رواية ليتني واجهتك الجزء الثاني الفصل السابع عشر
سما
بعد فتره من اخذو بابا وخالو ومختار جنه كاعدين ويوميا نبجي عليهم اندك الباب
طلعنا نركض بلكي رجعو يالله فتحت الباب مرت خالي ولكينا صهيب ماسك مختار ب يدو الصدمه صدمتين
صهيب داعشي صار ومختار الي مايكدر يمشي من التعذيب
ركضنا على مختار نحضن بي وانبوسو امي فدمره جان وضعها مو زين من هينا ابويا وخالي واخويا الي اخذهم الدواعش ومن هينا سدره الي مانعرف كلشي عنها
امي من شافت مختار كامت على حييلها واتبوس بي وتبجي ومن ابتعدت عن مختار شافت صهيب كامت تضرب على روحها
ام سدره؛: اش سويت بروحك صهيب ليش رحت معاهم يمه ليش
صهيب؛؛غصب عني خاله
ام سدره؛: ررررررب اخذ حق ويلادنا يارب وحق كل واحد انضلم تحت هاي الدولة الا اسلاميه
الكل؛اللهم امين
من شفنا كمية التعذيب الي ماكلها مختار انصدمنا ماكو مكان بجسمو مامتعذب وماعد ظهرو الي مايتفسر سالنا على خالو وبابا وكالنا تحت التحقيق ماكملتنا فرحتنا ولاراح تكمل ب يوم مادام داعش فوك راسنا ومانعرف شي عن سدره
سالنا صهيب وبلكي يعرف
صهيب؛؛ صدكو اني مثلكم ماعرف شي عنها
ام سدره؛؛ وين راحت بنتي خايفه لا وكعت بيدهم
صهيب؛؛ لو كن وكعت بيدهم جان ماخذو عمو ابو سدره والي معا
ام سدره؛: انت ليش رحت فهمني
صهيب؛؛اني لان دكتور واخذوني حتى اعالجهم
ام سدره؛: ان شاء الله ماواحد بيهم يكوم ياربي
صهيب سلم وراح ومختار جان وضعو ابد مو زينه نفسيتو جانت تعبانه اكثر من جسدو
مر عشر اشهر على غياب سدره
لا بابا وخالو طلعو ولاسدره بينت هي وويلادها مختار وضعو اتحسن الحمدالله
بس ضلو الباقين الي كل يوم يحلم يندك الباب ويرجعون وجا اليوم الي اتحقق نص الحلم
اندك الباب وطلع مختار يفتح بابا وانصدمنا بجيت خالو وبابا بس مو همه من العذاب الي على وجهم وجهم ذبلان فدمره وضعف ب شكل مو طبيعي
اتخبلنا من شفنا همه يبجون ونحنا نبجي ماحسينا غير بابا هو حاضنا كام يصيح
ابو سدره؛؛ مسكووو بنتج يارحمه مسكوووها شنووو راح يصير بحالها يولي نحنا زلمنا وشفنا الموت ب عيونا يولي رحمه شرفنا اطشر بينهم
مختار كام يضرب على كصتو ويبجي مثل الطفل
امي وكعت اغمي عليها شلنها ودخلنا جوى خليت راسها بحضني كلنا نبجي من الاصغير لجبير امي صحت وضلت تضرب على نفسها وتصرخ وتبجي
والله كلبنا راح وحيييلنا انهد وكبرنا فوك عمرنا
جت اماني وعمها وجايبين معاهم الويلاد واماني تبجي كل عين هلكبرها صايره من البجي
وحسوني وماري لاعشتو عليهم مصدومين مايحجون ومايقبلون ياكلون وبس يبجون يريدون امهم وابوهم
هم خطيه هذوله صارو ضحيه لاشبعو من امهم ولامن ابوهم
اماني؛؛سما اخذوو سدره سدره راحت
سماء؛: وي اماني راح نتخبل ليش هيجي داعش مع سدره شنو الي يريد من عندها
تعبت نفسيتنا فدمره صرنا حتى السفره مانخليها مثل ماانخليها انشيلها محد ياكل حتى الجهال صارت ماتقبل تاكل جنت اكثر شي يقهرون حسوني وماري بس يبجون على امهم رحت على مختار
سماء؛؛ مختار ليش ماتاخذ حسوني وماري يحجون مع ابوهم
مختار؛شلون اخذهم هسا اكيد راح يعرفون ويتخبلون هذوك
سماء؛؛ صار عشر ايام مختار وحسون وماري فدمره صحتهم ادمرت
مختار؛؛ والله مادري شنو اكولج
سماء؛؛ اولها واخرها راح يعرفون وان شاء الله يارب سدره تطلع منها
مختار؛سيمه ماتوقع سدره راح تطلع منها
سماء ؛ليش اخويا تحجي هيجي كول اسم الله
مختار؛؛ من جانو يعذبونا جانو يكولون على سدره زانيه حشاها
ضربت على صدري وكمت ابجي
سماء؛: يعني اختي راح يرجموها
مختار؛: اذا رحمة رب العالمين ماشملتها ماتطلع منها ماريد امي تعرف اخاف اتروح بيها
سماء؛: مختار ضربتني على راسي بهذا كلامك يعني سدره ميته
مختار؛ نتظر رحمة رب العالمين بس هسا حضريلي ماري وحسوني خلي اخذهم يحجون مع ابوهم على النت
مسحت دموعي وطلعت خبرتهم بس مافرحو لان خوفهم على امهم مسيطره عليهم
من اخذو سدره وبعد مارجع مختار جنت احس علىَ الليل كلو كاعد يصلي ويبجي واسمعو يكول يارب طلع اختي من هاي الشغله
مختار
بعد ماعذبوني اخر مره فتحت عيوني لكيت صهيب كدامي عبالي عقلي كام يخربط ركزت زين صهيب زين اشجابو مع داعش شنو الي كاعد يصير بحجة يشوف الكانونه همس
صهيب؛؛ سوي روحك نايم
مختار؛بس انت شنو
صهيب؛؛ سوي الي كتلك علىَ وارجع نام
سويت مثل ماكالي صهيب واشويه واجوي الدواعش واسمعهم يحجون مع صهيب
الداعشي؛؛ شلون صار هذا الخنز......
صهيب؛؛ والله حجينا وضعو ابد مو زين
الداعشي؛؛ لازم انكمل تحقيق معا
صهيب؛؛ يمكن مايتحمل هلمره ويموت
الداعشي؛:وشنو خلي يموت
صهيب؛؛ حجي تاخذ برايي
الداعشي؛؛ اي كول ابو لؤي انت واحد منا وبينا صرت
صهيب؛: اذا جانو يعرفون مكان بنتهم فاكيد الاب يعرف لان الاب اقرب
الداعشي؛؛ والحل شنو برايك
صهيب؛؛ انعوف ابنهم وانخلي عدنا هذوك الاثنين
الداعشي؛؛؛نحنا ماراح انعوفهم ثلاثتهم الى مانلكي سدره
صهيب؛: هذا اني رايي حجي واكيد الامر والشور يرجع لكم بس هذا الي كدامكم مايتحمل بعد تعذيب يموت
ماسمعت شي بعدها يمكن اقتنعو بكلام صهيب بس اني ماريد اعوف ابويا وخالي هذوله اكبار شلون راح يتحملون تعذيب
اشويه وسمعت صهيب يحجي ب صوت ناصي
صهيب؛: مختار تسمعني اذا كاعد فتح عيونك
فتحت عيوني ودحكت علىَ
مختار؛؛ليش هيجي سويت اني ماريد اعوف ابويا وخالي
صهيب؛؛ ابوك وخالك صحتهم زينه بس انت ماكاعد تحمل التعذيب
مختار؛؛ ماراح اطلع من هينا خلي يعذبوني ويعوفون ابويا وخالي
صهيب؛؛ مو بكيفك هذا الكلام اني راح اكتب تقرير وادز الهم انت مريض مختار ماتكدر افتهم عليه
بعدها داعش طلعني ورجعت لهلي وصار الي صار واخذو سدره اتحضرت حتى اخذ حسوني وماري لمكتب الانترنت لان صارت كلها مكاتب ماكو بالبيت ممنوع
اندك الباب طلعت لكيت الدواعش رجف كلبي ياستار شنو هلمره اش صاير
الداعشي؛: السلام عليكم حجي
مختار؛: وعليكم السلام اتفضلوو
الداعشي؛؛ هذا مفتاح بيتكم وسويج السيارات وجينا انبلغكم تحضرون ب منطقة ......لان راح يتم حكم بنتكم سدره بالرجم
من كالي اخر سطر وكع المفتاح من ايدي هي ضلت بيت ضلت سياره
راحو داعش مشو وجت سماء ماسكه حسون من يد وماري من يد
سماء؛؛ يالاااا خالو اخذنا نحجي مع بابا
مختار؛؛ سماء سدره
سماء؛؛ شبيها سدره مختار شبيك
مختار ؛؛ راح يقتلون سدره بعد اشويه
نسيت حسوني وماري كدامي من حجيت هيجي سماء اتخبلت صارت اتصرخ وتبجي ماري كامت تركض بره واتصيح اريدد ماما
انهار البيت راس على عقل من سمعو الخبر بل كوه انهدي ماري وحسوني ونحتضنهم واخذتهم حتى بلكي علي من يحجي معاهم يهدون
علي
استقرت حيااتي ب اربيل ودخلت دوره تعليم اللغه الكرديه وكدرت اوقع عقد مع قناة
بس الي ضال حاز ب كلبي ويلادي وسدره الي ماكدرت اطلعهم واسحبهم يمي
حياتي مع سلوى ماتغير شي نفس ماهي
مرت اشهر واني ماسامع صوتي ويلادي ولا جنت اعرف السبب ليش
جنت اسال عمر عمر يكولي مادري حتى اني ماعرف ليش انكطعو
الي حد مايوم من الايام دك عليه صهيب وحجيت معاهم ردت اعرف السبب شنو الي صاير
ماكدرو يحجون مجرد. سلمو وراحو .....!
