رواية ليتني واجهتك الجزء الثاني الفصل الثاني 2

دخلت بازمه وقلق وتفكير وخوف شنو راح يصير بحالي وحال الطفل الي ب بطني ضليت يوم كامل افكر 

ثاني يوم الصبح بعد تفكير طويل قررت اروح على صديق عمري واطلب من عندو المساعده 

ركبت بل سياره هم اهلي عارضو اطلع بس انطيتهم وعد ماسوي شي ولاراح التقي ب علي 

رحت على المستشفى صهيب يداوم بمستشفى اهلي بين مايجي التعين مالنا 

دخلت لمستشفى واتصلت بصهيب ودلاني على مكانو ورحت عليه

صهيب؛؛ هلا سدوره شلونج 

سدره؛؛ بخير صهيب الحمدالله وانت 

صهيب؛: والله على الكريم 

سدره؛: شنو رايك تمشى اذا ماعندك شي 

صهيب؛؛ اذا ماعندج شي انتظريني نص ساعه عادي اشوف المرضه 

سدره!؛ مامشكله اجي معاك 

صهيب؛: يالا خيتي امشي 

شاف المرضه صهيب وبعدها كمل واني امشي معا  كالي 

صهيب؛؛ اي سدوره احجيلي وجهج مايبشر بخير 

سدره؛؛ انت احسك ضايج 

صهيب؛؛ اني اسكتي وخليها من يوم الي داومت وطيف لؤي الله يرحمو معايا جان دائما يكولي من نتخرج انقدم على مستشفى اهلي  اني وانت سوى وهسا لالؤي موجود ولانتي ولاجنات طشرنا الوكت سدره احس لؤي من راح اخذ كلشي حلو معا 

دنك راسو وعيونو مغروكه

صهيب؛المهم احجيلي وضعج 

سدره؛؛ لؤي لو عايش مصار بينا كل هذا الشي ياريت لو انكطعت ايد اخويا ولا صار الي صار 

صهيب؛: لاتنفع الريت ولا لو الي راح راح بعد واخذ من عمرنا ياسدره هيجي رب العالمين كتب على لؤي وجنات واحد جوات التراب والثانيه بل مصح وشنو بعد كاتب علينه محد يعرف 

فجئه وكفت وصرت كدامو صفنتو بوجه صهيب 

صهيب؛: احجي هليوم انتي مو طبيعيه 

سدره؛؛ اني حامل 

صفن بوجهي ورجع كال 

صهيب؛: لاحول ولا قوة الا بالله 

سدره؛: اريدك اتساعدني

صهيب؛:بشنو اساعدج مافتهمت؟ 

سدره... اكو علاج ماينكتب الى بوصفة طبيب تعرفو كلش زين اذا اخذو راح يسوي اسقاط عندي اريدك تكتبلي هو وتختم على الوصفه

صهيب.... انتي مخبله هاي نفس تقتلين نفس 

كعدت على الكرسي وخليت ايدي ع وجهي وصرت ابجي 

سدره؛: عجل اتريد انحرم من عندو مثل ماراح انحرم من ويلادي 

صهيب؛: الف طريقه تلكين اساعدج بيها بس تقتلين نفس هينا لاانتي اختي ولااني اخوج مستحيل هذا الشي فكري بغير حل 

سدره ؛: خايفه علي ياخذو مني  بس اجيبو 

صهيب:: سدره انتي اتخليتي عن علي ب سهوله ليش هيجي اني اعرف اختي تموت وماتخلى عن حب حياتها 

سدره؛؛ جنت مجبورة صهيب مجبورة

صهيب؛: امسحي دموعج واستهدي بل رحمن واتراجعي عن قرار الطلاك وخلي مختار ياخذ حكمو وبيت عمتج مجبورين ينطون فلوس لاهل جنات بس حياتج لادمريها سدره 

سدره؛؛ ماكدر صهيب ماكدر انت ماتعرف اذا مختار انحكم امي شنو راح يصير بحالها وبعدين بيت عمتي اذا انطو فلوس لاهل جنات لازم يصفون ع الحديده 

