رواية ضحية والدي الفصل التاسع عشر بقلم يمهر حسين
تعصبت علي وكمت احجي .اني مو على مزاجك وكت تريد تجي تلكاني هذا موحجي
قصي:هوووب هووب عيني على كيفج اكلتيني بلسانج .خل افهمج بعدين احجي
سهى:شو يله فهمني
قصي:لعد مادام كبيتي هيج عليه راح احجيلج كلشي واكون صريح وياج
سهى:خير شكو
قصي:بصراحه اني جذبت عليج سيارتي موعاطله ومابيها شي .اني يوميه اجي هين واباوع بلكي اشوفج .
انصدمت من كالي هيج
صار شهرين تقريبا اضل اجي لهنا وانتضر عسى ولعلى اشوفج
سهى:شنو صدك تحجي
قصي:لاتحجين شي خلي اكمل مادام حجيت لان يجوز ماحجي بعدين.ماعندي حل حتى اشوفج غير هنا.كمت اجي من الصبح للضهر الى ماكل الطلاب والطالبات يطلعون.اذكر مرة الصبح من جيتي شفتج ويه بنت طالبه جنتن تمشن اجيت امشي سريع عليجن بس مالحكت بيجن فتن جوة. وراها ماشفتج الى حد يوم الخميس من شفتج تمشين وحدج حسيت فرصتي رحت كبل وراج ماعرفت شون ابدي وياج بالكلام كمت كلت خلي اتحرش بيها واشوف ردت فعلها.بصراحه من يوم عفتج وكت هزمتج مارحتي عن بالي ابد ودايما افكر بيج واكول شلونها شلون وضعها.سهى بصراحه اني احبج
هو ويحجيلي هالحجي احس هاي فرحتي بالدنيا مويكولون الانسان يبحث عن السعادة احس هاي سعادتي اي هاي اكيد سعادتي.شنو احجيلكم ماكدر اوصفلكم شعوري بذيج اللحضات يجوز تكولون دتبالغ .لا ابد مادابالغ اصلا ماكو كلمات اعبر بيهن عن فرحتي ودكات كلبي احس عيوني دمعن حتى كمت ارجف .
سهى: دنكت راسي من كالي هيج وكمت اعصر بديني وابلع بريجي معرف شنو اجاوبه.
قصي:شبيج . شوفي اني مخلي كلشي ابالي شنو ممكن يكون جوابج.اعرف ماراح تتقبلين هيج كلام بالاخص من شخص كان بيوم من الايام خاطفج.شنو يكون جوابج راح اتقبلو يجوز راح اتقبلو هس بس كدامج بس من اروح الله اليعلم شيصير بحالي .بس المهم انو اني لازم اكلج الي بكلبي حتى ماالوم نفسي بيوم...
سهى:بقيت ساكته ماكلت اي شي
قصي:كولي شي لاتضلين ساكته احجي اي شي
سهى:والله ماعرف شكول.فاجئتني كلش
قصي:هذا الي كاعد يصير وياي .داكول الي دااحسو
سهى:بعدين دقيقه انت مو خاطب
قصي:جنت خاطب هس لا
سهى:ليش.شنو صار
قصي:مانتراهم اني وياهم كلهم خربته بسبب المشاكل وعفتهم كلهم صارت هواي مشاكل وعرفت اشكد هما طماعين وهمهم الفلوس ماكدرت اتحمل اناسبهم وابقه وياهم خري كلشي بينه
سهى: اها هيج يعني.احسن
قصي:هس ماجاوبتني .ولا كلتي اي شي
احترت كلش بهاي الاثناء اكلو على الاحساس الي صار وياي والي ديصير وهم اصارحه لو اسكت
كلت بيني وبي نفسي لا ماكلو هس خلي اثكل شوي عيب
سهى:خليني افكر
قصي:بشنو.يعني تفكرين انو تكليلي اي لو لا او تفكرين شلون راح تضربيني هس .شو خفت منج على هذا السكوت هههههه
سهى:اقصد افكر بكلامك واردلك خبر
قصي:اوك.انتضر ردج باجر
سهى:صدك.ليش اختفيت.وكت كتلي الاحد وراها اختفيت ليش انت موتكول جنت اجي يوميه على مود اشوفج وشغله السيارة جذب لعد ليش اختفيت
قصي:اختفيت لانو الحجيه توفت ولحكت عمي الله يرحمهم اثنينهم وتعرفين لازم اروح وابقه هناك لان ماكو احد يستقبل الناس
من كالي هيج انقهرت حيل عليها وكمت ابجي.هي جانت زينه وياي والها موقف وكت خلصتني من صفوان
قصي:يمعودة لو ادري هيج تبجين جان ماكتلج.
