رواية تحت ظل السعف الفصل الواحد والثلاثون 31 بقلم ميار

‏مـثَـل نار بكطـن مابيـَت مهَـمهوم

باردَبالوجـَه وأنِـه احترك سكته

ـــــــــــــــــــــــــ♕ـــــــــــــــــــــــــــــــ

فاطمه:: وره ما طلعوا يدورون عليها، خف المطر شويه. لبسنه عباياتنه اني ومهى وطلعنه لبيت خالي محمد. من طبينه لبيتهم، لكينه البنات كاعدات يم عمتي. عيونهن كلها خوف وتعب، وكأن محد ذايگ طعم الراحه من ساعة الراحت ريام. سلمنه وكعدنه وياهن، وكل وحده بينه تحاول تقوي الثانيه ظلينه ننتظر منهم خبر حتى لوكلمة تطمن الگلوبنه

يمشي الوكت بطيئ بشكل يوجع الگلب محد يحچي ، وحتى إذا وحده حجت ترجع تسكت وكأنه خايفه من الجواب. عيوننه بين الباب والتلفونات، ننتظر أي خبر، أي اتصال، أي شي يكسر هالقلق.

العايشينه كل شويه ندگ عليهم، مرة ومرتين ، بس ماكو جواب. يرن الموبايل وحد يجاوب، عمتي جانت كل شويه تمسح دموعها بطرف شيلتها وتكول: "

امنه:: يا رب ردها إلنه سالمة"

البنات كلهن:: امييين 

-الساعتين مرن لا أحد رجع، ولا أحد رد، ولا خبر وصل. وكل ما يمر الوكت أكثر، الخوف يكبر بگلوبنه أكثر. صرت أتذكر ضحكتها وكلامها وآخر مرة شفتهه بيها.

من شفتها من طلع جهاد وفتره اليومين الي بقيت. 

يمها بيهن ما جنت مرتاحه لوضعها ظلت الافكار براسي شكد جنت أحاول أبعد هالأفكار عن بالي، بس ما گدرت. الخوف بداخلي بنت وحدها وين 

راحت العائله كلها متوتره و. حتى الهوا البارد الداخل من الباب المفتوح شويه، جان يحسسني برجفة مو من البرد، من الخوف. وكل واحد بينه جان يدعي بداخله لأن مرات الدعاء يصير أقوى من الكلام.

وبين الانتظار والخوف ، جان قلبي يدگ بسرعة وكأنه يعرف شي إحنا ما نعرفه. وكل دقيقه جانت تمر جنت أحسها تاخذ جزء من روحي، وأظل أردد بيني وبين نفسي: "يا رب، بس رجعها... يا رب لا تكسر خاطرنا عليها ... 

بين ما جنه كاعدين دخل حامد يركض ويصيح على عمتي. 

حامد:: يمه يمه 

امنه:: اياني يمه شبيكك يمه وكعت گلبي 

حامد؛: عبايتج يمه ريام مصخنه وابوي ماخذها

للمستشفى وكال واديج يمها استعجلي يمه

امنه:: يمه عليك الله البنيه بيها شي ليش بالمستشفى ولك خافف بيها شي وما تحجي

حامد:: يمه وداعتج ما بيها شي بس مصخنه حيل ودزو عليج حرمه يمها ما يصير وحدها

امنه:: هسه يمه بس اجيب عبايتي

فاطمه:: راحت عمتي واني سحبت عبايتي من

الكاع وكفت كتله.. خويا اني هم وياكم اروح

حامد:: اي اخيتي تعالي 

فاطمه:: طلعت عمتي واني وياها صعدنا بالسياره وحامد ساق بسرعه بين ما وصلنا المستشفى الف

فكره وفكرة صارت براسي صدك لو كالت جديتي

بهيج وكت الشيطان يلعب بروسنا كتلني الوسواس

وصلنا المستشفى واني وعمتي اثنينه ما انتظرنه 

حامد ركضنه وهو بس صف السيارة جيه يركض 

ورانه نفتر شافنه فرات وجيه علينه وعمتي ما انتظرته هي ركضت وكفت يمه تحاجي كالتله. 