صهيب؛؛ وانتي وعلي 

سدره؛؛ النا رب الي ماينسنا حشالله 

صهيب؛؛ مادري اش اكولج سدره بس فكري بموضوع جنينج انتي راضيه اتنزلي يجي من كلبج 

سدره؛: ماكو ام بل دنيا تتنازل عن ابنها بكل سهوله لوحتى جان نطفه بعدو لو ما مجبوره اتخيل صهيب راح احملو واتعب بي ومن اجيبو راح يروح من عندي بكل سهوله هذاك الوكت اتمنى لو نزلتو الف مره ولا يروح مني 

صهيب؛: بس هذا الشي حرام واكبر حرام 

اندريت عليه واني ابجي واشر ب يدي ع كلبي 

سدره؛؛ لعد مو حررام مو حرام ياخذون اطفالي مني اني شنو سويت لعمي حتي هيجي يسوي بيا شو جنت احبو مثل ماحب ابويا وهيجي بل اخير يسوي معايا هذا الشي 

صهيب؛: اهدي لاتعصبين 

ضربت ع رجلي واحجي 

سدره؛؛ اخخخ ياصهيب اخخ كلبي نار شلون راح يروحون مني شلون فهمني

جابلي بطل ماي وانطني هو شربت وهديت اشويه سكتنا اشويه نحن الاثنين وبعدها 

صهيب ؛: شنو الحل هسا 

سدره؛؛ اني فكرت اذا ماساعدتني انزل الجنين اسافر خارج العراق 

صهيب؛: وهاي شنوو انوب 

سدره؛: لو تساعدني واسافر خارج العراق لو تسوي روحك اطرش اذا سمعت اني مفقوده 

صهيب؛؛ لا طبعا ماعوفج وحدج بس لازم انفكر هذا الشي مو ب يوم وليله هذا قرار صعب اشويه سدره وويلادج 

سدره؛: اريد اروح صهيب اريد اعوف كلشي ورى ظهري وامشي اني تعبت اريد اغير حياتي اريد اعيش مع ابني الي جاي او يمكن بنتي ماعرف بس لازم اروح 

قررت اروح اخلص من عبدالله واغير حياتي واحافظ على ابني الي ماكدرت احافظ ع ويلادي الباقين التفت عليه صهيب حك وجهو بحركه سريعه وكالي 

صهيب؛؛ سافري لتركيا!!!!! 

سدره؛؛ لتركيا!!! 

صهيب؛؛ اي هناك احسن الج وهم عندي اقربنا عايش هناك وعندو شقق اثنين وزوجتو تشتغل بمحل حلويات تكدرين تشتغلين معاها 

سدره؛؛ ماشي خوش فكره 

صهيب؛؛ ومن ناحية الفلوس لاتشتغلين بالج 

سدره؛؛ اني عندي صهيب راح ابيع ذهبي   واكدر اسافر واعيش بي 

سكت وبعدين كالي 

صهيب؛؛ انطني ذهبج وانطيج ......

سدره؛: بس هذا المبلغ جبير وماتوقع ذهبي يصل لهذا المبلغ صح هو جثير بس مو لهاي الدرجه 

صهيب؛: معليج اذا الفلوس اقل من حقها سامحيني واني اذا اكثر اني مسامحج 

سدره؛: ماشي بس صهيب 

صهيب؛؛لاتخافين اني اخوج سدره 

سدره؛: والنعم منك ماتقصر يااخويا

قررنا شلون انسافر بس صهيب فكر انسافر من مطار اربيل لان اذا من مطار الموصل راح عمر بكل سهوله يشوف بل كاميرات بس مطار اربيل زحمه وماتوقع راح يجي ب بالهم

حضرت كلشي وحضرت ذهبي اشكد ماجنت ضايجه حتى مافكرت اسال صهيب شنو يسوي ب ذهبي 

بعد ماخذو ويلادي مني روحي اتكطعت احس متت بعدهم ليلة طلاقي بل ليل حضنت ماري وحسوني وكمت احجي معاهم 

حسوني يروحي انت ماتفهم على حجي لاانت ولاختك بس راح اترك هذا الكلام الكم بلكي اذا يوم من الايام رجعت راح كلبكم يحن عليه وتسامحوني اني متاكده علي ماراح يشوه صورتي كدامكم ابوكم حنون بس اني لازم  اترك كلشي ومن هذا الكلشي انتو سامحوني ياماما الله يخليكم يمكن ماعرف اشكد وراح اشوفكم يمكن اشوفكم 

