رواية ابن الذوات والصعيدية الفصل الاول 1 بقلم هويدا زغلول

في بيت كبير في الصعيد كانت واقفه شريفه وابنها سالم  ومراته حنان والجده نبويه كانت قاعده علي كرسي متحرك وبعدها وقفت عربيه كبيره قدام البيت ونزل حازم ابنها 

حازم قرب من امه وقال 

حازم 

ازيك يا امي عامله ايه ما تعرفيش انت وحشاني ازاي بجد وبعدها سلم على اخوك وعلى مراته وباس ايد جدته وقال لها وانت يا نونه وحشاني جدا 

 في الوقت ده الجده ضربته على ايده وقالت بضحك 

الجده نبويه

اتحشم يا واد انت امال ايه نونه دي بقى هو اني لساتني بت صغيره علشان تدلعني بالدلع الماسخ ده اني ست كبيره وليا هيبتي وقدري في البلد كلها واللي يسمعك يقول اني حفيدتك مش جدتك يا قليل الادب

حازم

يا نونه يا حبيبتي انتي زعلتي ليه بس ده اني مهما كبرت ولفيت الدنيا كلها برضك هشوفك نونه اللي كانت مخبيالي الجنيهات تحت المخده وتديني منها واني صغير وبعدين انتي عارفه زين اني ما اقدرش ازعلك ابدا انا بضحك معاكي يا ست الكل 

وبعدها قربت منه امه شريفه وقالت ليه 

شريفه

خلاص يا ولاد بلاش الحديت ده دلوك مش وقته وتعال يا حازم ادخل جوا ما تعرفش اني عملتلك كل الوكل اللي بتحبه من اول ما عرفت انك راجع البلد ومقضياها في المطبخ من الصبح ومستنياك على نار

وبعدها حازم مسك ايدها وقال 

حازم

استني يا امي بس عشان خاطر معايا ضيفه ولازم تعرفوها الاول

وفي الوقت ده باب العربيه اتفتح ونزلت كارما وكانت لابسه قصير اوي وبصت حواليها وقالت

كارما

هاي يا جماعة بجد متعرفوش أنا فرحت قد إيه لما عرفت إني هاجي أقعد هنا الفترة دي واو البيت تري شيك أوي

الكل كان مصدوم من شكل كارما وبعدها 

سالم شال عبايته من على كتفه ومدها ناحيتها وقال

سالم

خدي استري روحك بالعبايه دي يا بت الناس ايه اللبس اللي انتي لابساه ده واحنا واقفين اكده في نص الدار وهي مين دي يا حازم

حازم

يا سالم اهدا شويه اللبس ده عادي خالص في القاهره وعلى فكره دي كارما وتعالوا ندخل جوا بدل الوقفه دي كلها

وبعدها حنان مرات سالم قربت علي ودنه وبعدها قالت ليه 

حنان

يا ساتر يا رب دي البنيه دي لو عدت من نص البلد النسوان كلاتهم هيقعدوا يحكوا عنها شهرين قدام

ودخلوا كلهم جوا البيت وبعد شويه حازم خد امه ودخل بيها اوضتها وقف قدامها وقال

حازم

يا امي اني جبت كارما اهنيه علشان تتعرفي عليها زين لان اني بحبها وعايز اتجوزها وعايزك تبقي راضيه عني وعن اختياري

شريفه

يا نهار اسود  هو اني سمعت زين ولا اني بحلم شكلك اكده اتجننت رسمي يا حازم انت عايز تتجوز البنيه دي اللي نازله قدام الدار بالمنظر ده وتخلي البلد كلها من بعد ما كانت بتحترمنا تتحدت علينا وسيرتنا تبقى على كل لسان لا يا ولدي انسي الحديت ده خالص اني مش موافقه

حازم

وليه يا امي هو انتي حكمتي عليها من هدومها بس كارما بنت متعلمه ومحترمه وطيبه واني حر في اختياري واعمل اللي اني عايزه ومش معنى اني جيت البلد اهنيه ابقى اسيبكم تتحكموا في حياتي كلها