امنه:: هاا يمه وين اخيتكم خما بيها شي عليك بداعتج وليدك يا يمه ريام وطفلها زينين. 

-سحبها من راسها باسه وگاللها. 

فرات:: والله عمه ما بيها شي ان شاءالله وهسه

الدكتوره يمها لا تخافين وتخوفينها هي هسه تعبانه وفدوه عمه هسه ابدد مو وكت تعاتبنها

لان نفسيتها حيل تعبانه خلي ترتاح ونحاجيها

امنه:: لا يمه والله بس اشوفه ما اعاتبها ادري

بيها سوده بوجهي هي ما شافت الراحه. 

فرات:: اسم الله عليج عمه امشن 

حتى تروحن يمها يلا حامد تعال. 

فاطمه:: مشو جامدنه واني وعمتي وراهم وفرات 

يحجي على حامد يگوله. 

فرات:: شكو جاي عجل اذا هنه يمشن وحدهن. 

حامد:: رحمه لاهلك هنه ينلزمن الله ويكيلك

بعدني ما صاف السياره هنه ركضن جدامي

فرات:: هو شنسويلهن عمي مجبورين نتحملهن

حامد:: اي والله 

فاطمه:: مشينه واحنه ساكتين، وهمه يحشون بينه من وصلنه للغرفة البيها ريام، لكينه خالي محمد واگف بالممر يم الممرض، أول ما شافنه أشر بإيده ندخل.

عبرت من يم فرات وخزرته بنظرة اني يحجي عليه، دفعت الباب ودخلت، ولكيت جهاد واگف يم راس ريام، ووجهه شاحب من السهر والخوف، وهو يحاول يهديها وهي منهارة بشكل يوجع الگلب، تبچي وتشهك وكأن روحها تريد تطلع من صدرها.

ركضت عمتي عليها وضمّتها بقوة، وهنا ريام شبكت

عمتي ، تبچي وتشهك بحرگة، وچنها لكت الأمان بعد خوف طويل. وگفت يمها، ودموعي نزلت غصب عني، ما گدرت أتحمل منظرها. أول مرة أشوف ريام بهالضعف كله، البنية الي كانت دوم تتحمل وتخفي وجعها بضحكتها هسه جدامي مكسورة، والخوف مرسوم بعيونها بشكل يقطع الگلب.

طب خالي محمد وكف يمنه يدحك على ريام وجهه

محتقن من القهر سحبها من حضن عمتي وبيده 

يمسح دموعها وترجع تنزل حاوط وجهه بيديه

ويحاجيها بكل حنان.

محمد:: كافي ريوم بابا... شكالتلج الدكتوره هاا؟ مو كالت مو زين عليج؟ إذا اني وعمتج مالنه خاطر، لخاطر ابنج هاا. هسه انتي راح تصيرين أم، ولازم تتحملين لخاطر ابنج، ما يتأذه. وهذا البچي والقهر كله يأذي، مو صح؟ مو هيج كالتلج الدكتوره؟

-گالها وهو يمسح دموعها بإيده و يسمح على راسها بحنية يحاول يلم شتات روحها المكسورة.

ابتسم بوجهه وعينه عليها وعلى جهاد الي واكف

ساكت ما بدر منه كلمة وحده وخالي گاللها

محمد:: يلا بابا، امسحي دموعج. والي تريدينه يصير هسه. أخذج وياي، خواتج ينتظرنج. انتي مو وحدج، اني وياج والله. شحده الي يمسج واني موجود؟

-ادحك عليها دموعها ما نشفت وخالي سكت لحظة وهو يدحك عليها بعين كلها خوف عليها، وكمل بصوت مخنوگ:

محمد:: عمو لا تبجين هاي هي ما مرتاحه... ارجعي لبيتج، واحنه الي انداريج. هو اني لو ما أخاف من خطيتج، جان زوجتج بنتي الجبيره.