وكل واحد معا ابنو او بل كليه ماعرف بس لاتنسوني يروحي والله اني احبكم مو هين عليه  اتركم وامشي بس اكو شي هذا دمر حياتنا وراح يدمرها بل زايد لازم انهزم  من عندو رب العالمين يعرف ودا يشوف ويجي يوم وينتقم بس اني زحمه عليه اوجه ابوكم بل حقيقه زحمه عليه اكوله اخوك يتحارش بيا ابوكم من خسر عمكم صار عبدالله صديقو واخو اكثر من قبل وهو الي بي مكفي زحمه ياماما وبعدين لو حتى واجهت يضل الي قتل عمكم هو خالكم يعني ماراح يتصلح شي بس اجي اكسر ظهر ابوكم واروح مستحيل اسوي هذا الشي وشي الثاني والي اهم اخوكم اني راح انحرم منكم بس ماريد انحرم من اخوكم علي اذا عرف بيا حامل مستحيل يطلكني وراح يرجعني غصب عني وهذاك الوكت شنو راح يصير يدمر حياتنا راح اتصيرون ايتام وماراح اخلص من عبدالله راح اروح واتمنى اتسامحوني اريدك حسوني اتصير مثل بابا اعلامي وانتي يروحي ماري اتصيرين دكتوره مثلي اني ماراح اكدر اكمل مشواري يمكن صعبه بس اريدج انت اتكملين حلمي احبكم ياماما والله احبكم حضنتهم وابجي وابوس بيهم 

صار يوم السفر  اتصل بيا صهيب وكتلو بس ابدل كصيت شعري حتي اغير حياتي لان البنت لو رادت اتغير حياتها كصت شعرها  وحسيت ماضل داعي شعري يضل طويل وعلي الي جان يمشطه بيده لان يموت على شعري واول من حببنا بعض ماكصيت شعري لان هو مانعني صهيب ماكدر يفوت بل فرع ب سبب الكاميرات خاف احد يشوفنا 

شلت جنطتي ومشيت على كيفي انزل من الدرج حتى لاحد يحس عليه ماخذت ملابسي كلها كلت من اصل هناك اشتري  الي محتاجتهم اخذت  قطعه من ملابس حسوني وقطعه من ماري معايا 

ضليت ثلاث ايام ابجي الليل كلو جان صدري يدر على ابني اعرف بي جوعان حسوني مايحب الممه شلون دا يكدر من دوني 

طلعت امشي بل فرع والبرد يكص كص والدنيا مطر وصلت لراس الفرع لكيت سياره صهيب ركبت بل سياره ومشينا جان كل اشويه يدحك عليه يخاف لاكن اتراجع حتي يرجعني كل اشويه يسالني 

صهيب؛: شنو رايج نرجع سدره 

سدره؛: صهههيب والله العظيم اذا سالتني هلمره راح انزل من السياره واروح ب تكسي اني قررت هاي هي مااتراجع عن قراري 

سكت ماحجى شي اشويه والتفت عليه 

سدره؛؛ اسفه مو قصدي اصيح عليك بس انت دا اتوترني 

ضربني كمخه ع راسي 

صهيب؛: ماكو بينا اعتذار ثول 

سدره!؛هههه 

صهيب؛: شنو رايج نزل ب مطعم نتريك وبعدين 

سدره؛؛ اني مو جوعانه 

صهيب؛:مو الج لابن اختي انتي محد عزمج 

سدره؛ههه اوكي 

وصلنا اربيل نزلنا بمطعم كباب اتريكنا كباب وطلعنا بعدها لمطار والطريق كله صهيب ينصحني شنو اسوي ماختلط مع احد غير اقربهم وصلنا المطار كعدنا صهيب طلع جنطه سوده وخلها بحضني واني هم انطيتو الذهب 

صار وكت القلاع كمت على حييلي 

سدره؛: صهيب ماراح انسى كل  الي سويتو اشكرك انت اخويا مابس زميلي 

صهيب؛: صح مايهون عليه اعوفج اتروحين لان خسرت لؤي وجنات وانتي راح هم اتروحين المهم الحمدالله المهم انتي مقنتعه بقرارج سدره؟ 

