فمن تجرأ على إيذاء أخيه وتسبب في مقتل "هدير" لن يتورع عن أذية هذه الفتاة من خلف ظهره فقط ليكسر كبرياءه!
هاني (لاحظ سكونه فقام من مكانه): إيه.. أقوم وأسيبك سارح؟!
جلال (نهر تفكيره والتمس الجدية): بقولك إيه يا هاني.. مش البت اللي اسمها "موج" قلت قدامي قبل كِده إنك تعرفها؟!
هاني: اه.. صاحبة مرتي.
جلال (بنبرة قاطعة): زين.. عاوز رقمها!
هاني (يتوقف مكانه باستغراب ونظرة فاحصة): رقم بنت.. انت مش معقول يا جلال!
جلال (بصرامة وتنبيه): بلاش عقلك يروح لبعيد.. حاجة ضروري!
هاني: له.. أعرف الأول!
جلال (يزفر بضيق): لما واجهت شاهين باللي عمله والبت اللي ماتت وعرف إني جبت الأخبار من المشغل عمل للبت دي مشاكل هي واختها.. وعاوز أكلمها ضروري عشان لو اتكررت ألحقها.
هاني: وعرفت منين إنه عملها مشاكل؟!
جلال: هيكون منين من الحرس!
هاني (بقلة حيلة): ماشي.. ما تبعت حد من الحرس يراقبها ويحميها من بعيد ليه الرقم؟!
جلال (بنظرة حادة وشبه ابتسامة ساخرة): مكملتش كتير مجوز واتعلمت الرغي يا هاني!
هاني (بضحك ): صوح صدقت ماشي هجيبه.. لحسن يحصل حاجة أنا مش قد ذنبها لو شاهين بيه عملها حاجة!
جلال: طيب كلم مرتك وهاته.
هاني: دلوك؟!
جلال: اه.. أمّال مِيتا؟!
هاني: هتسأل وتستفسر ليه ومش ليه!
جلال: مش صاحبتها كِده كِده هتعرف.. قوم كلمها وخلصنا!
هاني (يهز رأسه بشك وهو يبتعد): والله حاسس بحاجة تاني.. مخابرش ليه!
جلال (بتحذير حاسم): روح يا هاني خلص!
ابتعد هاني ليعقد اتصاله بـ "دميانة" وبعد إلحاحٍ وأسئلة كثيرة منها وعدها بالتوضيح فور عودته إلى المنزل.
أخذ الرقم وسجّله ثم عاد ليسلمه لـ جلال حيث جلسا يتحدثان في أمور العمل لدقائق قبل أن يستأذن هاني ويغادر.
أخرج جلال هاتفه أدخل الرقم ثم وضع أصبعه فوق زر الاتصال وتردد لثوانٍ وهو يرمق الساعة على حائط المكتب..
ولأول مرة في حياته تسري في جسده هزة توتر غريبة لم يعتدها من قبل!
عزم جلال أمره وداس على زر الاتصال ثم وضع الهاتف على أذنه ينتظر الرد بقلبٍ يترقب.
ـــــــــــــــــــــــــــــــ**
في الجهة الأخرى كانت موج في غرفتها تتحدث مع خلود قبل النوم في أجواء هادئة حتى اهتز هاتفها بنغمة الاتصال.. رفعت الهاتف تتفحص الرقم الغريب بنظرة حائرة.
خلود (بتساءل): مين دلوك.. أبوي؟!
موج: له.. ده رقم غريب!
خلود: يمكن هو بيرن من عند حد وهو برة؟!
موج (بمنطقية): أبوكي عامل باقة هيرن من عند الناس ليه؟!
انتهى الاتصال دون إجابة فنفخ جلال بضيق وهز رأسه بتهكم وهو ينظر للشاشة:
جلال: والله عال ست الحسن مش بترد من أول اتصال!
عاد جلال الاتصال مرة أخرى فنظرت موج للهاتف بضيق وقالت:
موج: وبعدين بقى مين ده؟!
خلود (بقلق): طيب شوفي مين ليكون أبوي وفيه مشكلة لا قدر الله!
موج: بعد الشر!
ضغطت موج على زر الرد ووضعت الهاتف على أذنها:
موج: ألو؟!
جلال (بنبرة حادة وآمرة): مش رنيت قبل كِده ليه مردتيش؟!
أبعدت موج الهاتف عن أذنها باستغراب شديد من نبرة الصوت والصياح المفاجئ ثم أعادته لتقول بحدة:
موج: مين معاي؟!
جلال: إيه معرفتيش صوت مين؟!
صمتت موج لثوانٍ بركيزة وتفكير ثم طفت على وجهها ابتسامة وسخرت قائلة:
موج: اااااه بقى انت يا بَجَم قال يعني لما تغير صوتك وتخليه نَعير هتدخل عليا يعني؟!
جلال (انعقد حاجباه بذهول وغضب): بتقولي إيه يا بت انتي؟!
موج: بترن من عند مين يا واكل أبوك؟!