جنت راجع من الدوام ودخلت لغرفه ابدل
سلوى؛؛ علي
علي؛؛ هااا
سلوى؛؛ ابن عمر يكول ابويا يكولي خلي علي يجي
علي؛؛ عليش ماعرفتي
سلوى؛:ويلادك على التلفون
على السريع كملت وطلعت رحت لبيت اول من دخلت لكيت اسراء واسماء يضربون ب نفسهم ويبجون وعمر يصيح بتلفون
علي؛؛ اش صايرررر يمعودين
اسراء؛:سدره علي داعش راح يكتلها
ضليت مصدوم شنو يكتلها
علي؛؛ انتو اشكاعدين تحجون
سحبت الموبايل من ايد عمر
علي؛؛ اش صاير شبيها سدره مختار
مختار؛:صارلها عشر اشهر مهزومه والدوله اسلاميه مسكتها وهسا راح يرجموها
علي؛اااااانت اشكاعد تحجججي ليش هي شنوووو اتسوي حتى يرجموها يرررررجموها شنو انت تعرف شنو يعني يرجمووووها ولك بس الك... يرجموها
مختار؛؛ علي اني ماكدر احجيلك بالتفاصيل افتهم عليه بس جيت اريدك تحجي مع ويلادك خصوصه ماري تفتهم اكثر من حسين ومن سمعت بخبر امها ماجاي تسكت
علي؛؛ وينهاااا انطيني هي
ماري؛باااابا
مجرد كالت بابا وانفجرت بالبجي
علي؛: ابو باابا انتي روح باااابا لاتبجين يانظر عيني
ماري؛امي راح اتموت بااابا ليش ماتساعدهاا ليش انت عفتنا ورحت ومااااما اتموت
ياويلي يارب كلبي كام يتكطع عليهم كله سببي اني شنو اسوي صرت مخبل اقسملكم شعره وعقلي يطير من راسي
عمر اخذ الموبايل ويصيح وحتى مامركز بكلام عمر شنو كاعد يحجي
ماجان عندي سياره وسيارتي عفتها عند سدره
لمحت سويج السياره على الميز سحبتو وطلعت اركض ركبت ب سيارة عمر ومشيت
شنو الي كاعد اسوي مادري وطلعت بطريق الموصل وعمر لحكني ب سيارة اسماء ويدك هورن ورايا
وصلت لاقامه وكفوني ونزل عمر يركض من السياره
عمر؛: ولك انت مخبل وين رايح وين
علي؛: عوووفني اروووح لموصل اني اعرف سدره سووا هيجي بيها لان خبرتني راح ياذوني وعرفو بيها
عمر؛؛ علي ماتلحك تصل سيطرة داعش ويكتلوك مخبل امشي
عمر
من اتصل بينا مختار وكالنا سدره داعش راح يقتلها اتخبلنا البنات صارو يصرخون ويبجون
من شفت علي طلع وركب بالسياره عرفت راح يسوي شي
ركبت سياره اسماء وطلعت الحك ورى وصلت ليم السيطره لان وكفوا
ركضت علىَ ونزلتو من السياره وصار يصيح واريد اهدي ماكو
كعد بالكاع وصار يبجي مثل الطفل ويضرب على صدرو
علي؛؛ ولكك عمررر شلون طلعت اني من هناااك شلون فهمني شلون عفتها ب يد جلاب شلون مافكرت بهذا الشي
سدره راح اتموت ب سببي ب سببي ماراح اسامح نفسي على الشي الي سويتو طول عمري
ويلاديي اخخخ الي صفوا بدون اب وام وسدره الي ضحت بروحها لخاطري طلعتنا وهي وكعت بحلكهم
كاعد مدنك براسو وكتفو تنهزم من البجي سحبتو وصعدتو معايا بالسياره وكام يذب من راسو
ب سرعه شغلت السياره ومشيت بي لمستشفى واخذو الاطباء وفقد عرفت ضربتو جلطه اشويه وطلع الدكتور
عمر؛؛ ها دكتور شنو شبي المريض
الدكتور؛؛ مريضكم معا ضغط من قبل
عمر؛؛ لا ماتوقع عندو
دكتور؛؛ مشكل معا ضغط وضربته جلطه
عمر؛؛ اش كاعد تحجي دكتور بعدو عمرو بالثلاثين
دكتور؛؛ اتصير خصوصه اذا جان متعرض لقهر قوي
عمر؛؛ اي هو اتعرض
دكتور ؛؛ هذا الحجي
نقلو علي لعنايه المركزه وطلعت اني رجعت لبيت شنو اكول لعمتي اكولها على بنتها لو ابنها
عمتي ماتدخل بيتنا لان ابو علي مايقبل بس محمد وعلي وميس يجون مرات بدون علمو
وصلت الباب البيت لكيت عمتي واكفه بالباب اتلوب
ام علي؛؛ اش صاير عمر اش صاير كولي شبيها سدره شنو ابنك يكول راح يكتلون عمتي الدواعش
عمر؛؛والله عمه ماعرف شنو اكولج بس
ام علي؛: شنو بس فهمني
عمر؛:الظاهر سدره عرفو هي هزمت علي وحكمو عليها بالقتل
عمتي من سمعت هيجي كتلها كامت تبجي وتضرب على نفسها
ام علي؛؛ يمه راحت بنتي راحت
جت ميس تركض هي ومرت علي ويهدون بيها المشكله هلمره اخاف يصير بيها شي اذا عرفت بعلي
ام علي؛: وين ابن عمتك وين راااح عمر
عمر؛؛ من سمع بالخبر اشويه اتخربط وشلتو على المستشفى
ام علي؛: اويلي يايمه اويلي علاوي
ابو علي؛؛اخذني على المستشفى اريد اشوف ابني شنو بي
عمر؛ عمو مو وكتها هسا
ابو علي؛؛ اذا ماخذتني راح اروح اني
عمر؛: امشي معايا
اخذت رجل عمتي وعمتي ورحنا لمسشتفى لكينا علي كن صحى جان مايقبل يحجي سالنا الدكتور على وضعو
كال لسانو ثكل وايدو اليسار انشلت من اثر الجلطه.....!!
مختار
منظر سدره وهي تبجي ونحنا نبجي معاها يكسر قلب اكبر واحد
صارو داعش يضربون سدره بالحجر
رفعت ايدها سدره اتريد اتغطي نفسها من الحجر الي دا يجي عليها بس مادا تكدر كل مكان جاي يضربوها
صوت امي وابويا يبجون ودعائهم وهمه يكولون يارب معجزتك يارررب
ماحسينا غير واحد من الدواعش كام يصيح بكل صوتو
الداعشي؛؛ ياااامة الله اذا كنتي تريدين عذاب الاخره اركضي خارج دائرة الحكم
احس رب العالمين نزل معجزة بهذيجه اللحظه سدره بدت اتريد تكع وكلنا صرنا انصيح عليها
واحد من الدواعش صار يصيح على هذاك الي كال السدره هذا الكلام ...
شلون اتسوي هذا الشي
بالشرع المره تخير بالرجم والرجل يرجم حتى الموت
مو بكيفك هذا الكلام
هذا كلام اميرنا
من كال اميرنا سكت كبل .
صرنا انصيح على سدره يالا سدره كومي كومي وقوي بروحج
المشكله هي ماتكدر اتكوم لان لازم تطلع من الدائره وهمه دا يضربوها يظلون يضربوها الي حد ماتصل الحد الي همه امسوينو
سدره
اتشهدت وبدت الحجار تنزل عليه اتذكرت قصه صارت بالزمن البعيد ورب العالمين ذكرهم بالقران
ثلاث اصدقاء يمشون ودخلو بكهف وانسد الكهف عليهم وصار كل واحد يدعي بدعاء صالحه كن سووا لرب العالمين والله سبحانه وتعال فرج عليهم
رفعت ايديا اغطي روحي من الحجار وادعي
سدره؛؛ يارررب نقذت جيهان من ايدين ناس ماتخافك انقذني من هذوله الناس يارب
ربي اذا اتقبلت عملي لجيهان عندك اكرمني هسا
والله شفت لؤي كدامي واتاكدت لحظتها راح اموت ماحسيت غير صراخ صارو اهلي يصرخون عليه
سدرررررره قوي نفسج وكووومي
وصوت الداعشي يااامة الله .........