سدره؛؛ اي مقتنع وامانه عليك ياصهيب لاتنكطع عن ويلادي ولا علي لاتعوفهم ابد ترى علي مكسور والي زاد كسرتو غدري لاتحجي الي تعرفو عني لاحد حتى لاماني خلي لاحد مايجي يوم رب العالمين هو يكشف كلشي 

صهيب؛: ولايهمج اني طالع من المطار وماشفت شي ولاسمعت 

سدره؛؛ شكرا صهيب 

صهيب؛: نضل على تواصل ان شاء الله ومن تصلين سوي صفحه باسم ولد اذا اتريدين اتسوين على مود اماني تعرفيها من تشوف صفحة بنت عندي تضل تسالني منو هاي 

سدره؛:  هههه ماشي مع السلامه ابو لؤي 

كلتها ودنكت دموعي تنزل طبطب على كتفي 

صهيب؛: الله وياج اختي ربي يسهلج وينور طريقج انت تستاهلين كل خير 

باسني من راسي ومشيت  واني امسح دموعي ركبت بل طياره واني مودعه ارض وسماء العراق صعبه عليه جانت بس احيانا الحياة تطلب الهزيمه عفت كلشي ورى ظهري ومشيت عفت ويلادي واهلي واخخ حب حياتي وسنيني 

سافرت حتى اعيش بامان لان تعبت اعرف ماراح اعيش مرتاحه بس اريد امان

سافرت حتى احمي علي وامي واخويا 

سافرت حتى اخلص من عبدالله الي كضه عمرو

 يلحك على رزق غيرو

 سافرت اريد اغير حياتي ماعرف اذا قراري جان صح او غلط بس اني مقنتع اعيش لطفل الي ب بطني ولنفسي 

وصلت لمطار استطنبول بعد تعب طويل  اني اعرف اللغه التركيا جنت بل عطله الصيف اجيب قاموس واتعلم من عندو من جنت صغيره احب اتعلم لغات اني واماني  وكدرت اتعلم اللغه الانكليزيه والتركيه وفارسي وروسي اشويه كم كلمه

سالت على  تلفون دلوني طلعت الرقم من جنطتي واتصلت بل شخص الي كالي عليه صهيب اسمو ابو زيد 

الو السلام عليكم 

وعليكم السلام منو 

انت ابو زيد حضرتك 

اي نعم اتفضلي 

اني من طرف دكتور صهيب 

اهلا وسهلا دكتوره سدره اني بل طريق انتظرني 

ماشي اخويا انتظرك سويت زحمه عليك 

لا ادلل اختي 

سديت من عندو وكعدت انتظرو  اني ماعرف شكلو ولاهو يعرف شكلي لهذا بل مطار من دخل شايل ورقه بيضه مكتوب عليها اسمي عرفت كبل 

رحت امشي اتقدم 

مرحبا استاذ

اهلا وسهلا 

اني سدره 

ياهلا دكتوره اعذريني اتاخرت عليج 

لا عادي اخويا اني تعبتك معايا 

ولا ولو تفضلي مشيت معا واخذ الجنطه من ايدي وجان معا ويلاد اثنين وبنت مشاء الله حلوين كعدت بل سياره وهو ساق بينا وصلنا عماره خطيه اشكد جانت نفسو طيبه 

اتفضلي اختي وصلنا 

هزيت براسي متشكره من عندو ردت اخذ الجنطه ماقبل اخذ الجنطه وصعد كدامي والاطفال سبقو ابوهم 

وصلنا لشقتهم  طلع المفتاح وفتح الباب طلعت مرتو كبل استقبلتنا 

ام زيد؛: هلا وسهلا دكتوره اتفضلي نورتي 

سدره؛: شكرا حبيبي نورج 

نزعت الحذاء بل باب ودخلت باستني واخذتني لصاله كعدنا بيهم جابتلي ماي 

ام زيد؛: ااتفضلي حبيبتي الحمدالله على سلامتج

سدره؛: الله يسلمج عيوني سويت زحمه عليكم 

ام زيد؛: لايمعوده كولي يالله حبيبتي زحمه شنو اصلا ماصدكت من صهيب كالي زميلتي راح تسافر ليمكم 