،فاطمه:: أنهى خالي كلامه وسكت وهو يحاول يخفي رجفة صوته، بس خوفه عليها وحرگة قلبه جانت أوضح من دون كلام ظلينه يمها 

ننتظر الدكتوره ترجع اطمنه عليها ساعه وجت

الولد قسم رجعو للقريه ظل بس وسام وفرات

ويا جهاد. جيت وكفت بسد الدكتوره سألتها

-دكتورة بشريني خما بيها شي 

الدكتوره:: والله ما اعرف شكولج بس الطفل 

نازل والبنيه عدها نزيف صح قليل بس محتاجه

راحه لان ما اعتقد تكدر تكمل لشهر 9 اذا استمر النزيف ممكن تجيب بشهر السابع 

امنه: يا يمه دكتورة وما يأثر على الطفل 

- لا ان شاءالله لا خاله اكو حالات هيج 

امنه:: شلون يعني 

-يعني اكو اطفال يعيشون وهمه انولدو بشهر السابع بس لازم ترتاح والحمد لله وضعها زين

دمه نازل بس تعوضه بالاكل وارجع وانبهكم خلي ترتاح ممنوع المشي هواي وخاصه هل كم

يوم لازم اداري نفسها بس بين ما تعبر شهر 6

فاطمه:: ادحك ريام دموعها تلمع بعيونها ادري

بيها خافت راحت الدكتوره وعمتي طلعت تنطي

ورقة العلاج للولد كعدت يمها مسحت دمعتها

النزلت واحاجيها. 

-ريوم لا تخافين وتخوفينا عليج 

ريام:: فاطمه خاف يصير شي على ابني اموت والله 

اني الصوج بيه مشيت جثير كله من وراي. 

فاطمه:: لا مو من وراج اسكتي وبعدين كل شي 

ما بي كالتلج بس ارتاحي وبعدين عود من تستقر

صحتج اتشوف اذا يتحمل لو لا وعادي تره اكو

اطفال سبيعيين عليج خايفه وكافي بجي تره هذا

هم يأذيه للطفل... ابتسمت كوه عليها واني 

ردت اغيرلها جوها كتلها. 

-بعدين شمدريج ولد كضيتيها ابني وابني

ريام:: غير من ذاك الشهر شفته بس ما حجيت

فاطمه:: فتحت عيوني وضربتها على ايدها

ايااا جذابه وتكولين ما اعرف وما اريد اشوف 

ريام:: هههههه غير من وره اخوج اني شعليه

وشوفي اني احساسي فوول حتى اشور ديري بالج

فاطمه:: هجم بيت عدوج انوب تشور والله لو ما

مريضه الا اموتج ولج وكعتي گلوبنه حيوانه كل هل

بيوت مو بعيونج.. سكت مدنكه واني گبل غيرت

السالفه وكتلها.. 

-ريام اكولج على شغله بس احلفي ما تحجين 

ريام:: والله ما احجي شنوو بس لا رجع جاسم

فاطمه:: هههههه طيح الله حظج اي والله لا بس

يمكن يعني هو مو بعد خايفه وشاكه يعني يمكن يمكن.... 

ريام:: اوو وجع فاطمه لا تظلين تعليسين فوك

راسي تره هسه كاره روحي وكارهتكم سولفي

وامانه سالفه بيها خير تره ابني هو مستعجل يريد

ينزل لا تفجعيني وتخلينه هسه اجيب. 

فاطمه:: ضحكت عليها وظليت متردده وهي

بدون كلشي ما الها خلك ما احس غير كرصتني

-اخخخ شبيج ولج

ريام:: سولفي عاد 

فاطمه:: ابتسمت وكتلها 

-اني يمكن حامل 

ريام:جذذذذب 

فاطمه:: جفلتني من شهكت وضربتها على ايدها

جذب بشواربج شنو جذب احترمي يولي اختج الجبيره اني 

ريام:: ضحكت وشبكتها هذا الخبر احس احلا

حتر من خبر حملي واني حاضنتها تعبت تحمست

نسيت حتى زعلي قوية حضنتي وادردم وهي ظلت تضرب على كيفها حتى احلها وخرت واضحك عليها 