يكرر الكلام عليه الداعشي ويصيح بكل صوته وصوت اهلي كلهم
عرفت لحظتها جا فرج رب العالمين ونزلت رحمتو عليه
الحجار تجيني من كل مكان وكل ماحاول اكوم اكع بعد محاولات جثير كدرت اكف على حيييلي مشيت خطوتين
وبعدها وكعت على ركبي وايديا
سدره؛؛ بااااااباااا مااابعد اكددرررر
ابو سدره؛؛ قووووي نفسج بنتي قووي نفسج يانظر عيني شوفي ويلادج
مختار؛؛ يااااالااااا اختي ابوس ايدج يالااا لاتفقدين الوعي ضلي مركزه معنا سدره
ماااري؛؛مااااماا ارررجعي الله يخليج
كمت احس شي ينزل على وجهي وصرت ادوخ ماكمت اركز كدامي
منظر الكل يبجي كدامي وخصوص ويلادي يصرخون ويبجون رجعت أعيد الكرة مرة ثانيه واكفه على حيييلي
سدره؛؛ يارب ساعدني ياررب قويني
سماء؛: يالااا سدره خطوتين يالا حياتي
طارق؛؛. قووووي نفسج الخاطر ويلادج والخاطرنا سدره
رجعت وكفت من جديد على رجليه ومشيت واعثر وامشي واعثر
امشي واكول يالا سدره يالا يارب يارب جيتكم حسوني وماري ماما ماتعوفكم ماتخلى عنكم
وصلت لنهايه الدائره وردت اكع لان دا احس وجهي صار كلو دم خايفه لاافقد واكع
الحمدالله شنو من اقدم لرب العالمين قليل شنو من اعبدو قليل اني متت بس رب العالمين نقذني
عبرة الدائرة وركضو عليه حسوني وماري حضنتهم وبعدها ماحسيت على شي
مختار
رب العالمين جان معنا بكل لحظه وماترك سدره منظر سدره وهي تمشي وتكع
اتكول خلص ماتت
مجرد عبرت الدائره وحضنت ويلادها اغمي عليها الداعشي الي كالها اطلعي من الحكم جا عليه
الداعشي؛؛ محتاجين مساعده ناخذها لمستشفى
مختار؛؛ نحنا راح ناخذها
شلتها وخليتها بالسياره وطلعنا لمستشفى
سدره
صحيت ولكيت راسي ملفوف وايدي مكسور
مختار وماما وبابا واماني ومعتز يمي
اتحمدولي بالسلامه واني اهز براسي
بابا وماما واماني اتقدمو حضنوني ويبجون
سدره؛؛ اش صار بيا
مختار؛؛ راسج انفتح وايدج انكسرت
سدره؛: وين ويلادي
معتز ؛:ابويا اخذهم كلهم على البيت لان رجعو بيتكم هليوم
احس نفسي بعدني مصدومه مادا استوعب الي صار بيا كل هذا
جا الطبيب شافني وكتبلي خروج ومسكني مختار ومعتز مشوني وطلعت من المستشفى
رحنا لبيت ودخلوني جوى وشافوني حسوني وماري يحضنوني ويبجون
انهاريت من شفتهم كمت ابجي واشهك احس صدري اتكطع من البجي والشهكات
سدره؛: ماعوفكم وعد ماعوفكم
ماري:؛احبج ماما الله يخليج لاتروحين وتعوفينا
حسوني؛: ماما انتي حياتي
سدره؛: اخخخخخ ياامي وابويا انتو
مختار؛: ارتاحي اختي كاافي
ابو سدره؛؛ ارحمي بحالج يابنتي كافي
اماني وسماء يبوسون بيا ويبجون وطارق اطول مني حاضني ويبوس براسي
دخلت جوى واتمددت بغرفة سماء ماكدرت اطلع فوك
معتز؛؛ يالا سماء اماني سووا اكل لسدره مايصير هيجي اتضل
سدره؛؛ ماريد مو جوعانه
ابو سدره؛: مو بكيفج لازم تاكلين نزفتي جثير
هزيت براسي بدون ماجاوبهم طلعو كلهم وضلت ماما يم راسي تقرأ ايات وتنفخ عليه خليت راسي بحضنها وبس ابجي واشهك
سدره؛: شنو ذنبي شنو ذنبي هيجي يصير بيا ياماما تعباااانه حييل
ام سدره؛: يابنتي اصبري ذنبج عايشه تحت دوله ضالمه
سدره:::والله ماسويت شي حتى هيجي ابين كدام الناس زانيه اني ياماما حرمت كل الزلم على نفسي من بعد علي يصير بيا هيجي
ام سدره؛؛ والله ياامي لو مو داعشي الي يسوي بيج هيجي لو الدنيا كلها تكول عليج هذا الكلام نحنا واثقين منج راح يجي يوم والموصل ترجع صدكي بس خلي يقينج برب العالمين سدوره من شفت شلون رب العالمين سحبج من الموت اتاكدت ماكو شي صعب
سدره؛؛ راح يجي يوم يتصلح الي انكسر
ام سدره؛: شنو قصدج
سدره؛؛ راح يجي يوم وارتاح لو الحزن يضل ورايا يوم صبري فرط والله فرط
وكمت اشهك وابجي وروحي تكطع وامي اتهدي بيا ودموعها تنزل معايا
جابت سماء شوربه ومعلاك شوي اكلت اشويه واخذت مسكن الالم وكدرت انام اشويه جان راسي امخيط 12طعنه
...!!!
علي
بعد الي صار والي سمعت بخبر سدره شكل معايا ضغط وضربتني جلطه
جوي امي وابويا يشوفوني واني اصلا ماريد اشوف احد بيهم
وخصوصه ابويا كل ماذكر الي سويتو بسدره روحي تكطع سدره ماااتت اكيد ماااتت وراحت صديقتي وحبيبتي وام ويلادي
جنت ماقبل احجي مع احد جان عمر طالع يمكن يشوف الدكتور
علي؛: و وين.... ع عمر
ام علي؛؛ راح يشوف الدكتور
جان لساني ثكيل الجلطه اثرت على ايدي ولساني
جا عمر دخل او من دخل حجيت معا وحرف حرف
علي؛؛ م ماااتت
عمر؛: مادري صدكني
علي؛: ش شلو ن. م.ما ت دري
عمر؛: ماكو اي اتصال وماعرف شنو صار
علي؛؛ خ .خل . يطل عون
عمر؛؛ منو همه
اشرت بايدي الثانيه على اهلي
ام علي؛؛ يمه علاوي
علي؛: ا .طل عو . م .ار يد اشو فكم
اريد اصيح عليهم ماكدر ضليت اشر واحجي كلمه واسكت امي وابويا يريدون يحجون معايا ادير وجهي واشر لعمر يطلعهم
عمر
علي ماجان رايد يشوف امو وابو ابد وجان بس يريدون يطلعون من الغرفه
عمر؛عمه الله يخليج اطلعو هسا دحكو على وضعو
ام علي؛: ماكدر اعوفو بهيجي حال
عمر؛؛ بس اطلعو وهو يصير زين
بل كوه طلعتهم بره ورجعت علىَ يريد يتعدل اشويه سحبتو تكيت ظهرو على السديه
وكعدت يمو واسمع صوت علي يبجي ادحكله يرجع راسو ليورى ويضربه بالحايط ويكوول اخخ
عمر؛؛ اشجالك مو زين عليك يمعود
علي؛: و.لك ..عمر ...ولك ..هاي .. سدره..هاي ااامي ..واختي ...وصديقتي..ولك ..هاي حب الطفوله... وهاي المضحيه ..وزوجتي ..وحبيبتي .. اخخخ يااكلبي
ياحبيبتي
ضليت احجي معا واهدي بيا واني ميت بداخلي قهر اختي هاي بس حالة علي جانت صعبه
ولازم الواحد يصير قوي اتصل بيا محمد وجا يركض حضني ب نص المستشفى وهو يبجي واني ابجي
محمد؛: ولك عمر شنوو الي كاعد يصير بينا عليك الله كولي جذب سدره ماماااتت صحيح سدره داعش قتلها
علي؛؛ محمد حيييلي انهد وكاافي انطي من نفسي بسبب عليي
محمد؛: علي يرجع زين بس سدره ولك لو يموت هم محد يلمو
رجعت لبيت ومحمد ضل يم علي لكيت البنات بعدهم يبجون وملخين نفسهم من ضمنهم جيهان ركضت عليه جيهان تبجي لان جانت بل مدرسه ماتعرف
جيهان؛: عموو الله يخليك كولي صح سدره ماتت
عمو عمر سدره نقذتني ومحد كدر ينقذها هاي امي عمو والله امي الي الله عوضني بيها بعد مااخذ اهلي مني
ماكدرت احجي الغصه بلعومي بس احجي اختنك طبطبت على كتفها ومشيت لغرفه ..!!