على اقل يصير عندي جيران عراقيين هينا اغلبهم اتراك ومن سوريا

سدره!؛ ههه الحمدالله 

دخلو ويلاد بدلو وغسلو وابو البيت نفس الشي وكعدو على ميز الطعام 

ام زيد ؛: اتفضلي حبيبي اكعدي معانا 

ابو زيد؛: كومي خيتي لاتخجلين اني اخوج وام زيد اختج 

سدره؛؛ شكرا الكم 

كمت غسلت وكعدت معاهم جنت بل كوه اكل الكمه بس ردت اخلص حتى اروح لشقتي ارتاح

كملنا الغده وشلت المواعين مع ام زيد ماقبلت بس اني اصريت سوت جاي وطلبت من ويلادها يروحون ينامون اشويه 

شربت الجاي وطلبت منهم اروح لشقه انتفقت معاهم على الايجار اول شهرين كالو ماناخذ بل بدايه ماقبلو ياخذون ابد بس اني اصريت وافقو كام ابو زيد جا معايا 

جانت الشقه مقابيلهم فتحت الباب

هاي شقتي من يوم وراح صارت شقتج اخذي راحتج بيها دكتوره 

شكرا الك تعبتك معايا 

تدللين محتاجه شي ثاني 

سلامتك 

اتشكرت ودخلت لشقتي جانت عباره عن غرفتين وصاله صغيره ومطبخ صغير جنت تعبانه من السفر حييل شفت الشقه جانت اثاثها كامل وحتى نظيفه بس اشويه يرادلها بعد شغل.....!!

نمت واني حاضنه صوره ويلادي وعلي كعدت البيت ضلمه خفت لان الدنيا شته والضؤ مطفي 

سحبت موبايلي شغلت الفلاش وكمت امشي على سريع اشغل الضؤ متت خوف البيت بارد حييل شغلت الصوبه وكعدت يمها وغطيت روحي ب بطانيه 

ضليت ادفى كمت اشوف المطبخ بلكي الكي بي حليب او جاي شي دافي اشرب فتحت الثلاجه لكيتها مليانه مسواكه فتحت الكاونتر مليان مونه خطيه هذوله النااس مامخلين شي ماجايبين اشكد خجلت

حميت ماي وجبت كوب وسويت حليب واخذت موزه ورحت  كعدت يم الصوبه فتحت التلفزيون وكعدت ادحك اندك الباب 

كمت دحكت من العين السحريه شفت ام زيد  فتحتلها الباب ورحبت بيها وطلبت منها تفضل ودخلت 

ام زيد ؛؛ شلون البيت حبيتي 

سدره؛؛ اي مشاء الله حييل حلوه واني خجلانه منكم حييل 

ام زيد؛: ليش حبي الخجل 

سدره؛؛ ماكافي ماراح تاخذون مني ايجار شهرين وهلمره منظفين الشقه وامخلين بيها كلشي

ام زيد؛:بعد. لاتكولين هيجي نزعل منج اني وابو زيد بعدين نحنا اهل وصهيب حجانا جثير عليج والله يعوضج خير يارب 

سدره؛: تسلمين حبيبتي ربي يرزقكم وين مارحتو 

ام زيد؛: تعالي اكولج ماريدج اتصيحيلي ام زيد ماريد اتكبريني اسمي زينه 

سدره؛؛ عاشت الاسامي زيونه تدللين 

ام زيد؛؛ هههه اي هيجي هسا صرنا صديقات 

سدره؛؛ ههه قبان قلبج 

زينه؛:اني جيت اكولج حياتي اني عند محل جبير لحلويات واريد تساعديني بي لان ماراح اخليج تكعدين  بل شقه وحدج لو بس تجين هيجي تكعدين يمي وادحكين عليه

سدره؛؛ ههه تدللين  من باجر انزل معاج 

زينه؛؛ خوش حبيبتي شنو هل النشاط الحلو 

سدره؛: هههههه

زينه؛: هههه صح حبيبتي اتصلنا ب صهيب وخابرنا انتي وصلتي 

سدره؛: شكرا الج حبيبتي تعبتكم 

زينه؛؛ تدللين 

اترخصت وراحت واني هم رحت اتوضيت وصليت المغرب ورجعت ادحك على التلفزيون واخذتني ذكرياتي لعراق لحسوني وماري وبجيت حضنت روحي 

وبجيت بحركه قويه من كثر مابجيت صار

 كلبي يوجعني واضرب على كلبي اني ليش قررت انهزم ليش عفت ويلادي شنو صار بحالهم واهلي. وعلي هسا اكيد عرف اني انهزمت 