فاطمه:: شبيج ولج خنكتيني خبله گبل شويه

ادكين وتلطمين وهسه شتغل الحماس والحب سوه 

ريام:: هههههه ولج غير فرحانه الج والله يمه عمري بس جيبي بنت عفية وربيها كون تطلع 

مثلج حتى اخذها لجودي حبيبي حتى اكدر عليها

فاطمه؛؛ ولجج رياام شقصدج تريدين تستگوين على بنيتي يمه سوده علي لا عمي ما انطيكم خلي يمي

ريام:: شسوي فطومه هي الدنيا جابتني تكفخ

غير الگي بنت فقيره لابني حتى لا تشبعني ضيم

فاطمه:: انجبي انجبي لا تستغلين گلبي خاف ابنج

يطلع وكح خلي اشوفه فقير لا وخلفي وره بنيه

علاوي حتى ننطيكم وناخذ لابنه. 

ريام:: بعدنه نحجي وطبت عمتي وعمي والولد 

جهاد وفرات ووسام من طب جهاد اني گلبت 

وجهي وهو انتبه جت عمتي يم تلف العبايه 

وتحاجيني گالت

امنه:: يلا يمه سجلولج خروج كومي يمه

خلي اساعدج حتى بالبيت ترتاحين احسن. 

ريام:: هزيت راسي وكمت والولد وكفو جدامي 

ويتحمدولي وفرات عود جاي تحمدلي ويرزلني

رفعت راسي من گال

فرات:: الحمد لله على سلامتج وان شاء الله بعد ما تنعاد كبرتي وراح تصيرين ام لا تظلين 

مخوفتنه عليج يلا يلا امشي خويا ينتظرونه

بالبيت تعرفين صاير يومين حتى النوم ماظايگي

ريام:: سكتت، بالله هذا شحجي ويا رزايله كلها؟ مدفنه يضرب من تحت الحزام. مشتني عمتي وفاطمه ويانه، قسم منهم يمشون جدامنه وقسم ورانه. صعدنا بسيارة وسام، وفاطمه راحت ويا زوجها.

حطيت راسي بحضن عمتي، ومجرد ما دريت إنّو راح نرجع للقريه، حسّيت گلبي انقبض. كارهه هاي القريه كل لحضه بيها جانت ترجعلي ألف ذكرى، وألف وجع حاولت أنساه وما نسيته. غمضت عيوني، والغصه صعدت بذبحة بزردمي، حسّيتها تخنكني وما گدرت أبلعها.

سحبت عبايتي وغطيت بيها وجهي حتى محد يشوف دموعي، بس الدموع فضحتني. جسمي كله رجف، وشهگاتي طلعت غصب عني. عمتي انتبهت عليّ، تخبلت ، صارت تمسح على راسي وتسألني شبيه، بس شلون أگلهه إنّه مو بس أبجي من القهر... أبجي لأن كل ما أرجع لهالمكان أحس روحي ترجع تعيش كل الوجع من جديد.

هزّيت راسي وكَلتلها ما بيه شي، بس صوتي كان مكسور ودموعي كذبتني. عمتي سحبتني لحضنها أكثر، وبقت تمسح على راسي وكأنها تحاول تهدّي وجع ما إله علاج غمضت عيوني مره ثانيه، احاول اتناسى بس هيهات انسى . وجوه، أصوات، مواقف كلها رجعت تركض براسي ركض. شهكت شهكه قويه وحاولت أكتمها، بس ما گدرت. عمتي ضمّت إيدي بين إيديهه وكالت بصوتها الحنون:

امنه:: يگلبي، لا تقهرين بروحج، الي راح راح

وحگ ابوج يم الله ما يضيع لا تظلين تحرگين

بنفسج شبيدج قابل يا يمه لا يوفق كل من 

اله ايد بكتل ابوج ويتمج يروح عمتج سوده بوجهي مردتي گلبي يا يمه.. 

ابتسمت ابتسامه تعبانه ما بيها ذرة فرح، لأن أكو أوجاع ما تروح بمرور الأيام، تبقى ساكنه بالگلب، وكل ما يمر طاريها تصحى وكأنها صارت هسه.