شريفه

لا يا حبيبي اني ما بحكمش عليها من فراغ لكن اني عارفه البلد اللي احنا عايشين فيها وعارفه الناس اللي ما بتسيبش حد في حاله ولو فاكر ان ابوك الله يرحمه مات وما حدش هيقدر يوقفلك يا حازم فاني ست وباصلك ووريني اكده هتعمل اللي انت عايز تعمله ده ازاي

حازم

يبقى انتي من الاول رافضه تسمعي ولا حتى تعرفيها يا امي وكل اللي يهمك كلام الناس وبس

شريفه

ايوه يهمني كلام الناس لما يكون متعلق بسمعة دار كبيره زي دارنا ويهمني اسم ابوك اللي تعِب العمر كله علشان يكبره وسط الخلق كلاتهم

حازم

واني حر يا امي واعمل اللي انا عايزه وهتجوز كارما يعني هتجوز كارما

وبعدها لف حازم وخرج من الاوضه وساب امه قاعده مكانها وهي بتبص للباب بقلق وخوف من اللي جاي

وفي الوقت ده دخل حازم المطبخ ولقى واحده واقفه عند البوتاجاز وقال ليها 

حازم

بقولك ايه يا بت انتي سيبي اللي في يدك دلوك واعمليلي كباية قهوه مظبوطه وهاتيها على الجنينه بسرعه

وبعدها فال بصوت واطي 

 اصل راسي هتنفجر من كتر الحديت اللي سمعته من اول ما دخلت الدار

وزينه بصت ليه من فوق ل تحت وبعدها قالت بعصبية 

زينه

بت لما تبتك يا واد انت انت فاكرني خدامه عنديكم في الدار ولا ايه علشان تدخل علي وتدي اوامر بالشكل ده انت شكلك ناسي نفسك زين

حازم

يا خبر اسود هو انتي بتكلميني اكده داني لو قلت كلمه واحده بس الكل هيجري يتنفضلي وانتي جايه ترفعي صوتك علي انتي عارفه اني مين زين علشان تتحدتي وياي بالطريقه دي

زينه

وانت بقى عارف اني مين علشان تدخل علي زي العاصفه وتحدتني اكده اني ابقى زينه بنت مهران عمده البلد دي ولو انت ابن الكبير يبقى اني بنت العمده والراس بالراس والعين بالعين

وبعدها ضحك حازم وقال ليها 

حازم

يا بنت الايه معقول انتي زينه اخت حنان يا نهار ابيض ازيك يا زينه عامله ايه بس والله ما عرفتك اصل اخر مره شفتك فيها كنتي بضفاير وطول النهار تجري ورا عربيه الرش وتزعقي للعيال في الشوارع

زينه

يعني انت راجع من القاهره  علشان تفتكرلي فضايح العيال الصغيره وبعدين قهوه اللي عايزها مني ما تروح هات السنيوره اللي جايبها وياك دي اللي لابسه جيبه قد الكف تعملك القهوه ولا هي ما بتعرفش تدخل مطبخ ولا تمسك كنكه في يدها

حازم

يا دي النيله هو كمان موضوع كارما وصل لعندك انتي كمان اختك حنان شكلها لساتها زي ما هي ما بتبلش في بوقها فوله وكل حديت البلد لازم تعرفه وتعيده عشر مرات

زينه

لا يا حبيبي دي مش حنان اللي قالت الحكاية بلد بحالها من ساعه ما البنيه نزلت من العربيه والخلق كلها واقفه على رجل واحده والنسوان في البيوت ما صدقوا لقوا موضوع جديد يتكلموا فيه

حازم

والناس مالها ومالها هي تلبس ايه ولا تعمل ايه دي حره في نفسها ومحدش له صالح بيها ولا بحياتها

زينه

ايوه حره في نفسها لما تكون في القاهره لكن اهنيه في الصعيد لكل دار عاداتها ولكل بلد اصولها وان كان انت طولت بعيد عن البلد يبقى احنا لسه عايشين وسط ناس ما بترحمش حد

حازم

والله ما اني هغير رأيي ولا هسيب كارما علشان كام واحده قاعده على المصاطب تتحدت وتقول كلمتين

زينه

اللي يريحك اعمله يا ابن الذوات بس افتكر زين ان الحديت اللي بيطلع في البلد زي النار في الهشيم لا بيعرف كبير ولا صغير ولا بيسيب حد في حاله