هلكت من البجي كمت غسلت وجهي ورحت لغرفه انام حتى ماعندي نفس اكل ضليت متمدده بفراشي واصفن ماكدرت انام طلعت كتاب وكعدت اقرأ 

قريت جثيرر دحكت على ساعه بل 12بل ليل حسيت ب جوع كمت رحت لثلاجه طلعت خبز وجبن سويت لفه وفرشت اسناني واتوضيت وصليت ودعيت ربي يحفظ ويلادي من كل مكروه

نمت وكعدت ثاني يوم الصبح اتريكت ودكت عليه الباب زينه طلعت عليها صبحت وقفلت الشقه وبعدها نزلنا طلبت منها قبل مانفتح المحل اروح اشتري شريحه خطيه ماكالت شي اخذتني واشتريت شريحه وفعلت نت وسويت صفحه ولد مثل ماكالي صهيب وسويت بحث عن صفحتو وطلعت ودزيتو طلب صداقه    

انطيت رقمي لزينه واني اخذت رقمها وبعدها سديت الموبايل وبدت زينه اتعرفني عن العاملات حبيت حييل شغلهم ويتفنون بل حلويات 

جانت هي محاسبه وهي مديره المحل خلتني اني محاسبه وكالت اشوكت ماتحبين اتسوين حلويات فوتو سوي 

كعدت على ميز والكرسي وكدامي الحاسبه واستقبل اتصلات واحجز واخذ العنوان حبيبت الشغل اول بدايه صح تعبت بس حلو قبل مايطلعون ويلادها من المدرسه وزوجها من العمل تقريبا ب ساعه  كالت اروح اسوي غده 

زينه ؛: اتحبين ترجعين معايا سدره 

سدره؛: لا خليني مرتاحه هينا 

زينه؛: ماشي حبيبتي براحتج 

شفت من اذان الظهر كلها راح اتوضت ودخلت لغرفه صغيره مسويتها مسجد حبيبت هذا الشي حييل لبسو حجاب الصلاة وكامو يصلون مع العلم جان بعض منهم سافرات اني هم رحت توضيت وصليت جيت فتحت الجهاز لكيت صهيب موافق على طلب ودازلي هاي العلامه ؟

دزيتو رساله وهو شافها كبل 

سدره..... عادي نتعرف 

صهيب.... اذا بنت اتعرف ليش لا بس اخاف من مرتي تكتلني بعدين 

سدره....ههههههه ضحكتني والله 

صهيب.... دوم يارب هاي الضحكه الحلوه على هذا الوجه الحلو كوليلي شخبار المكان الشغل 

المكان حلو حبيتو والشغل هم 

بل عافيه عليج عيني

صهيب 

اي اختي 

ماشفت ماري وحسوني وعلي 

شفت علي 

فتحت عيوني كبل اريد اكتب ايدي رجفت 

يمته

البارحه بل ليل جاني هو وعمر لبيت سالو اماني وحلفوها اذا جانت تعرف وين مكانج 

شلون وضعهم 

زينين مابيهم شي بس ضايجين 

عفيه صهيب لاجذب عليه 

قابل اكولج كاعدين يطلمون عليج والله ضايجين ويريدون يعرفون وين صرتي بس همه عرفو من شعرج انتي عفتي كلشي تعالي اكولج انتي مخبله كصيتي شعرج 

احسن 

ولي خبله شعرج اشطول جان 

ماريدو بعد كرهتو الي جان يتخبل على شعري راح ضلت علي خلي يروح مثل ماحبيبو راح 

المهم انتي مرتاحه 

نوع ما

ان شاء الله اتصير مرتاحه 

صهيب مامريت على امي 

رحت ع اهلج وامج اشويه وضعها بس عمر دا يحجي معاها ويكولها مختار راح يطلع من السجن وسدره راح ترجع اكيد 

حجيت اشويه مع صهيب وبعدها سلم وراح 

استمريت على شغلي وحياتي نوع ما استقرت 

جان يخلص الدوام بل سبعه المغرب جان يجي ابو زيد يكعد مكاني مايخلصون الى 12بل ليل 

جان الراتب زين انتفقت معاها تكطعت من الراتب مالي ايجار الشقه مثل مانتفقنا اول شهرين ماقبلو ياخذون 