أسندت راسي مره ثانيه على حضن عمتي، وبقيت ساكته. لا عندي حچي ولا عندي قوه أشرح شنو بداخلي. بس جنت أدعي بيني وبين نفسي يوصل بينه الطريق بسرعه، أو يمكن أتمنى يطول أكثر... لأنّي ما جنت مستعده أواجه كلشي ينتظرني هناك.

رباب:: ظلينه نلوب ننتظر خبر منهم وحسين

بس يطب نتلگاه وهو يظل يحجي علينه بس

گلوبنا نار انريد بس نطمن على ريام وهو استغل

طبت بنات خالي عافنه ونهزم بدون ما يحجي

تلكيتهن وكعدنه بالحوش بس بارده كمنا طبينه

بالبيت بس كعدنه سألتني مروى. 

مروى:: هاا بنات طمننه شصار تره اخوتي مشو

وخلونه مثل الاطرش بالزفه وهسه جده دزتنه

ريتاج:: والله خابرت ابوي گبل ساعه يكول زينه

بس تكمل المغذي وتشوفها الدكتوره يجيبونها

تبارك:: الحمدلله والله وكعت گلوبنه 

رحاب:: والله سوايتها ما تسولف شلون تطلع

هيج همزين طمطموها ولا جان انفضحنه 

رباب:: شكد ضجت من كلامها بس ما لحكنه

نجاوبها وزكحت بيها تبارك وكامتلها وتصيح عليها

تبارك:: هييي والله اسمعج تحجين عليها أسوي شي ما يعجبج، شمسويتلج هي وفتضحتج شعليج؟انتي شفتي الي شافته ها وبس. ما أحلف أبوج إلا إيد بيتمها

رحاب:: انجبي تبارك، أبوي شعليه حاطينه بكل مشكله؟ هو عمي خالد من زمان عنده مشاكل، الله وحده يدري ويامن متورط. كتلوه وخلصت السالفه، عفيه عاد، كل يوم نعيد نفس الحچي وما نوصل لشي.

تبارك فتحت حلكها حتى ترد، بس مهى ضربت ايد بأيد وقاطعتهن قبل لا تكبر السالفه أكثر.

مهى:: رررحاب سدي حلكج، وكافي بنات. هسه هذا وكتها خلي نطمن على ريام أول. وعيب تتكاونن هيج، انتن خوات وصديقات مو أعداء. سوالف الزلم ومشاكلهم مو شغلنه، ولا النه دخل بيها.

تبارك:: كولي لاختج اني ما اسكت على اليحجي 

على جنتنا 

مروى:: هاي هي سدن السالفه مو وكتها 

رباب:: سكتن وظلينه كاعدين للمغرب محد بين

منهم البنات ترخصن وراحن وحتى مهى راحت

ظلينه بس احنه وكفت رحاب وياها ريتاج يطبخن

العشه وريتاج خانكتها العبره ومطنشه رحاب ادري

بيها زعلت منها لان حجت على ريام وكفت باب المطبخ ادحك على الحوش كامت تبخ خفيف ريحة

البستان الي محاوط بيوتنا ادحك على حديقتنا هم

الشجر مبلل وريحة المطر ترد الروح واكفه واتأمل

المنظر فزيت من انفتح الباب ودخلت امي وريام

ركضت بلهفه شبكتها وهي شبكتني واثنينه نبجي

وجت ريتاج ثلاثتنه وحده شابكه الثانيه ونبجي الا

امي رزلتنه حتى نعوفها وخرنه منها واثنينه اني وريتاج كل وحده مسحت الدمع من خدودها وهي

ابتسمت وامبين التعب على وجهه ردن نسحبها

حتى نطب جوه بس وكفنا كلنه من صاح عليها جهاد 

جهاد:: رياام تعايي 

-دار عليه ابوي مستغرب وگاله

محمد:: وين 

جهاد:: لبيتنا خالي اهناك ترتاح خلي ترجع لبيتها 

رباب:: سكت ابوي ودحك على ريام وينتظر منها

الجواب استندت على ريتاج وضحكت بس مو ضحكه فرح لا ضحكه مليانه عتب وحزن رفعت

عينه عليه وگالت

ريام:: روح ما ارجع وبس يصير الطفل انت تعال و وفي بوعدك بس خلو ابالكم اذا ابني

الي مال احرمك منه لا يبقى ابنك وبنفس

القريه تشوفه شوكت ما تريد بس وروح ابوي

ما انطي لو ادري تدفني. 