حازم

وانتي مالك زعلانه اكده ليه هو انتي اللي هتتجوزيها ولا اني

زينه

اني ماليش صالح غير اني بقول اللي شايفاه وبعدين بدل ما انت واقف تتخانق وياي روح شوف امك اللي قاعده في اوضتها زعلانه من كلامك اكتر ما هي زعلانه من البنيه نفسها

حازم

هو انت كمان لحقتي عرفتي ان امي زعلانه 

مش فاهم هو فيه اي 

وبعدها حطت أيدها علي كتفه وقالت 

زينه

يبقى ربنا يعينك على اللي جاي يا ولد الكبير

وبعدها خرجت زينه وكانت كارما قاعده وحنان قاعده معاها وحنان قالت ل زينه 

حنان

تعالي يا زينه شوفي البنيه دي اسمها كارما بتشتغل دكتوره في مصر زيها كيف الرجاله وبتلف وتروح وتيجي لحالها من غير ما حد ياجي وياها

وبعدها زينه قعدت وسطيهم وقالت 

زينه

ايوه يا حنان الكلام ده عادي في مصر ومش جديد يعني هناك البنات بيشتغلوا في كل حاجه والدنيا غير اهنيه خالص

كارما

بالمناسبه يا جماعه انا نفسي اشرب هوت شوكليت دلوقتي اوي هو في حد هنا بيعرف يعمله

وساعتها زينه شاورت على المطبخ وقالت ليها

زينه

روحي على المطبخ هناك هتلاقي اللبن والقهوه والسكر وكل اللي انتي عايزاه اعمليه لحالك

كارما

هو انتي عارفا تعمليه يعني

زينه

 اه طبعا عارفه بيتعمل ازاي بس اكيد مش هعمله لك يعني وبعدها قامت وقفت وقالت انا طالعه اطمن على خالتي شريفه اشوفها عامله ايه

وبعدها طلعت زينه فوق وخبطت على الباب ودخلت الاوضه ولقت شريفه قاعده على السرير وعينيها مليانه دموع

شريفه

كويس انك جيتي يا زينه تعالي شوفي المصيبه اللي اني واقعه فيها ولدي راجعلي بعد السنين دي كلها وبدل ما يفرح قلبي جايبلي وجع راس وهم يهد الجبل

زينه

ده انتي مصيبتك مصيبتين يا ام سالم مش مصيبه واحده بس البلد كلها دلوك ما عندهاش سيرة غير كارما ولبسها وابنك اللي مصمم يتجوزها والناس من هسه بدت تلوك في الحديت

شريفه

وعشان اكده اني عايزاكي تساعديني يا زينه انتي الوحيده اللي حازم بيسمع منها كلمه زين وقدرها عنده كبير ولازم تخلينا نمنعه من الجوازه دي قبل ما تحصل

زينه

واني مالي يا ام سالم دي حياته وهو حر فيها وبعدين لو رايده الصراحه حازم راسه ناشفه ولو حط حاجه في دماغه ما حدش يعرف يطلعها منها

وفي الوقت ده الباب اتفتح ودخلت مديحه ام زينه وهي متعصبه

مديحه

اني قلتلك ميت مره يا زينه ما تخرجيش من الدار وتيجي اهنيه خالص وانتي ما بتسمعيش الحديت ابدا وطلعي بتي من الموضوع ده

وانتي  يا شريفه خلي ولدك يتجوز اللي هو عايز يتجوزها انتي عايزه زينه تحل الموضوع دي ازاي

شريفه

وفيها ايه يعني يا مديحه لما زينه تتجوز حازم اني عمري ما هلاقي بت احسن منها ولا اصلح منها لولدي وهي عارفه دارنا واحنا عارفينها من يوم ما اتولدت

مديحه

اني وافقت على جوازة حنان لسالم وخلاص لكن زينه لا يا شريفه زينه ليها نصيبها في مكان تاني والموضوع ده اتقفل من زمان وما عادش يتفتح تاني

شريفه

ليه بس يا مديحه انتي عارفه زين ان حازم ما يعيبوش حاجه واصل كبير وولد ناس ومتربي

مديحه

اني قلت كلمتي وخلاص ويلا يا زينه قدامي على الدار وما عايزاش اسمع حديت تاني في الموضوع ده

وبعدها مسكتها من ايدها وخرجت بيها من الاوضه وفي نص الطرقة لقوا حازم واقف قدامهم

حازم

ازيك يا خالتي مديحه عامله ايه والله ما عايز اقولك انتي وحشاني كيف من زمان وكل ما اجي البلد اسأل عليكي

مديحه

......