اسراء
دخلت لغرفه لكيت عمر متمدد وداير ظهرو وحاضن نفسو وبس اكتوفو تنهز من البجي
خبر سدره دمرنا كلنا جيت اتمددت يمو وحضنتو وابجي معا
مر يوم حزين جيهان موتت روحها ماتقبل تاكل واسماء حالتها اتعس من عندها
الى حد ماصار ثاني يوم اليوم علي حالتو استقرت وطلعو
جا عمر يركض علينا ويصيح
عمر؛: ولكممممم سدره عايشه والله عايششه
اتخبلنا مسكنا عمر وبس انريد نعرف صحيح الي دا يكووله
اسماء؛؛ الله يخليك صحيح عموري
عمر؛؛ والله العظيم صحيح والله عايشه هسا مختار انتصل بيا وكالي
عمر
رحنا طلعنا علي من المستشفى ودخلنا لبيت
عمر؛: الحمدالله على سلامتك ابو حسوني
هز براسو ماحجى شي
دا اطلع وصلت باب الحوش موبايلي دك على النت مختار
جاوبتو
عمر؛؛ ووووول بس كولي انت وين صرت
مختار:؛ ماكدر كل اشويه اتصل بيك عمر
عمر؛: سدره شنو صار من عندها
مختار؛: جابوها لساحة الحكم ورجموها وهمه دا يضربوها واحد صيحلها كالها اذا اتريدين عذاب الاخره اركضي من الحكم
عمر؛؛ يعني سدره عاشت
مختار؛: الحمدالله كدرت تطلع
عمر؛: مختار لاتجذب
مختار ؛: دا اكولك والله والله
رجعت طاير اركض على علي مسكتو من كتفو واخض بي
عمر؛: سدره عاااشت يااعلي ولك والله عايشه كدرت تنهزم من الحكم ربك ماعافها وحدها سدره مضلومه
علي:: لا.. لا تجذب
عمر؛: اقسملك بالله العظيم حتى شوف مختار دزلي بصمه لصوتها
علي
شنو اوصف شعوري بهذيجه اللحظه ماينوصف خصوصه من سمعت صوتها
سدره؛؛ شلونك حبيبي عموري وشلون ابوحسوني وعمتي والكل واسماء واسو وبنتي الحلوه جوجو اعرف بيكم وصل خبر لكم اني انقتلت بس رب العالمين مايعوف عبدو مضلوم الحمدالله اني بخير بس اشويه تعبانه لاينشغل بالكم عليه وادعونا اعرف اتريدو تطمنون لهذا سجلت بصمه حتى مختار من يصل محل النت تصلكم الرساله لان تعرفون ممنوع نسوان يروحون لنت وسلامي لكم
كلبي يريد يطلع من مكانو سدره عايشه عاشت ادحك على امي وميس وعمر سجدو بالكاع واعيد واكرر بالبصمه وكلبي يرجف على صوتها ....!!
سدره
صار ثاني يوم ومختار كالي راح اروح احجي مع عمر وطلبتو من عندو يسجل صوتي يسمعهم هي
ما اوصفلكم الليله الي راحت شلون جانت
جنت كل ماغفى وانام احلم داعش يلحك ورايا ويضربني بالحجار
وافز واصرخ وامي تحضن بيا واتهديني وتقرأ عليه ايات
سدره؛؛ الدوله الاسلاميه
ام سدره؛: كابوس والله كابوس ياامي
ضليت حابسه روحي مايعجبني احجي مع احد ولااحد يحجي معايا
جنت اشوف بابا يجي يدحك عليه ويشبع قهر ويطلع
بعد كم يوم جاني صهيب يركض
صهيب؛؛ صحيح الي صار بيج
سدره؛؛ انت شنو اتكول
ضرب على كصتو ودنك براسو
صهيب؛؛ سامحيني
سدره؛؛ على شنو الذنب ماجان ذنبك انت كفيت وفيت هيجي رب العالمين راد والدليل امك من حجت معاها وكالتها حتى اتبطل ماتحجي مع علي سكتت فتره ورجعت تبجي من جديد لان رب العالمين راد صهيب
صهيب؛؛ قصدج بيتنا مراقب
سدره؛ عبدالله كلشي يعرف عني ويعرف منو اقرب ناس ممكن اروح عندهم وراقب بيتكم بس رب العالمين خذلو
صهيب؛:. الي صار صح ب يد رب العالمين بس ابد ماجان معجزة
سدره؛؛ شلون
صهيب؛؛ اذا هو يحبج ليش يقتلج
سدره؛؛ هااا
صهيب؛؛اي اذا يحبج ليش يقتلج
سدره؛: مادري ..
صهيب؛؛عبدالله هو سوى هيجي رجمج وبعدين دز احد يخليج تركضين من ساحة الحكم حتى تخضيعن واطيعين عبدالله بكلشي
ضليت مصدومه بكلام صهيب صح كلامو اكيد
صهيب:؛سدره عبدالله ماراح يعوفج بحالج صدكي
سدره؛؛ شنو اسوي
صهيب؛؛اتزوجي
سدره؛: شنوووو
صهيب؛: اي اتزوجي
سدره؛؛ مستحيل هذا الشي يصير
صهيب؛؛ اذا ماتزوجتي ياسدره راح يجي يوم وتزوجين عبدالله غصب عنج
سدره؛؛ ماكدر ماكدر اتزوح واعيش مع شخص كلبي مايريدو
صهيب؛؛ مجبوره حالج حال الف بنت غيرج اتزوجت غصب
مستحيل اني تفكير ماكدر افكر بهيجي شي مستحيل اكدر اعيش مع شخص ماريدو
مر عشر ايام واشويه وضعي صار احسن جنت كاعده ب بغرفتي بعد ماجا صهيب شال الخيط من راسي
صهيب؛؛ شنو كلتي بالموضوع الي كتلج علىَ
سدره؛؛ مستحيل اتزوج انت مخبل شبيك
صهيب؛عجل موتي
صار يومين من فتح الموضوع اتزوج كمل وراح لاهل اماني
دخلت سبحت وسماء ساعدتني لبست البرنص وطلعت كعدت على التخت ماحب اول من اطلع من الحمام ابدل
جت ماري عليه خلت ايد فوك ايد وتحجي
ماري؛؛ ول حبيبي انتي ليش هيجي كاعده لاتبردين
سدره؛؛ هههه مايعجبني كبل ابدل
ماري؛؛ اني اطلعلج ملابس والبسج
سدره؛: تعااالي هينا الي اعضج من غمازتج
ماري؛: هههه صار بس البسي ملابس
سدره؛؛ تدللين دكتوره ماريه طلعيلي وعلى ذوقج
ماري؛؛ امممم فكري ياماري فكري شنو البسج ياماما
واتسوي باصبعتها على راسها وعلى اساس اتفكر
ماري؛: لكيتها راح البسج تركسود
سدره؛: ادللي
طلعت ملابسي من الكنتور وكعدت اتساعدني لبست ملابسي وراحت جابت مشط شالت شعري وخلت خاولي جوات شعري وكعدت اتمشط بشعري
سدره؛: ماري وين اخوج ماما
ماري؛: كاعد يلعب مع خالو طارق بلي
سدره؛: اي حبيبتي
ماري؛؛ ماما
سدره؛: ها امي
ماري؛: ماما ليش مانروح على المدرسه انتي ماجنت اتكولين من اخلص روضه اروح لمدرسه
سدره:؛مو هسا حياتي بعدين
ماري:؛, ليش ماما
سدره؛؛ مايقبلون الدوله الاسلاميه
ماري؛: بس اني شفت هذاك اليوم بنات يرحون لمدرسه خلي اروح معاهم
الله يخليج ماما
سدره؛: لا ماقبل وابوج هم مايقبل
ماري؛: زين ماما من يجي بابا راح انعيش ب بيت واحد مثل عمو حمودي وعمه ميس
سدره:؛ لا
ماري؛: ليش ماما
سدره؛: من تكبرين تعرفين
جانت كلمره تسالني بيها واكولها مثل كلام ام صهيب اتكولي انتي هسا كلشي مابيج ليش مانعيش مع بابا اني جنت اكولها من تكبرين تعرفين ماحسيت غير ماري وكفت كدامي وصارت اتصرخ عليه
ماااري؛ كللل ماكولج اتكولين من تكبرون اني كبرت ماااما ماضليت صغيره اريد اعرف ليش انتي الدوله الاسلاميه ضربوج بالحجر وليش باااابا ماعايش معنا انتي تجذبين عليه ماااريدج مااااحبج لامدرسه ولاتلفزيون ولاكلشي نحنا وين عايشين فهميني مامي
سدره؛؛ ماري هيجي تحجين مع ماما
طلعت بدون ماتجاوبني خليت راسي بين رجليه وابجي شنو اسوي شنو ب يدي شنو يصير لو عبدالله ماجان بحياتنا شنو يصير لو بعدني عايشه مع علي اخخ حسبي الله عليك ياعبدالله على كل لحظة دمرت بيها حياتي
اشويه ودخلت عليه سماء شايله الصينيه وماريه شايله بيدها ورده جت باستني ومسحت دموعي
ماري؛؛ اسفه ماما ماجان قصدي بس اني احب بابا حييل واحبج انتي وحسوني واريد انعيش سوى لاتزعلين مني
حضنتها وبوستها
سدره؛؛ مازعل منج حياتي بس مايصير تحجين معايا بهاي الطريقه يروحي
ماري؛؛ اوكي ماما اسفه وهاي ورده
سدره؛؛هههه شكرا حياتي
سماء؛؛ اتفضلي دكتوره سدره ودكتوره ماريه على الاكل
كمت واني اضحك مع ويلادي ومش اليوم واشويه غيرت من نفسي لخاطرهم اضحك معاهم العبهم
وبعد ماصرت شويه زين جا بابا عليه وطلب يحجي معايا
ابو سدره.... باباتي شلون صرتي
سدره... الحمد لله حياتي
صفن بوجهي وهو يتحمد الله بعدها سالني
ابوسدره... سدره شكو بينج وبين داعش وليش من دا يضربوج كلتي اني ورايا قصه سدره شنو قصتج بنتي احجيلي اني ابوج
دنكت براسي ابجي واشهك وبابا يهدي بيا حضني وضمني على صدره
ابو سدره... يابنتي شبيج كوليلي ياامي
سدره...خايفه يابابا خايفه لاداعش يرجع عليه مره ثانيه
ابوسدره... ليش كوليلي
رفعت راسي وكتله
سدره... اني بعدني سدره الي جنت دوم رفعت راسك بعدني اختك ماريه بنظرك مو بابا انت تعرفني اني ماسوي شي غلط انت تعرفني اني مااخلي شخص يلمسني بالحرام
سحب راسي باسه ودموعه تنزل
ابو سدره... والله بعدج يانظر عيني بعدج رفعت راسي بعدج الدكتوره سدره الي امشي واني رافع راسي بيها هذوله شنو حتى اصدكهم انتي شريفه ياابنتي بس ليش صار هيجي كوليلي وريحي كلبي
ماعرفت شنو اكول ولاكدرت اكول الحقيقه لبابا وماكتله غير
سدره.... بسبب عمر وعلي ولان طليقة الاعلامي علي همه هيجي كالولي واذا تحبني يابابا لاتسالني ولاتفتح معايا هذا الموضوع الله يخليك
سكت بابا ماكال شي واحترم كلامي باسني وطلع وهو يدعيلي...