جهاد:: ما يحتاج اخذه منج سوء فهم وساعه

شييطان وانتي تدرين من اتعصب ما اشوف جدامي اذا تريدين وهاي جدام اهلج ارتاحي

جم يوم واجي اخذج غير هل حجي ما عندي

رباب:: حجاها وما انتظر ترد عليه مشى وخلاها

تنهارر كعدت بالكاع وتبجي وابوي واخوتي ولد

عمي كلها وكفو جدامها وعمر شياطين الدنيا

تتطافر من بين عيونها عاط بريام وگاللها. 

عمر:: كووومي لا تصيرين ضعيفه مالج شغل بحجيه، انتي الي تريدينه يصير شنو تايهتله مالج احد ولججج، كوومة اخووه عندج عليمن هل بجي والخوف؟ وراس اخوتي الي يمسج بكلمه امسه بنارر.

كعد گبالها بينهم مسافه ويدحك عليها وهو يشوف دموعها ما توگف ، عض على شفته من القهر وهز راسه.

عمر:: شبيج هيج منهاره؟ مو انتي نفسها الي جت من بيت حمدان قويه وتطموحه وبعز ظرفها الصعب جابت معدل رفعت روسنا كلنه بيها هاا شصار هسه؟ ليش مسلمه روحج للحزن؟ كومي ارفعي عينج، محد يسوه دمعه تنزل من عينج وابوج محد يسكت على حگه 

انت بنت خالد تريدين شنو بنت خالد لازم

تطلعين عليه ابوج الجاب عمره يقوي بينه

ويرفعنه للسما اليوم بنته هيج ضعيفه ومنهاره 

كومي خويا بزودج كلنه بظهرج وشحد الي يزعلج. 

نزلت راسها وارتجف صوتها من كثر البجي

، أما عمر فجان يحاول يخفي خوفه عليها، بس عيونه فضحته.

عمر:: تره مو كل وجع لازم يبقى بقلبج. انتي مو وحدج، عندج أخوه يخافون عليج أكثر من خوفهم على نفسهم. يابه والله كل ما أشوف دموعج أحس النار بگلبي، والله لو أكدر أشيل هالحزن من صدرج وأحطه بصدري جان سويتها.

سكت شويه وجر حسره، وگام من الكاع 

وگاللها 

عمر:: اسمعيني زين... مهما صار، ومهما ثگل عليج الوجع، لا تخلين نفسج ضعيفه الي وراه سند ما يطيح، وانتي وراج ناس تموت عليج. كافي دموع، خليج أقوى من كلشي كسرج، وخليهم يشوفونج واقفه رغم كل التعب... لأنج تستاهلين تعيشين مو تبقين أسيره للحزن.

وحگ ابوج لو اخر يوم بعمري تاخذينه. 

رباب:: كلنه اندحك عليه ومبتسمين بفخر

وحتى ابوي يدحك على عمر وفرحانه بكلامه

كومناها وابوي وكف گبالها والولد اخوتي ولد

عمي وراه ابتسم وگال

محمد:: عندج هيج زلم وتخافين كله هذول

الاخوه وتحسين ماكو امان حتى تنهزمين وتعوفينه يزعلج زلمتج عندج بدال الخ الواحد

سته يحركون الدنيا لخاطر عيونج امسحي دموعج وارفعي راسج انت بنت خالد السلمان

مو حي الله. 

-حضنت ابوي وابوي ضحك ويطبط على جتفها

واخذناها ودخلنه وابوي رايد من الولد ما قبلو

يبقون على العشا وكفنا اني والبنات ندير العشا

بس رحاب مدري ليش گالبه خلقتها شلت الصينيه وكعدنه نتعشه احلا شي رجعت لمتنه

حسين ووسام متكاونين على ماعون الطرشي

وابوي يحجي عليهم تالي ريام دحكت عليهم

وكالت لامي بدلع. 