صمت جلال قليلاً وسرى الشك في عقله؛ فربما تكون الفتاة على علاقة بأحدهم وتظنه هو قرر مجاراتها ليفهم رغم أن الأسلوب الذي تتحدث به لا يمكن أن يكون لحبيب أبداً:
جلال: ده رقم صاحبي.
موج (بتهكم وسخرية): مش عيب ترن من عند صحابك إخص على الرجالة المهم.. عاوز إيه؟!
جلال: هو لازم أعوز؟!
موج (بضيق وجرأة): مالك ياد اعدل نفسك أحسنلك انت شارب حاجة ولا إيه؟!
شعَر جلال بطفش وضيق شديد من طريقتها وصمت تماماً دون إجابة فحثته موج بنفاذ صبر:
موج: حليم انت يا بني عاوز إيه اخلص لو عاوز خالتك فهي نامت وإحنا هانتخمد!
أغلق جلال الهاتف في وجهها فوراً ووضعه جانباً وهو يزفر بضيق. أخذ يتذكر اسم "حليم" فلم يخطر بباله شيء في البداية لكن استوقفته جملتها: "خالتك نامت"!
في تلك اللحظة تذكر يوم زفاف هاني والشاب الذي جاء يسأل عنه حين ذكرت وقتها أنه ابن خالتها وأخوها بالرضاعة.
ارتاح قليلاً وزال شكّه لكنه عاد يحدث نفسه باستنكار:
جلال: بتفكر حواليها ليه له.. ولسّاك فاكر من يوم جواز هاني المفروض أبعد خالص.. بترن ليه أصلاً؟! قال حماية.. متأكد إنها حماية بس؟!
ــــــــــــــــــــــــــــــــ**
وفي الجانب الآخر..
خلود (باستغراب): حليم ماله؟!
موج: مخبراش قفل بس الصوت مش حليم.. أنا قلت بيشتغلني بس كيف هيغير صوته قوي كِده أكيد كان هيبان شوية!
خلود: أمّال مين يعني؟!
موج: مش عارفة.. الصبح أرن على رقمه وأتأكد كان هو ولا له.
خلود: ماشي يمكن حد بيعاكس وخلاص.. نامي تصبحي على خير.
أغلقت خلود الأضواء واعتدلت لتغفو بينما تسطحت موج على فراشها والتفكير يأكل رأسها:
موج (في سرها): غبية مش معقول يكون حليم أبداً..
أتتها فكرة مفاجئة فأمسكت الهاتف على الفور وسجلت الرقم لتتحقق إن كان صاحبه يستخدم تطبيق "واتساب".
قامت بالبحث عن الرقم وما هي إلا لحظات حتى ظهر الحساب أمامها.. فتحت صورة الملف الشخصي وحينها صعقت وجلست في الظلام بفزع وصياح مكتوم:
موج: يالااااهوي!
انتفضت خلود برعب وهرعت لتشعل النور بسرعة:
خلود (بذعر): مالك في إيه؟!
موج (بصدمة وهي تضع يدها على رأسها): يامري هو.. والله هو مين ده اللي هيقدر يحط صورته أساساً
خلود.. أنا شتمت اللي اتصل ده بإيه فكريني!
خلود (بنعاس وهي تفرك عينيها): مالك بس؟!
موج: قولي اللي قلته بسرعة!
خلود: قلتي له يا بَجَم.. ويا واكل أبوكِ.. ومش عارف إيه تاني!
موج (بانتحاب خفيف): بس كده كفاية.. ده أنا ودّعت!
خلود: مالك طيب جنيتي فهميني مين ده؟!
موج: مليش.. نامي يا خلود نامي آه ياوقعتك ياموج..
خلود: شكلك انجنيتي وأنا عندي مدرسة الصبح.. متزغفنيش تاني حرام عليكي!
عادت خلود لتتسطح وتغفو فوراً بينما بقيت موج جالسة في السراير تفتح الصورة مرة أخرى وتهمس بخوف وذهول:
موج (في سرها): وصل لرقمي كيف وعاوز مني إيه
والله حسيت إن الصوت المعفن ده سمعته قبل كده.. بس التليفون والتخريط غيّروه.. أعمل عبيطة ومكنش حاجة حصلت!
ظلت تحدث نفسها بمرارة وقلق ينهش قلبها لوقت طويل حتى غلبتها النوم وغفت رويداً رويداً.
ـــــــــــــــــــــــــــــــــــ**
في صباح اليوم التالي
وقت مغادرة موج للمنزل خرجت وعيناها تترقبان الشارع بحذر تلتفت يميناً ويساراً أملاً في العثور على أي وسيلة تقلها إلى عملها بسرعة كي تتجنب مصادفة أي شخص وخاصة "جلال".
لكن الشوارع كانت خالية فاضطرت للسير بخطوات حثيثة وسريعة حتى وصلت إلى العمل.
طرقت الباب بشدة واندفعت للداخل وهي تلتقط أنفاسها بصعوبة.
أسرعت زينب وتملّكها الغضب :
زينب (بصدمة): خلي بالك الباب قزاز لو انكسر وحياة سعدية لتدفعي تمنه!