وبصتله من فوق لتحت من غير ما تنطق ولا كلمه وبعدها لفت وشها ومشيت وهي ماسكه ايد زينه بقوه وسايباه واقف مكانه مستغرب من معاملتها ليه

وكانت زينه وصلت البيت وبعدها قالت لامها 

زينه

خلاص يا امي سيبي يدي بقى احنا وصلنا الدار اهو اني مش فاهمه ماسكاني اكده كيف ما تكوني قابضه على حرامي عمل مصيبه كبيره هو فيه ايه بس واني من امتى قلتلك اني عايزه اتجوز حازم علشان تعملي كل اللي عملتيه ده قدامه

مديحه

اطلعي من دول يا بنت بطني اني عارفاكي زين وعارفه اللي جواكي اكتر من نفسك ومتأكده مليون في الميه انك عشجاه من يوم ما كنتوا عيال صغار وبتجري وراه في كل مكان

زينه

كان زمان يا امي وكل ده خلص من سنين طويله والولد دلوك رايد يتجوز واحده غيري واني لا يمكن افكر فيه ولا اشغل بالي بيه من اساسه

مديحه

الولد ده مش زينا يا زينه واني خلاص اديت كلمه لسيد وهيتبهدل وشي وسط الناس لو رجعت في كلامي ولا عشان خاطر ابوكي راقد على السرير ومش قادر يقوم بقيتي فاكره ان ما عادش ليا كلمه عليكي

زينه

واني لا هتجوز سيد ولا هتجوز غيره واسمعيها مني زين يا امي وما تنسيش اني بنت العمده وعمري ما اقبل بواحد زي سيد ده وانتي عارفه ومتأكده كويس قوي انه حرامي ومش راجل يؤتمن على دار ولا على حرمه

مديحه

كان زمان يا بتي كان العمده لما كان واقف على رجليه والرجاله كلها تسمع كلمته لكن دلوك ابوكي بينه وبين القبر خطوه واني اللي بكلمتي تمشي في الدار دي وكلمتي هتتنفذ يعني هتتنفذ سامعه ولا لا

زينه

حتى لو دبجتني  يا امي اني ما هتجوزش واحد اني مش رايداه ولو الدنيا كلها وقفت قدامي

مديحه

اعملي اللي انتي عايزاه بس افتكري زين ان العناد عمره ما جاب خير لحد

وبعدها سابتها مديحه ودخلت جوه الدار وهي متعصبه بس   زينه وقفت  مكانها والدموع ماليه عينيها وبعد ثواني مسحت دموعها ودخلت اوضة ابوها

زينه

سامحني يا يابا اني عمري ما كسرتلك كلمه ولا رديتلك طلب لكن الموضوع ده بالذات ما اقدرش اوافق عليه اني مش هتجوز جوازه اني مش عايزاها

محروس

تعالي يا بتي اقعدي جنبي وما تعيطيش اني عارف زين ان قلبك موجوع وعارف كمان انك مش بتقولي لا غير للحاجه اللي واصله لحد روحك

زينه

والله يا يابا لو طلبوا مني عمري كله ما كنتش اتأخرت لكن سيد ده لا اني ما بطيقوش ولا بارتاحله

محروس

واني كمان ما عايزكيش تعملي حاجه غصب عنك يا بتي حتى لو الموضوع ده هيكون على حسابي اني شخصيا

زينه

يبقى كلم امي يا يابا وخليها تفهم اني مش موافقه

محروس

هكلمها يا بتي لكن في نفس الوقت عايزك تعقلي وتسمعي كلامي زين وما تعشميش روحك في حازم

زينه 

خلاص يا ابوي هو اختار غيري  وانا لا يمكن افكر فيه واصل 

وفي الفيلا كانت حنان  قاعده معاه  معاه سالم وقالت ليه 

حنان 

هو انت ناوي تسكت على الحديد اللي امك بتقول عليه ده وانا اخوك يكون الكل في الكل

 الفصل الثاني من هنا