ريام:: عمه اشتهيت ذاك الماعون الطرشي 

امنه:: يا هو عيوني 

ريام:: الي بيد وسام 

-دحك عليه وسام وغمها وگاللها

وسام:: ولي الا هذا اشتغلت خباثة الاخوات

ريام:: جيبه اشتهينه لا يطلع بعين الفرخ

وسام:: شني دجاجه وتفرخين بعدين عاد خاله

وامون خلي حتى كل ما اشوف عينه اتذكر الطرشي هذا يااابوييي شكد طيب يفوتج. 

ريام:: عمووو شووف 

-ضحك ابوي عليهم وعود زكح بوسام

محمد:: هههههه ولكك انطيها الا اطيح حظك

ريام:: جيب جيب لا تعصي والديك يودونك

يم ابو لهب تاكل مشاوي وياه واني ما اقبلها عليك

وسام:: اي اي سوده بوجهي شكد حنينه 

اول راتب هاااااي اذا توظفتي كليوين طرشي

لمرتي تجيبين ومن الزين هاا مو تضحكين علينه. 

رباب:: سوتله اوكي بأصبعها واخذت الماعون

تاكل دحكت على ابوي عينه عليها واصلا كلنه

عرفناها تمثل علينه على انها ما بيها شي او

خايفه لا احد منهم يسألها او يعاتبها على طلعتها ككلنا العشا وريام راحت لغرفتنا تمدد

واني وكفت اغسل مواعين ويا رحاب الي مدري

شبيها مبوزه وعلى النص عافتهن وراحت من

حسين صاحها فريت ايدي ما يفيد ما يكعد حظي دائما يعوفنهن عليه المواعين بس من

جت ريام جانت تساعدني كملت شغل والكل

راح لغرفته لان اصلا محد منهن نايم صار يومين كعدت بغرفتنا ريام نايمه وريتاج تدرس

واني هم اخذت كتبي وكعدت اقره لان سادس

واريد معدل حتى ادخل نفس قسم مروى.... 

مسرة:: من دريت رجعت ريام واني اريد بس اروح

اشوفها بس ما جاي يكعد غسان لثاني يوم العصر

اكلت راسه باوع عليه وابتسم وضربني خفيف على

راسي وگال. 

غسان:: امشي امشي تعبتيني دا اكولح عندي شغل غير اكمله وبعدين مو جبتلج عبايه 

وگتلج لا تروحين على بيت عمي لابسه بنطرون

شيخلصني من هذا عمر والولد زحمه مسره

لبسي مثلهن 

مسره:: سكتت هو اني اصلا ما اريد البسها اعناد

بيهم بس ما حجيت عفته ورحت بدلت واصلا لبسي

كله اسود عليمن بعد بس لخاطر غسان لبست

الفستان الي جابته الي ريام وره وفاة اهلي ولفيت

حجابي واخذت العبايه وموبايلي بيدي وحتى الشحاطه لبستها وجيت وكفت يمه وهو يباوع مستغرب ضحك من كل گلبنه وگال

غسان:: لج قابل كتلج هسه اوديج عود بالليل

مسره:: اهوووووووو لعد عليمن بدلت وديني

هسه لا احرك روحي اووي تعبت نفسيتي دا انتظرك من البارحة كووم كومم هسه يلتمن

البنات واني اهنا باقيه وحدي مثل الشمعه ودا 

احترك. 

غسان:: هههههه اوي عيني يلا بابا دمشي خلي

اخلص من السانج صحت مسره شيخلصنه بعد

مسره:: مشيت جدامه اتمختر وهو جرني بسده

طلعنه نتمشى واباوع بنفسي اروح بهيج اجواء للبستان بس البنات كالن ما يقبلون ناس معقده

وثلنا بيت عمو محمد وبس دكينه الباب صاح

فرات على غسان جان واكف گبال مضيفهم

باوع عليه وگال

غسان:: هسه يفتحولج فوتي انتي اني اروح اشوف

فرات وعود ارجع اخذج تمام حبيبتي تونسي وياهن

-هزيت راسي راح غسان واني بقيت ادك بالباب 

انتظر يفتحولي ضربت الباب بقوه ويا ضربتي انفتح

وصار بوجهي الحقنه وسام من شفته حركة حلكي

حركة ام زكي يعني ما عاجبني وتوه راد يحجي جت

عمه امنه دفعته واستقبلتني تهلي بيه وكالت. 