موج (وهي تمسك صدرها): لمؤاخذة يا خالة.. منتبهتش!
زينب (بشك وهي تتفحص وجهها): مالك انتي زينة جاية على ملا وشك كِده ليه؟!
موج (بتهرب وتبرير سريع): له مفيش.. أبوي عنده شغل برة الدكان وقولت ألحق أجي قبل ما أصادفه في السكة!
زينب (بنبرة أهدأ): اه.. طيب اقعدي خدي نفسك الأول.
جلست موج على الكرسي تحاول التهدئة من روعها واستعادة أنفاسها.
ـــــــــــــــــــــــــــــــــ**
وفي السرايا..
كان جلال قد عاد للتو بعد ليلة طويلة خارج البيت فاستقبلته نجاة فور دخوله من الباب الخارجي بنظرات ملؤها القلق:
نجاة: خير يا جلال كنت فين كل ده؟!
جلال (بنبرة خافية وتعب): مفيش يا عمتي.. في الشغل.
نجاة (بأتَب وعتاب حنون): أخص عليك متردش على عمتك تطمنها عليك؟!
جلال (وهو يمسح على وجهه بجهد): معلهش يا عمتي.. كنت ضايق شوية.
نجاة (ترفع يدها لوجهه باهتمام): طيب ودلوك عامل إيه ليه وشك وعنيك دبلانين كِده مش نايم إياك؟!
جلال: له.. هادخل أنام دلوك.
نجاة: كلت ولا لسه أجهزلك لقمة؟!
جلال: كلت الحمد لله.
تركها ودلف إلى غرفته بخطوات ثقيلة وما إن استلقى على فراشه حتى غرق في نوم عميق دون وعي من شدة التعب والسهر الذي أضنى جسده وعقله.
خرجت كريمة من الداخل وجلست بجوار وعد فنظرت إليها وعد باستغراب وسألتها:
وعد: كريمة.. شاهين عامل إيه؟!
كريمة (بجفاف): إشعرفني مش بايت عندك مسألتهوش ليه؟!
وعد (بدهشة وتفاجؤ): عند مين مبيتش عندي مش كان عندك انتي؟!
كريمة (بهدوء بارد): له.. مطلعش عندي خالص.
وعد (بانزعاج وشك): غريب بايت فين يعني والصبح كان بيفطر عادي وطلع قبل ما ألحق أكلمه!
كريمة: أكيد بايت تحت عشان محدش يسأله.. وانتي بالذات!
وعد (بزفرة ضيق ومرارة): عيشة تقصر العمر والله!
تبسمت كريمة بتهكم دون أن ترد وواصلت صمتها وهي تتابع ضيق وعد.
ـــــــــــــــــــــــــــــــ**
مر الوقت على الجميع بشكل طبيعي حتى على موج؛ بدأ الأمر ينزاح عن تفكيرها قليلاً وتستعيد جوها وطبيعتها.
انتهى عملها وخرجت مغادرة وهي تتلفت حولها بحذر كان الجو هادئاً تماماً فأكملت سيرها نحو المنزل.
أثناء دخولها إلى أحد الشوارع استوقفها صوت قاطع :
جلال: آخر حاجة كنت اتخيلها.. إني أقف كل ده أستنى واحدة زيك!
تلفتت موج بسرعة وبرعب لتكتشف مصدر الصوت حتى خرج جلال بصلابته وهيئته المهيبة من خلف أحد الأسوار.
موج (وهي تحاول التماسك): نعم خير.. فيه حاجة؟!
جلال (بجمود ونظرة حادة): لما ريس الحرس وولد حاكم الجزيرة جلال بيه جهدان يرن عليكي.. المفروض تعملي إيه؟!
موج (بتلعثم وتنحنح): يعني إيه ولا فاهمة أي حاجة خاااالص!
جلال (بابتسامة ساخرة): والله؟!
موج (بحدة مصنعة): لو حضرتك عاوز حاجة قول خير؟!
جلال: يعني معرفتيش إن الرقم اللي رن عليكي كان أنا؟!
موج (بتصنع الصدمة والشهول): رقم رقم إيه.. يابوي معقول ده أنا فكرته حليم!
جلال (بنبرة قاطعة تحذيرية): روحي.. ولما أكلمك تردي زين!
موج: حاضر.. بس رنيـ...
التفت جلال وغادر المكان ودون أن ينتظر سماع بقية حديثها.
تنهدت موج بقوة ومالت بجسدها للأمام تلتقط أنفاسها المحتبسة بقلق شديد ثم اعتدلت وأصلحت ثيابها وهي ترمقه من البعيد:
موج (بتهكم): يخرب بيتك ويقولي شغاله مع المطاريد أمّال هو إيه يعني؟!
أكملت سيرها بخطوات سريعة وهي تردد حديثه ونبرة غروره بتقليد ساخر:
موج: ولد الحاكم وريس الحرس جلال جهدان.. أيوه يعني برضه معرفتش رن ليه؟!
ثم رفعت حاجبها بغرور خفيف وابتسامة ثقة:
موج: أكيد معجب!