سهى: اوف الله يرحمها انشالله .زين شون ماتت
قصي: تصدكين نفس عمي بالضبط حتى الوقت نفس الوقت.هي جانت تريد تلحكو من مات وهي تهذي بالموت
سهى:انشالله مثواهم الجنه
قصي:امين.من توفى عمي جان كاتب وصيه بيها كل املاكو والاراضي بأسمي وأسم بنتو نور.هو ماعندو بس بنت وحدة مزوجه. من عرفو وصفوان وعدنان واهلهم كامو يريدون مني فلوس ويسسون مشاكل .انطيتهم من الورثه وعفتهم كتلهم مابيني وبينكم اي شي حتى سلام ماكو بينه.ومن هذاك اليوم عزلت روحي البيت الي جانو بي عمي وعمتي اجرتو يم ناس
واني اشتريتلي بيت هنا بداخل بغداد بعدت عنهم.وعرفت راحتي وين وكت خلصت منهم
كاعد نحجي ونسولف واجه البواب مال الجامعه يريد يسدها لان كلها طلعت بس احنه ضلينه.حتى الخط الي ارجع بي طالع وعايفني
طلعنه من الجامعه
قصي:فكري زين بس لاتأخرين عليه باجر اريد جواب
سهى:انشالله
رحت بتكسي.وكل الطريق افكر شنو راح اكلو باجر
وصلت البيت وفتت جوة باوعت امي واهلي واكفين ينتضروني: ولج وين جنتي انخابر عليج ماتردين وخابرنه عالخط يكول نخابرها ماترد ورايحين وعايفينج متنه من الخوف عليج
سهى: يوم مورحت للمول وشفت صديقات ليه هناك وتأخرت وياهم.فتحت الجنطه 30 مكالمه فائته من اهلي وابو الخط .بس موبايلي صامت لان من طلعت من المحاضرة نسيت ماعليته
ماما:لعد شو كلشي مومشتريه موعساس رحتي للمول
سهى:هاا والله يوم ماعجبني شي بضاعه قديمه
ماما:شوفي بنتي لاتسوين بينه هيج سالفه متنه من الخوف عليج
سهى:اي يوم حقكم والله بعد ماعيدها
رحت لغرفتي اوووي شكد فشله خبلت العيله واني مدرس بنفسي.بدلت وتمددت كبل بفراشي ورجعت بأفكاري الكاسيت كلو لي ورى كل الكلام الي كالي اياه رجعت اذكره واتأمل بي واحس الدنيا بس ليه.نمت وكعدت الدنيا مغرب على صوت المطر والكهرب طافيه
فتحت عيوني البردة مال الشباك مفتوحه والمطر قوي عالشباك والغرفه بدت تصير ضلمه بس ضوة شوي يفوت من الشباك
كمت على حيلي رحت عالشباك واباوع عالمطر شون يجري بالحديقه والطارمه منضرة يجنن.كمت انفخ عالشباك واكتب هاي الحركه الي كلنه يعجبنه نسويها
كتبت.(الدنيا حلوة كلش)
فعلا هيج جانت بعيني
نزلت من غرفتي شميت ريحت اكل طيبه لكيت امي مسويه العشه ومكملتو علنار
كعدت يم الصوبه كازيه امي مشغلتها لان طافيه الكهرب بالهول الي دايما نكعد بي اكثر شي.بي قنفات وتلفزيون ومفتوح عالبيت كلو .هذاك اليوم مدي مايخلص ابقه هيج فرحانه. بعدين ندك الباب ويونس فتحو طلع بابا
فات للبيت واجه عليه للهول وكالي:بنتي اكو واحد ماسكينو الشرطه مشتبه به يكولون يمكن واحد من الخاطفينج ويريدون تروحين باجر حتى تشوفينو اذا منهم او لا.