امنه:: هلا هلا يمه فوتي البنيات ملتمات توه

جنت اريد اجي اخذج زين من جيتي عليش وحدج ظاله دفوتي يمه فوتي. 

مسره: طبيت والكعب يطگطگ بالصبه وعمه

جدامي تمشي مدري ليش درت وجهي وفتحت

عيوني وحلكي من غمني واني ما الزم الساني

كتله

-هيي انت شلون تغومني متستحي والله اكول

لعمو انسان بلا ذوق تغوم النسااء 

ضحك وگال وهو يقلد على حجيي

وسام:: تغووم النسااء لا عيني علموني اغوم

الزعاطيط هيج غوم غوم غوم

- كالها وهو يصفگ ايد بأيد ويغمني بعدني ما راده عليه عافنه وطلع يضحك واني صرت نار

وعمه وكفت تعتذر مني بس ما رضيت هي شعليها هو ابنها بلا ذوق مو مثقف دخلت للبيت

البنات كلها ملتمه وفرحانات ما ادري شكو وكفن سلمن عليه وكعدن واني اسأل بيهم شكو

مهى:: عيوني جنتنه حاملل 

مسره:: يااا فاطمه حامل الف مبرروك احلا خبر هسه راح يصير عدنه اثنين اطفال نلعب

وياهم اووي فدوه تحمسيت 

تبارك:: بس لازم من هسه تختارين تصيرين

عمه مثل الجلبه ريام لو تصيرين مثلنه خاله

مسره:: سكتت مبتسمه ولازمه ايد ريام 

كتلهن.. لا اني شنو تصير ريام اصير مثلها

-غمتني مروى وگالت

مروى:: هاي عوفتها ريام مچنصتها هسه لو تنذبح ريام تكول اريد انذبح مثلها المهم الاسم انسوي 

قرعه لا مثل ريام جلبت بأسم جود ما تفعل تغيره

ريام:: شببييي عيني والله يخبل عمي بزعنه نفس

الاسماء نص العراق نفس الاسم خلص جود جود

تبارك:: اتفق وياج يلا رحاب انوب انتي شدو حيلكم

رحاب:: ان شاءالله ادعولنا احنه هم نريد والله 

امنه:: ان شاءالله يا يمه يفرحكم ويفرح كل محروم. 

مسره:: بقينه نسولف ونضحك للمغرب كلنه

كلمن رجع لبيته دخلت للبيت وغسان راح

يصلي واني احظر بالعشه وبالي يم مسون 

ما اعرف شوكت تجينه حيل مشتاقتلها. 

مروى:: من رجعت ريام لبيت خالي محمد 

وبيتنه مخبوص خبص الكل اعصاب امي

عايشه تاكل وتشرب علاجه وتكضيها نوم

وجهاد ما يتحاجه ومدري شبيهم يطلعون

من الصبح بس وكت الاكل نلتم صار اسبوعين

على هل حاله ريام رجعت اداوم بس دوم كاعده

ما نفتر نلتم ثلاثتنه اني وياها ومهى بالكافتريا

جنت واكفه انتظر البنات وره ما خلصنه دوام

التمينه استغربت من جيه علينه حامد صعدنه

وهو وجهه مصبوغ احمر وكوه يحجي اول مره

اشوفه عصبي حامد هو هادء وحباب بس شوف

شبي بس وصلنا نزلت ركض للبيت جوعانه لكيت

فاطمه يمنه سلمت حبيتها وطبيت اخذت ملابسي وسبحت وطلعت لكيتهم ملتمين على 

الغده تغدينه وجاي نغسل بالمواعين وجت فاطمه يمي ادحك عليهن هي وتبارك مدري

شبيهن وانصدمت وكع الماعون من ايدي من

فاطمه گالت

فاطمه:: مروى عمي حاتم مشى عليج... 

الفصل الثاني والثلاثون من هنا