جيت اريد انام بس ماكدرت رحت لكنتور فتحت البوم صغير هذا الوحيد الي ماكدرت ادفنو ماكدر يوميا اشوف علي واتذكر ايامنا
ضليت اكلب بالصور وكل صوره بيها ذكرى وابجي وابوس بصورة علي
سدره؛؛ ليش اتبعدت عني ورحت ليش عفتني وحدي احارب هاي الدنيا عللي محتاجتك حيييل الدنيا وداعش وابن عمك كلها صارت عليه تعبت ياحبيبي ماكدر بعد اقاوم خلصت وطاقتي خلصت
مسحت الدموع الي نزلت على البوم وكمت رجعته بل كنتور وجيت اتمددت بين حسوني وماري يالله صوت الطياره ماكدر انام
سدره؛؛ شنو راح اتسون بينا بعد اكثر من الي سويتو ياداعش ...
ضليت اقرأ ايات وانفخ على ويلادي وحضنتهم ونمت
صار ثاني يوم
جنت كاعده بغرفتي ضايجه وافكر شنو الي راح يسوي داعش بعد بينا اكثر من هذا جت سماء عليه
سماء؛: سدره صهيب جا يريد يشوفج
سدره؛: خلي يجي مابيا حيل انزل
سماء؛: ماشي
جاصهيب صعد عليه وكعد مقابيلي
صهيب؛: شلونج هليوم سدره
سدره؛: تعبانه صهيب حييل
صهيب؛؛ ميخالف يهون كلشي سدره اريد احجي معاج ب موضوع
سدره؛؛ اي صهيب كول
حسيتو متوتر ودنك راسو وحك لحيتو بحركه سريعه ورجع رفع راسو وكالي
صهيب؛: سدره
سدره؛: شبيك احجي
صهيب؛؛ سدره تزوجيني .....؟؟؟؟ !!!!
ضليت مصدومه وفكيت عيوني ادحكله اكيد دا يتشاقه شبي صهيب والخوه الي بينا واماني حب حياته صرت اضحك من صدمتي وماصدكت سمعي
سدره؛؛ هههه صهيب شنو لا تضحكني مالي خلك
صهيب؛؛ ماكاعد اتشاقه اني جاي اطلب ايدج لزواج ....!!!
ضليت صافنه بوجهو هذا اشكاعد يحجي ...!
كمت اصيح علىَ اتخبلت اشكاعد يطلب من عندي
سدره؛؛ ااااانت مخبل مو عاقل شنوووو هذا الي كاعده اسمعو
صهيب؛؛ اني ماااجي اطلب ايدج طمع بيج وانتي تعرفين هذا الشي وكتلج قبلها انتي اختي بس راح يرجعون عليج الدواعش مره ثانيه سدره افتهمي
وكفت اصيح علىَ مستحيل مستحيل شنو اماني شنو يصير بيها اني جربت شنو رجال يتزوج على مرتو وشعور مقرف
سدره؛:. والله والله ياصهيب لو داعش يرجمني الف مره. ماراح اقبل اتزوجك
صهيب ؛: بس خلي انصير بالمحكمه يمهم متزوجين ومحد بعد يكدر يحجي معاج سدره
سدره؛: انت صاير بعقلك شي اكيد مدري داعش خرب عقلك
صهيب؛؛وسسسسم اي والله جاي اكولها نع.....على ورق اتكولي داعش خرب عقلك خربيج وبداعش
سدره؛: لاتغلط
صهيب؛: اكسر راسج هم تكدرين تحجين
مخبل دحكت علىَ وضحكت
صهيب؛؛ تضحك الفطيره
سدره؛:هههه لعد ابجي انت مخبل تزوجيني
عوجت بحلكي
صهيب؛؛ اني صوجي كو.. اروح مع داعش ب سبب هاي الشكول بلاخير تقلدين
سدره؛: ههه وي صهيب قرداش عوف الزواج هسا كولي شنو راح اتسوي من راح يفوتون الجيش
صهيب:؛ مايخصج عليج بنفسج هسا انتي انقذي روحج من داعش بعدين اني انقذ روحي من الجيش
سدره؛؛ يعني شنو اسوي مثله
صهيب؛: اخذج واخذ ابوج وانروح لمحكمه مال دوله اسلاميه ونمسك عقد
سدره؛: اي اي يالا كوم وهيجي ب سهوله واماني
صهيب؛؛مشكلت اماني
سدره؛؛ لازم متعاركين
صهيب؛؛ لا هاي الحب مازعلها بس شنو اسويلها يعني هي تعرفني يمكن اذا افكر ب بنت بعد اماني لو اتضلين اخر وحده بالدنيا هم مافكر بيج
سدره؛؛ والله لو اطير ويصير عندك جناح هم ماخليك تمسك عقد عليه والله والله اماني اتموت وحتى لو اماني هم هي كالتلي مستحيل اوفق
صهيب؛: ارضي بيا احسن ماتزوجين شخص زواج كامل وتندمين وتعضين اصبعج ندم
سدره؛: والله لاانت ولاغيرك اني اخلي واحد من بعد ابو حسوني يصير رجلي
كام على حيييلو وطمني
صهيب؛؛ امداج وامدا ابو حسوني معاج وامداني من عرفتج وامدا هذيجه الساعه الي دخلت كلية الطب واتعرفت على هيجي شكول ضلي بهذا عقلج ويوميا داعش يسحل بيج بالسجون عاد هلمره ياسدره اذا داعش اخذج والله العظيم راح اكتلج هلمره عاد صدك ياخذون شرفج
سدره؛: الله عليك لاتخوفني
صهيب؛؛ لعد خلي امسك عقد عليج
سدره؛؛ دروح والله ماسويها
صهيب؛: طبج مرض
مشى وكمت ورى
سدره؛؛ اشو رحت
صهيب؛؛ انتي مو مال واحد يحجي معاج انتي مال راشدي وكتله وغصب عنج تزوجين
سدره؛؛ اتموتني هم ماتزوج
كمخني وطلع راح ورجع بعد يومين هم فتح هذا الموضوع معايا وهم رفضت اكيد شلون اسوي هيجي شي
عبر شهر على الحادث الي صار معايا والحمدالله الي حد الان ماكو شي....!!
جنت كاعده بالصاله واقرأ كتاب اندك الباب طلع طارق وشويه دخل معا نسوان اثنين
اشويه وماما صاحتني عبالي جاين يضربون ابره او شي
دخلت سلمت وكعدت وبدت مره تحجي
اني ام مصطفى يمكن ماشايفتني من قبل دكتوره
سدره؛: ولاصغره بيج خاله
ام مصطفى؛: مصطفى ابني صديق ابنكم مختار
ام سدره؛؛ ياهلا وسهلا بيج ام مصطفى على راسي
ام مصطفى ؛؛ بيج المهلي ام عمر
وصار اتعرف على نفسها وتحجي على ابنها عرفت بيها خطابه اني اعرف مصطفى صديق مختار بس امو ماشافينها لان نحنا بمنطقه وهمه بمنطقه
بعد ماعرفت كالت
ام مصطفى؛؛ اني جاي اطلب بنتج سدره لابني مصطفى والله مانلكي احسن منكم ومن سمعتكم
شنو سمعه شنو بطيخ هيا داعش خلى عندي سمعه اريد احجي وماما دحكت عليه سكتت بس قرار ماما صدمني
ام سدره؛: انت وابنج وطلبكم. على راسنا ام مصطفى ومصطفى ماكو مثل اخلاقو وسمعتو الحلوه
بس يضل القرار لابوها وان شاء الله انردلكم الخبر بعد كم يوم
ادحك على ماما اريد تفتهمني ماكو هي تعرفني واني موصيتها اي خطابه تجيني ترفض كبل ولاتفتح معايا هيجي موضوع ابد كبل كمت طلعت من الاستقبال ماردت احجي واجذب امي لان اول وتالي راح ارفض ....!