جان   مرات الصبح تاخذني زينه ونطلع نفتر بل سوك او تاخذني لطبيبه فحصت وكالت زين الجنين 

رحنا على جامع السلطان اخذتني علي زينه دخلت وصليت بي بجيت بحركه ودعيت ربي يطفي نار كلبي فراكي على ويلادي موتني مرات اكول راح ارجع وخلي شنو يصير يصير ومرات اتراجع 

زينه جانت حييل خوش بنت وحبابه جنت لو اني اروح يمها لو هي تجي يمي الي عرفتو  منهم ابو زيد يصير ابن خال ام صهيب بس علاقتهم قويه

مرت شهر بعد شهر وكدرت اتعود على فراك بس طيف حسوني وماري ابد مايفاركني كل اشويه اكول مع نفسي هسا اكلو شربو ياترى اكيد ماري اتنام بحضن علي ياترى علي يغطيها لان هي تكشف جثير  حسوني حياتي  شلون صار هسا جنت اخلي صهيب يروح عليهم كل بين فتره ياخذلهم صور ويدزلي

دخلت بل اربع اشهر من حملي جنت شايله هم من راح اجيب شلون لازم علي يجي حتى يسجل اسمو بعد تفكير طويل اخذت قراري اماني لازم تعرف اني وين واسجل ابني باسم صهيب واماني 

فتحت هذا الموضوع مع صهيب بل بدايه تردد بس بعدين وافق وكالي هم راح مااحجي لاماني وين مكانج على ما تولدين بخير وسلامه 

اخذت سونر وبين الجنس ولد حيييل فرحت ب يومها صليت ركعتين وحمدت ربي وشكرتو لان راح يكون سندي قررت اسمي علي على اسم ابو طلعت امشي اشويه بره 

خليت ايدي على بطني واني امشي ب شوارع تركيا واحجي مع ابني 

ماما حبيبي راح اسميك على اسم ابوك اني هليوم حييل فرحانه لان طلعت ولد حتى اتكون سندي بل حياة ماردتها بنت حتى لايجي يوم وتنكسر مثلي 

راح اعيشك بعز وحنان وراح اخليك تفتخر بيا ماراح اعوفك مثل ماعفت اخوتك مستحيل لو هلمره شنو يصير حبيتك حييل يعمري واني ماشايفتك صرت متولعه بيك صرت اذا اكل اكولك يالا ماما كوم ناكل سوى اذا اطلع اكولك يالا ماما خلي نطلع ربي لايحرمني منك حبيبي 

صار ولعي كلو مع الي بطني صرت يوميا احجي معا احلى عندي من جان يتحرك اموت على حركاتو جنت دائما اصور بل تلفون اخلي الكاميره كدامي واحجي 

حتى صرت اشتريلو شغلات  اخليها واصورها واكولو حبيبي وليدي علاوي هاي لكه

اتعلمت على تركيا صرت اطلع وادخل وحدي عادي بل بدايه طلعت جثير مع زينه لهذا اتعلمت 

علاقتي اني وزينه حييل قويه صارت تواصلي مع صهيب ابد مانكطع يوميا نحجي اني وهو عرفت من عندو اخويا مختار طلع من. السجن

دخلت بل ست اشهر من حملي بطني كبرت ورمت جنت افحص كل بين فتره وفتره ودكتوره اتكولي دير بالج من التعب 

جنت دائما ماحاول اتعب روحي حتى بل شغل من اتعب اروح لشقتي 

جنت اكف اسوي اكله واحجي مع ابني واكل واني احجي معا واضحك صار كل همي وقتي جنت انتظرو لحظه ب لحظه حتي يجي لدنيا 

يوم من الايام جنت تعبانه رجعت من الشغل اشتهيت بيتزا اتصلت بل مطعم وطلبت منهم بيتزا 

ها ماماتي جوعان شنو. رايك نطلب بيتزا يروحي يمتى تجي لدنيا 

طلبت بيتزا وصليت الظهر وكعدت انتظر اشويه واندك الباب 

هاي وصلت البيتزا يالا كوم ماما نفتح الباب مخليه ايدي على بطني🤰 وامشي مبتسمه 

فتحت الباب ونصدمت بلي جاي .....