......
اجه ابوي وكالي لازم باجر اروح حتى اشوف الشخص الي ماسكينو هل هو احد الخاطفيني لو لا
من كالي هيج تخربطت وارتبكت حيل كمت افكر بس لايطلع قصي متت خوف.احس هالخبر خرب عليه كل فرحتي .
ماما:الله كريم انشالله يطلع منهم وياخذ حقنا الله
كمت ادعي انشالله يطلع موقصي خلي اي واحد بيهم عادي بس لاقصي.بصراحه ابد ماريد يصير علي شي اوينسجن لان هوالي ساعدني وجان دايما زين وياي
كمت افكر اذا طلع هو شنو راح اكوللهم .احس دماغي تخربط ومعد اصبر لي باجر.اووف ياربي يعني ماتكمل فرحه وياي ابد
سهى:بس باجر عندي دوام
بابا:اي عادي شيصير اذا غبتي يوم الشغله مهمه لازم تروحين
سهى:انشالله
خلص اليوم ورحت لفراشي كل اليل حلملنه بهالسالفه ماصدكت على الله اجه الصبح كعدت وكعدو اهلي وتريكنا.
بابا:يله بنتي استعجلي حضري نفسج حتى اخذج للمركز
سهى:اي هس
حضرت نفسي عالسريع ورحنه.الجو مطر قوي ورعيد وبرد كلش.وصلنه المركز تلكانه ضابط واخذنه للمكتب ماله بالبدايه.بعدين كال للجندي جيبو المشتبه به
كلبي يدك بهذا الوقت
فات واحد .باوعت علي مو منهم غير واحد
الحمدلله ياربي انو مو قصي
الضابط:ها اختي عرفتي لو لا
سهى:لا مو منهم
الضابط:متأكدة؟
سهى:اي متأكدة
بقو يحجون ابوي والضابط شوي بعدين طلعنه.
احس كلبي برد بردة وارتحت كلشش
رجعت للبيت .وبديت افكر بقصي هواليوم شي اكيد راح يجي ينتضرني ..يله على باجر
عدة اليوم.ورحت ثاني يوم للدوام.خلصت وطلعت باوعت لكيته يم الباب ينتضرني.فتنه للجامعه بعد ماانطى هويته وكعدنه بنفس المكان
قصي:اي شونج اخبارج .ليش ماجيتي البارحه
سهى:والله صارت شغله ضروريه وماكدرت اجي
قصي:خير شنو صار
سهى:من رجعت من الدوام ابوي كالي انو الشرطه ماسكين واحد مشتبه به من الي خطفوني ولازم اروح اشوفه اذا منهم لو لا
قصي:اهااا هيج السالفه.اي ورحتي
سهى:اي رحت وشفته واحد ماعرفه.تصدك من كالي ابوي واني خايفه حيل خفت لايطلع انت
قصي: ليش. ليش خفتي عليه يعني؟
سهى: هاا بصراحه اي
قصي: وليش خفتي حتى ماانسجن مثلا.مو اني هم واحد منهم
سهى: بس انت تختلف
قصي:شون اختلف
سهى:انت ساعدتني وهزمتني من دون مايدرون وجنت زين تتعامل وياي
قصي:اسألج سؤال جاوبيني بصراحه
سهى:اسأل
قصي:لو جان هذا الشخص الي رحتي البارحه وشفتي لو جان اني.شنو جان كلتي للشرطه
سهى: هذا السؤال الي دمرني وخلاني كل اليوم تعبانه .تريد الصراحه وراح اجاوبك الصراحه.جان كلت ماعرفه
قصي:صدك! يعني متأكدة
سهى:اي متأكدة
قصي:صدكيني بعد ماسمعت جوابج هذا عندي استعداد ابقه كل عمري بالسجن ولاراح اهتم...على كلا ماكلتيلي شنو جوابج
سهى:موجاوبتك
قصي:اقصد على سؤالي البارحه.ولو داحس اعرف شنو جوابج
سهى: هاا وشلون حسيت بله
قصي:من خلال كلامج قبل شوي .يعني ليش حتى تخافين عليه لايمسكوني الشرطه اوانسجن.شنو معناها هاا؟