مصطفى
مصطفى؛؛ يوووم مااريد اتزوج هي كوه
ام مصطفى؛: اريد اشوف ويلادك قبل ماموت شوف شلون ابوك مات وماشاف اطفالك
استغفرت ربي واخذت السويج وطلعت وامي اتصيح ورايا هذا حالها من مات ابويا قبل خمس سنوات يوميا تفتح معايا موضوع الزواج اتخاف لا ماتلحك اتشوف اطفالي مثل ماابويا ماشاف ركبت السياره وطلعت دكيت الباب على بيت خال مختار طلع طارق عيونو حمر
مصطفى؛؛ ول شبيك طارق
طارق؛. اختي
مصطفى؛؛ شبيها رضيعتك احجي يمعود خوفتني
طارق؛: راح يرجموها الدوله الاسلاميه بعد اشويه
وكعد بل كاع يبجي الله اكبر على الضلم الي كاعد يصير
اني سدره شايفج ومختار جثير يحجيلي عنج
مصطفى؛؛ شفتج كم مرة ومرة دكيت الباب وانتي جنت طالعه لدوام وسلمت عليج
سدره؛؛ اي اتذكر هاي صح اي كمل من طارق كام يبجي
مصطفى؛: دنكت علىَ كمت اهدي بي كول يالله حبيبي انت رجال مايصير تبجي
طارق؛: هاي اختي كلشي ماشافت من حياتها وهيجي يسون بيها
مصطفى؛؛ وين مختار كوم معايا لاتبجي
طارق ؛؛ مختار راح ويلادها يريدون يحجون مع ابوهم
مختار حالتو اتعس من طارق وكل عين هلكبرها من البجي من صار وكت الحكم وجان داعش يرجمج كلبي احترك عليج وعلى ويلادج وعرفت انتي مظلمومه لحظتها
بس رب العالمين ماتركج وكف معاج
ضليتي ب بالي وقررت اخطبج وفتحت هذا الموضوع مع امي بالبدايه رفضت تعرفين انتي
سدره؛؛ بحكم اني مطلقه وانت اعزب
مصطفى؛: اي بس ضليت الح عليها واروح واجي افتح معاها هذا الموضوع لازم يصير
واخير وافقت بعد اصرار جبير ونفس اليوم الي وافقت دزيت امي وخالتي عليكم .....!!
سدره
بس طلعو النسوان ودخلت ماما كمت اصيح عليها شلون تقبل تكول هيجي من عندها
سدره؛: انتي بس فهميني ليش اتكولين هيجي ليش
ام سدره؛؛ شووووف سدره صوتج ماينرفع عليه كااافي عاد طوختيها انسسسسسى علي انسسسسى شنو اتريدين بعد يسوي بيج داعش غصب عنج تزوجين
سدره؛؛ ماراح انسى علي ولاراح اتزوجو من بعدو وشنو يطلع ب يدكم لاتقصرون
شالت من كدامها الكلاص وضربتني بي بس نصيت
ام سدره؛؛ ادب ... هسا خلي يجي ابوج والي اخلي يزوجج
سدره؛؛ ابويا مايجبرني على شي اني ماريدو
ام سدره؛؛ لا مايجبرج بس الليل كلو ماينام وكلما اكعد اشوفه كاعد ويستغفر ويدعي لهذا الوجه
سدره؛:اي عادي خلي يدعي عجل هو مو ابويا
ام سدره؛: لعلمج هو كال راح ازوجها
سدره؛؛؛ والله ماتزززوج لو تنقلب الدنيا
طلعت فوك وامي اتصيح
ام سدره؛: تنقلب على راسج ان شاء الله انتي وهذاك الي نايم وحاضن مرتو وانتي ابجي ونوحي
دخلت لغرفه وابجي واضرب على رجليه والله اموت اذا صارت صدك ماتحمل مستحيل مستحيل
ضليت بغرفتي فوك الساعه وسمعت ابويا يصيح
كمت ادك على صدري انصخمتيي ياسدره نزلت وارجف
سدره؛؛ ها بابا
ابوسدره؛؛ تعالي بنتي اكعدي
رحت كعدت وصار بابا يحجي معايا
ابو سدره؛: بنتي سدره مو كلشي بهاي الحياة الي انحصلو انريدو الا اتضل ثغره بحياتنا
سدره؛؛ بس بابا
ابو سدره؛: خلي اكمل كلامي انتي يابنتي رب العالمين كتبلج اتعيشين مع علي كم سنه وهاي صار انفصال بينكم الحياة ماراح تكف
علي صح انغصب على الزواج بس عاش حياتو مع مرتو
بابا يحجي معايا ودموعي تنزل شلون اعيش مع شخص شلون اكدر اخلي راس بحضن شخص غير علي ياناس والله ماكدر مو بيدي حبي لعلي جبير ماينسى ب يوم وليله
صار بابا يحجي معايا بكلام الطيب واني بس اهز براسي بمعنا لا وامي تتعصب ب ساع عكس بابا بسبب السكر
ام سدره؛: مو بكيفج كاافي عاد حملنا كبر
سدره؛؛اذا متضايقين مني ومن ويلادي هسا اطلع
ام سدره؛: وين اتروحين يمه اديحين وبعدين نحنا مو حملنا كبر ماعدنا اكل انطعمج اشو انطعمج وانطعم الف وحده مثلج حسي بينا كاافي القهر الي شايلينو كن دمرنا عمر ماجان قهرو بكدج انتي بنت افتهمي
سدره؛: اني ماريد اتزوج ماريد
وصار صياح بيني وبينا امي وابويا امي وابويا يريدون اتزوج واثنيهم اتعصبو وصارو يصيحون لازم اتزوج واني معانده مستحيل دخل مختار على صوت صيحنا
مختار؛: اش صاير
سدره؛؛ صديقك شكو يطلب ايدي
مختار؛: غير يريد يتزوجج
سدره؛: اني ماجاي اتقشمر معاك
مختار؛؛ واني هم هو واحد من يطلب ايد وحده غير يريد يتزوجها
سدره؛؛اي كولو عود رضيعتي اتكول اني مارهملك ولايدك بابي ثاني مره لا اطرودو هو واهلو
ابو سدره؛؛ اي انتي اسمج سدره اطردي احد
مختار؛؛ والله يااختي اسف مالي دخل هاي امج وهاي ابوج بيينكم اني رايح
من عركه طويل انختمت ب كلام من بابا وراح جاب القران وخلى ايدو على القران
ابو سدره؛: اقسم بالله العظيم والقران الكريم ياسدره بنت رحمه اذا ماتزوجتي اني راح اروح مع داعش اعوفكم وامشي
من سمعت بابا كال هيجي كمت اضرب على نفسي وابجي واصرخ بوجهو
سدره؛؛ شنووو اتريد من عندي شنووو ليش هيجي اتسوي ليششش
ابوسدره ؛؛هذا الموجود
اتخبلت طلعت اركض على غرفتي دخلت وكسرت شكو شي بالغرفه وابجي واصرخ وادعي على علي الي عافني وحدي ب ضيمي
وكعت بين كل هذا الكزاز ومختار وماما يضربون الباب الى حد مانكسر
دخلو وشافوني بهاي الحاله وايدي كلها دم
مختار؛: انتي مخبله
سدره؛: اكرهكم كلكم اكرررررررهكم ارررريد علللللي عللللي اكررررهك ليش عفتني ليشششش
اتقدم مختار عليه شالني ورفعني كعدني على التخت ودخل بابا شاف الغرفه وايديا دم
ابو سدره؛؛ هاي شنو كن سويتي
ام سدره؛: عوفها مشكلتها هذا لموجود
ابوسدره؛؛ كسري الغرفه كسري البيت كسري الدنيا هذا القرار قراري يالا دا اشوف اتضحين بيا لو بنفسج
واكف بابا يحجي معايا بكل برود دم واني متت باعصاب مشى وعافني واني اصرخ علىَ
سدره؛؛ اكرهك انت موابويا اكررررهك انت نسخه مستنسخه من قصييييي الله ياخذ حقي وحق علي من عندكم
ام سدره؛؛ كاافي سدره
سدره؛: انتي شنو اتريدين من عندي اصلا كلو منج انتي السبب
امي طلعت وعافتني ومختار وسماء وطارق نظفو الغرفه واني نايمه بتختي وبس ابجي يالله شلون ساعدني
ضليت ثلاث ايام ماطلع من الغرفه ولاانجمع معاهم باكل ابد
بعد الثلاث ايام جوي بيت اهل مصطفى حتى مصطفى يشوفني بعد مانتفقو على كلشي
بابا جبرني ادخل عليهم دخلت سلمت وكعدت وعيوني حمر وخشمي من البجي
ام مصطفى ؛؛يمته اتحبون انسوي فحص الدم
ابو سدره؛؛ بكيفكم انشوف مصطفى
مصطفى؛؛ اني اكول لو بعد الزواج انسوي تعرفون هذا الوضع
ام مصطفى؛؛ يعني كبل عقد
اختنكت طلعت وعفتهم وابجي ويلادي يشوفني ابجي يكعدون يبجون معايا
نفسيتي صارت صفر جت سماء عليه وبلغتني الخميس العقد
من الم الي بجسمي ونفسيتي الي ادمرت خليت المخده على وجهي اعض بيها واصرررررخ
ماكدرت اسوي شي ابويا كسر ظهري ب يمينو وصار يوم الخميس صعدت ماما عليه وكعدتني
ام سدره؛؛ كومي سدره يالا
سدره؛؛ شكو اش صاير من الصبح
ام سدره؛؛غير العقد مالج
سدره؛؛؛ على الكبور ان شاء الله
ام سدره؛: ابوج ينتظرج جوى كومي عاد
كمت واني استغفر ومتضجره وروحي اتريد تطلع من خشمي نزلت جوى لكيت بابا ومختار كاعدين يتريكون
سدره؛ خير شكووو
ابوسدره؛: الناس اتكول صباح الخير عروستنا
سدره؛استغفر الله وهاي صباح الخير ممكن اعرف شكو
ابو سدره؛: يالا حضري روحج على 9
سدره؛: خلصت اكدر ارجع انام
ابو سدره؛؛ احترمي سدره كاافي مهزله
سدره؛: الي كاعده اتصير مو مهزله
ابوسدره؛؛ اني صحتج حتى تزقنبين واتكملين شغلج يالا
طلعت من كدامهم ورحت غرفتي سديت الباب وكعدت ابجي واشهك واحضن بروحي...