استحيت من هيج كالي
قصي:جاوبيني ولاتستحين راح اتقبل كلشي
ضليت ساكته مجاوبته اريد اكلو اي واني هم احبك واحجيلو على كل مشاعري الي صارت وياي.كل مااريد اكلو احس صعبه عليه واتردد
ماعرف شلون جتني الجرئه فجاة وكتلو: مشاعري تجاهك مثل مشاعرك تجاهي.كتلو هيج ودرت وجهي عنو من الخجله
قصي:صدك صدك دتحجين.باوعي بوجهي
ضل يكلي باوعي عليه وكوليها نوب.استحيت حيل اخر شي كتله:ايي ايي مثل ماكتلك
ضحك من كتلو هيج وكال:تدرين هس شكد فرحتي جبيرة ومتنوصف جنت خايف لاترفضين
بقينه نحجي ورحنا بغير عالم .عالم كلو مشاعر صادقه وحلوة ماحسبنه احساب للي راح يجي بس الي نعرفو مشينا ورة مشاعرنه.انطاني الرقم ماله وكتلو لاتخابرني ابد اله اني اخابرك
رجعت للبيت الفرحه جبيرة ومبينه عليه.اريد يعدي النهار حتى يجي الليل واروح لغرفته واحجي وياه
بالبدايه جنت بس ادزلو رسايل وهو هم جان يدزلي
بعدين صرنه نحجي اتصال ونضل للصبح نحجي منحس بالوقت وبالكوة اكعد الصبح لان اكون سهرانه
كانت هاي من الفترة من احلى ايام حياتي وجنه كل يومين ثلاث نلتقي نطلع سويه ياخذني للمنتزهات والمطاعم والسوك كل مكان رحنه علي والنه بي ذكريات
صادفت اجت نهى .ونهى تبات بغرفتي شوي
فبعثتلو رساله كتبت بيها اليوم مانكدر نحجي لان اختي وياي بالغرفه
رجع دزلي:مايحتاج اتصال بس عالاقل هلي نتراسل بالرسايل كتله اوك
اني ونهى جنه بالغرفه تانام هي تمددت بفراشها
جان يبعثلي رساله(ها اختج نامت لو لامشتاقلج هوااي)
رجعت بعثتلو وهو يدز واني ادز باوعت الموبايل راح يخلص شحنه دزيتلو رساله (اخلي الموبايل عالشحن فد ربع ساعه وارجع اراسلك)
خليت الموبايل عالشحن ووتمددت بفراشي معرف شون اخذتني النومه وغفيت بس مامسحت الرسايل
ورى شويه احس نهى تكعد بيه.كعدت باوعت
نهى: ولج شنو هالرسايل اكعدي اليوم ابتلي بيج
فزيت بسرعه من كالتلي هيج
سهى:خير شكو
نهى: كعدت اسوي حليب لسمسم وسمعت صوت موبايلج اخذته شفت رساله قريتها مكتوب( ها حياتي وينج شنو نمتي) بعدين فتحت الموبايل شفت كومه رسايل بينكم هس تفهميني كلشي وهذا منو؟
كمت ارجف من كالتلي هيج معد اعرف شجاوب
نهى: شوفي ترى كلشي قريت جذب ماريد يله احجيلي منو هذا وشوكت صار وشلون صار .انتي اختي ومن حقي ااعرف بلكي يضحك عليج يله احجي
سهى:هذا واحد احبه ويحبني واني متأكدة انو صادق وياي ومو يضحك عليه
نهى: شنو اسمو ومن وين هو
ماكدرت اجذب عليها وكتلها على كلشي كتلها هذا قصي الشخص الي هزمني وكت جنت مخطوفه.تخبلت من كلتلها هيج وكامت تعيط عليه
نهى:وووولج خبببله انتييي شوون هيييج تسووين مافكرتي بينا.شوووفي من اليييوم تكطعين علاقتج بي فهمتي
سهى: يعني بشنو افكر يحبني واحبه وكلامج ماراح يغير شي عندي.من كتلها هيج ضربتني راشدي.