بعد بجي طويل كمت رحت لكنتور طلعت جبه سوده والخمار ولبستهم شنو اسوي اضيع اهلي اخلي ابويا يصير مع داعش اضيعو ب سبب علي الي ماكدر يلمنا يمكن رب العالمين يريدلي الخير ....
بوست الويلاد وهمه نايمين ونزلت جوى لكيت مصطفى موجود
حتى ماكدرت اسلم الغصه ب بلعومي من دخلت هو كبل وكف
مصطفى؛: شلونج سدره
سدره؛؛ احم تمام
مصطفى؛: جاهزه انروح
دحكت على بابا وهزيت براسي ودنكت بعيوني كمنا دا نطلع مصطفى طلع هو ومختار كدامنا
قبل مااطلع مسكت ايد بابا وكمت ابوس بيها
سدره؛: بابا الله يوفقك الله يخليك لاتسوي هيجي بيا
نزلت على ركبي ابوس ب ايد بابا هو واكف دار وجهو صفح ورجع دحك عليه
ابو سدره؛: راح يجي يوم واتبوسين ايدي تشكرين مني لان زوجتج مثل ماهسا جاي اتبوس ايدي حتى لايتم هذا الزواج
سدره؛: اموت والله اموت اذا اتزوجت
ابو سدره؛: اتموتين كدامي واتموتين من القهر ولااشوف الي شفتو من داعش بيج بجيج هذا كلو مايفيد اني قراري مااتراجع عنو
سدره؛؛ليش يابابا ليش مو بنتك المدلله مو اني حبيبتك ليش صرت نسخه من عمي
ابو سدره؛؛جان عمج كومي يالا
ماما اتقدمت مسكتني وكومتني دفعت ايدها
سدره؛: عوفيني اصلا كلو ب سببج انتي خليت براس بابا الزواج
ام سدره؛: لان انريد لجه الخير
سدره؛: ياخير ياااخير واني صرت بحضن رجال ثاني
ام سدره؛: كااافي سدره ابوج طلع كاعد ينتظرنا عيب من مصطفى
سدره؛: الله ياخذني ياريت ميته ياريت
طلعت بره اني وماما ولكيت مصطفى كاعد ب سيارتو وبابا يمو ومختار من ورى رحت كعدت يم مختار وماما هم جت
طلعنا لمحكمه واني الطريق كلو ابجي كعدت يم ماما وبابا ومصطفى راحو كملو اجرائات العقد
ام سدره؛: كاافي سدره كاافي بجي
ماجاوبتها جا مصطفى مع بابا وكالي
مصطفى؛: يالا سدره ندخل جا دورنا
دنكت براسي وطلعت شهكه مني من كثر البجي كبل فتح عيونو يدحك عليه
مصطفى؛: بيج شي سدره
ام سدره؛: اشويه مالها خلك
مصطفى؛؛:يالا مامشكله ندخل نمسك عقد وترتاحين من ترجعين لبيت
كمت واني نفسي جنازه وبكيفهم ياخذوني ويجبوني
دخلنا لقاضي وبابا دخل معنا بالبدايه سال القاضي عن اسمنا
قاضي؛: سدره
سدره؛-نعم
قاضي؛: مصطفى
مصطفى؛: نعم حجي
القاضي؛: محمد علي انتو موافق على زواج بنتك سدره من مصطفى
ابو سدره؛: اي شيخنا اموافق
صوتي مايطلع بالكوه اجاوب صار يسالني عن الصلاه وكم ركعه وكم سؤال عن دين ومصطفى نفس الشي
من سالني موافقه مرتين عاد عليه يالا كلت نعم
روحي جاي تكطع دقيقه ابجي ودقيقه اسكت وبين صدمتي اخخخ ياعلي يمكن من راح يصلك خبري اتزوجت موتي اهون لان اني شفت موتك اهون من يوم الي اتزوجت
تم العقد ومتت من كال القاضي الله يبارك بزواجك?
تم العقد ومتت من كال القاضي الله يبارك بزواجكم ويرزقكم الذريه الصالحه
احس كلبي راح وجع صار بكلبي واحس ماجاي اكدر انتفس
بلكوه وقعت على الورقه وطلعت
مختار:؛ها سدره شبيج
اشرتلو ماجاي اكدر انتفس لحظتها طلع مصطفى
مصطفى؛::سدره بيج شي
مختار؛: تعبت الخمار جاي يخنكها
طلعنا من المحكمه وركبت بالسياره وجانت سياره مصطفى مضللها رفع الجام وكالي
مصطفى؛: ارفعي الخمار واخذي نفس
رفعت الخمار وكمت اسحب نفس. شاف عيوني حمر من البجي سالني
مصطفى؛: كن بجيتي
سدره؛: لا
ابو سدره؛: ها بابا شلون صرتي
هزيت براسي زينه
سدره؛؛ اريد ارجع لبيت ويلادي كعدو هسا
مشت السياره وطلعنا لبيت مصطفى طلب من بابا يحجي معايا وحدنا
ابوسدره؛: اتفضلو فوتو جوى
سدره؛؛ اني رايحه اشوف ويلادي
دخلت جوى وعفتهم لكيت حسوني وماري بالمطبخ سماء اتريكهم
كامو من الريوك وركضو عليه
ماري؛؛ ماما وين رحتي
حسوني؛: ليش ماخذتينا معاج مامي
سدره؛؛رحت ب شغله مع جدو ونانا ورجعت كملو ريوك
طلعت فوك اول من دخلت لغرفه كمت اضرب على نفسي وابجي ملخت روحي حتى ملابسي شكيتها
وعضيت كل اصابعي واصرخخ
سدره؛: اخخخخخ يا الندم اخخخ
وكعت بالكاع حاضنه روحي وارجف دك الباب مختار ماجاوبتو
فتح الباب ودخل شافني ارجف ركض عليه سحب الغطا وحضني ويفرك باكتوفي صار مثل يوم الي عرفت عبدالله هو قتل لؤي سنوني وحده اطك بالثانيه وارجف
مختار؛: سدره حبيبتي شبيج الخاطر الله
سدره؛: ع...عل
مختار؛: ليش بجيتي بكتم سدره ابجي بصوت عالي طلعي الي بكلبج سدره مو زين على قلبج
حضني ويفرك باكتوفي وبعدني ارجف راسي على صدرو ويبوس براسي وانفجرت بالبجي
سدره؛:عللللللي ..ماااريد. اتزوج غيروووو مااريد ماريد
كمت اضرب على خدي
ليش هيجي ابويا سوى بيا ليش
مختار؛؛ صدكي لمصلحتج وراح تعرفين ابويا الي سوى ابد ماضرج بعدين مصطفى صديقي بغلات عمر وطارق عندي
وخوش ولد وشوفي شلون ماراح ياذيج وماراح يخلي قصره عليج
سدره؛؛ اني اريد اموت اني اريد داعش يكتلني بس ماريد اموت من قهري مختار اني الي لمت علي اتزوج هسا صرت اني مثلو
مختار؛؛ماضل شي اسمو بحياتج علي علي اتزوج وسدره هم اتزوجت وكل واحد صار عندو حياة بحدو هذيجه السنوات الي راحت مااتت واندفنت مع لؤي. ياسدره
سدره؛ماكدر ماكاعده اتحمل الله يخليك مختار حباب مصطفى مو صديقك احجي معا كولو اختي ماتكدر اتعيش معاك
مختار؛: شلون احجي هيجي فهميني بعد ماصار العقد
كومي اتعوذي من ابليس وبدلي ملابسج وانزلي بابا يريدج
سدره؛؛ ماكدر
مختار؛؛ عيب من مصطفى سدره كومي
كومني ورحت لحمام غسلت وطلعت
مختار؛؛ خلي اشويه مكياج عيب اتبينين كن بجيتي
سدره؛: ماخلي اي شي ماريد عوفني اريد ابدل
مختار؛اي لاتتاخرين
طلع مختار ورحت لكنتور لبست كلابيه ولفيت الشال ونزلت رحت لاستقبال كعدت وبابا اترخص وطلع
مصطفى:؛شلونج عيني
سدره؛تمام
مصطفى؛: احسج مو على بعضج شبيج
سدره؛:اشويه مريضه
رفعت راسي ودحكت على مصطفى شاب مثقف ودارس مثل مختار هندس نفس عمري واعزب
ماجان بي اي قصره او عيب شنو الي جابرك تخطب وحده منفصله وفوكها اطفال اثنين
نزلت راسي عيب على عين ادحك على رجال من بعدك ياابو حسوني
مصطفى ؛: مبروك علينا سدره
سدره؛: شكرا
مصطفى؛: احم انتي اكيد عرفتني من خلال امي ومختار الي هو صديقي واخويا روح بالروح
اني عايش مع امي وبيت وحدنا تعرفين ب سبب هذا الوضع الي صار اخويا طلع لتركيا عايش هناك واني ماكدرت اعوف الوالده وحدها وهي ماقبلت اتعوف البيت لان بس انعوفو يتصادر
المهم اني حجيت مع عمي على مود الزوااج وكالي على راحتك والصراحه اني عاجبني هاي الجمعه
سدره؛: شنوو ؟؟
مصطفى؛:. ليش عندج شي
سدره؛اي اني مامكمله شغلي
طلعتها حجه شغل شنو
مصطفى؛؛ عادي مامشكله نزل باجر على السوك والي اتحبي تاخذي وبعد الزواج شنو اتريدي بعيوني
سدره؛: بس اني مامحتاجه
مصطفى؛؛ لعد شنو شغلج
سكتت ماحجيت
مصطفى؛: المهم الجمعه الزواج ومن ناحية العرس اني ماسوي اذا اتحبين تلبسين فستان انتي
دحكت عليه وعوجت بحلكي بطران بكلبي هذا والله
سدره؛؛لا ماحب لبستو مرة وحده يكفي
مصطفى؛: اها
سدره؛:ليش ماتعرف
مصطفى؛؛ لا اعرف بس اتمنى تنسين الماضي
ماحجيت شي سكتت
كام على حييلو وكالي
مصطفى؛:اني اترخص وباجر اجي اخذج حتى نتشري ذهب
سدره؛؛شكرا عندي ماريد
مصطفى؛: بس هذا حقج
سدره؛؛ واني متنازله واتمنى ماتصر عليه
مصطفى؛:بس
سدره؛: الله يخليك مصطفى ماحب احد يلح عليه
مصطفى؛؛ ها هيا براحتج حضري نفسج الجمعه اخذج
قدم ايدو واني هم اتصافحت معا سلم وطلع مجرد طلع خليت راسي بين رجليه وكمت ابجي دخلت سماء
كعدت يمي وتمسح على راسي
سما؛:شبيج يعمري سدره كاافي هيجي اتسوين بروحج
سدره؛: سمااء الجمعه راح ياخذني
سماء؛؛ شنو اتسوين هاي هي مادام انخطبتي شنو بعدها
سدره؛: راح اكدر انسى
سمااء؛؛ لو ردت راح تكدرين صدكي
مر الاسبوع بحزن وبس ابجي وحتى ماكعد معاهم معتز سالتو على اماني
كالي مانعرف شي عنهم ولاهي جت ولانحنا انروح عليهم
انكطعو فدمره اماني وصهيب حتى عن اهلها ....
كعدت من النوم وصوت الخطيب مال داعش يصيح بالخطبه الجمعه
الجهاااااد الجهاااااد والله اذا دخلوا المرتدين سوف يتغتصبون اعراضكم وامام اعيونكم
كمت اتعدلت ولميت شعري
سدره؛: همه خلي يدخلون المرتدين وحلال عليهم اعراضكم مثل مانتو اغتصبتو اعراضهم
الله ينعلكم ياجلاب دمرتونا ودمرتو كلشي بينا دخلت ماما لغرفه
ام سدره؛: يالا سدره كومي كملي شغلج
سدره؛؛ استغفر الله خير شنو اتريدين
ام سدره؛؛ سدره اني امج مو بنتج ليش تحجين معايا هيجي باجر ماري تحجي معاج نفس الطريقه
سدره؛: عود اذا سويت ب ماري مثل ماسويتو بيا انتو استاهل
ام سدره؛: عاشت ايدج بنتي
ضاجت وطلعت وكمت وكفت الم بغراضي ودموعي تنزل كعدت الويلاد يوم الجمعة مايكعدون من وكت
نزلت جوى فرغت صينيه وحدنا وكعدت ناكل اني وويلادي
كملت وغسلت مواعينا وطلعت فوك سبحتهم وسبحت
بل6المغرب كملت وكفت كدام المرايا وابجي اخخخخ حبيبي سامحني يعمري سامحني
سمعت صوت الهلاهل وزدت بالجي التفتت لسماء
سدره؛: الي كاعد يصير حقيقه لو كابوس
سماء؛؛ مثل مارضيتي بامر الواقع قبلها لازم هسا ترضين
فوضي امرج لرب العالمين سدره وبيها خير وصالح الج
جابت كلينكس ومسحت دموعي وعدلت الكحل ماردت اخلي بس سماء اصرت وخليت كحل فقط
نزلت جوى وجنت لابسه فستان عدل ولافه الشال
دخلت لاستقبال سلمت
وردو السلام وهلهلوا
جانو كاعدين ام مصطفى وخالتو ومعاهم بنات عرفت بنات خالتو
ومصطفى كاعد واتقدمت بوستهم ومصطفى هم وكف اتصافح معايا وباسني من راسي
ابتسم بوجهي وبلكوه ماسكه نفسي ماريد ابجي
مصطفى؛: اتفضلي اكعدي يمي
كعدت يمو والبنات كامو يغنون بصوت ناصي ويصفكون
دنكت براسي ودموعي كامت تنزل اشويه واترخصو جان جايب حلقه معا مصطفى ولبسني هي احس خنكني
خنكني بيها
مصطفى؛: انروح
سدره؛:براحتك بس اشوف ويلادي
مصطفى:؛ماراح يجون معانا
سدره؛؛ امي ماتقبل كالت خليهم يمي
مصطفى؛: براحتج بااجر نجي ناخذهم
سدره؛: اوكي
رحت لغرفه ماردت يجون يكعدون بل استقبال ويشوفني
رحت لغرفه لكيت طارق يلعبهم جيت عليهم حضنتهم وبستهم
ماري؛:ماما صح صار عدنا بابا ثاني
سدره؛؛ منو كالج هذا الكلام
طارق؛؛اني كتلها
سدره؛؛ وانت شلون اتكولها هيجي
طارق؛؛شنو معرفني شنو اكولهم عجل
حسين؛: ماما اني ماريد غير بابا علي
سدره؛؛ حبيبي ابوكم علي وبس ماعندك غير اب وانت طارق تنجب وتسكت
طارق؛؛ اسف مو قصدي
حضنتهم وكمت ابجي باسني طارق من راسي وطلع وفهمتهم اني رايحه نتقل لغير بيت ومن يجي بابا راح ياخذكم
افتهمو عليه بوستهم وطلعت مع مصطفى لبست الخمار وطلعنا ابن خالتو بالباب سلم وباركلنا
ركبت بالسياره ومصطفى يسوق التفتت على مصطفى من كال
مصطفى؛: مبرووك سدره عليه وعليج
اتذكرت علي ب يوم عرسنا من كالي
علي؛؛ واخير صرتي ليه قزومتي
ماجاوبت مصطفى ودرت وجهي على الجام وكمت ابجي واشهك
مصطفى؛ شبيج يابنت الناس هلكد افراك اهلج صعب عليج
سكتت ماكدرت اجاوب طلعنا لبيت مسكني من ايدي مصطفى ودخلنا كام يركص ابن خالو على صفكت البنات واشويه هوسات
حضرو العشه اتعشوا ماكدرت اكل معدتي نار احسها بعدها ام مصطفى كالت اخذ عروستك وروح
باركلونا ومصطفى اترخص منهم ومسكني من ايدي ودخلنا لغرفه وسد الباب
واحس دخلني بقبري واخذ روحي مع سدت الباب ....
