رواية تحت ظل السعف الفصل الثاني والاربعون بقلم ميار
- مو گتلك تبين حوبت المظلوم؟
- ويفتر الزمن ميضل على حالة
- مو حذرتك وكتلك المنك وبيك
- ينطيك الضهر بس يترس سلالة ..
ــــــــــــــــــــــــــ♕ــــــــــــــــــــــــــ
فاطمه:: انخبصنه بريام وصراخها ما افتهمنه شكو
ما حسيت غير على طب قويه ورانه ويما التفتت
انخمش گلبي واني اشوف اخوي ابو طول الحلو
واكع فاقد بالكاع عفت ريام وركضت بدون وعي
والولد ارواحتهم رايجه فرات حاط راس جهاد على رجله ويضرب بخفه على خده ويحاجي
فرات:: جهاد... جهااد كوم يا خووي
-صد على الولد وصاح بيهم
فرات:: صيحوووو الدكتورر
فاطمه:: انخبصو واحد من الممرضين جاب عربانه
شالو وحطو بيها وركضو بي واحنه وراهم طببو واحنه ظلينه ننتظر ساعه واحنه ما نعرف وضعه
واخوتي والولد كلهم ملتهين حتى ما جيه بالي اسأل شكو وكف عمر يمي وخزرني
عمر:: خويا شعرج رحمه لاهلج تفترن وعطوبجن يفترن وراجن فوك مصيبتنا انوب انتن وعطوبجن
فاطمه:: شمدريني خويا هو احنه شحالنه انوب انت علينه
عمر:: ديلا يلا
فاطمه:: جلطني اني وين وانت وين ظلينه واكفين
ننتظر بس طلع الدكتور وفرات وراه طلعنا نركض
وابوي عيونه على الدكتور گاله
احمد:: هاا دكتور بشرني
الدكتور:: اطمأن حجي ان شاءالله عدت على خير
معاذ:: دكتزر غير نفتهم شبي جهاد شصار وياه
الدكتور:: للاسف سكته قلبيه
فاطمه:: حسيت رجلي ما عاد تشيلني من سمعت الدكتور. كلنه ظلينه بمكانه، ولا واحد عرف شيرد.
أحمد:: شنو... شنو سكته؟!
الدكتور:: بسبب تعرضه لصدمة قوية، وهذا سببله سكتة قلبية، بس الحمد لله لحگناه ورجع النبض، وهسه حالته مستقرة لكن يحتاج يبقى تحت المراقبة.
فاطمه:: نزلت دموع أبويه بدون ما يحس، سند إيده عالحايط وكال بصوت مخنوگ...
أحمد:: يابويا شيحمل گلبك وليدي
فرات:: عمي گول يا الله جهاد اقوى من هيج
بس صدمه فوك صدمه والحمدلله عدت على خير
فاطمه:: رفعت راسي على فرات وسألته بستغراب
-ليش شكوو شصاير تره كل شي ما افتهمنا
رفع عيونه عليّ وذب حسره ومرد گلبي من گال
فرات:: جود ابن جهاد انطاكم عمره
فاطمه:: حسيت روحي انشليت بمكاني، وما استوعبت كلام فرات. ظلّيت أدحك عليع وأگول يمكن سمعته غلط.
فاطمه:: ش... شنو گلت؟
تنهد بحرگة، ونزل عيونه للكاع.
فرات:: جود... توفى.
فاطمه:: شهگت شهگه قوية، وحطيت إيدي على حلگي.
- لا... لا... شلون؟!
فرات:: الولد جان مختنك، والأطباء حاولوا ينقذوه... بس الله أخذ أمانته.
فاطمه:: حسيت الدنيا اسودت بوجهي، وركبي ما عاد يشيلني، كعدت على الكرسي ودموعي نزلت بدون ما أحس وبالي صار كله يم ريام
من الصبح وهي تلوب سوده بوجهي جانت حاسه
كعد فرات گبالي واني دموعي تجري يارب دخيلك
شنو من اختبار حطيت ايدي على وجهي واشهك
لزمهن فرات وخرهن يحاجيني
فرات:: فطوم عيوني انتي خليج قويه هسه همه
بحاجتنه ريام حالته ما مستقره وهذا جدامج اخوج
بالعنايه وكع مجلوط وتبارك بالطوارئ
فاطمه:: فزيت من كال تبارك وهو جلب بيه كعدني
ويمسح بوجهي ويحجي ويهدء يبه
فرات:: فاطمه انتي الجبيره الطفل ميت بيدها
وبس هابط ضغطها ومصدومه ما بيها شي وادري موقفج صعب بس لازم نكف وياهم هذا امر الله وامتحان من عنده الحمدلله على كل حال هسه اريدج تكومين ترحين يم ريام وتحاولين تهدينها
فاطمه:: يمه ياگلبي بعده وينه وين الموت شصبر بيهم وهي الليل كله تگضي نلوب على شوفته
هسه ترجع وما تسمع حسه بالبيت وكاروكه فارغ
انمرد گلبي والله گلبي ما ينطيني اواجهه شكوللها
وبيش اواسيها مكتوب عليهم الحزن احنه ما صدكنه خلصنا من سالفة الثار واثنينهم التفتو
لحياتهم جتهم هلـ مصيبه... كومني فرات ورحنه للغرفه البيها ريام بعدني ما واصله وصوت ريام
يگطع الگلب. حتى فرات خنكته العبره طبيت يمها
وتلوب تلوب روحها تريد تطلع كعدت گبالها شبكتها
وهي تصرخ مردت گلوبنا وخرتها امسح وجهه
واحاجيها
فاطمه:؛ كافي ريام يروحي والله مو زين عليج
كولي يا الله هذا قدر الله عليكم وطير من طيور الجنه
رياام:: ما اكدرر گلبي فاطمه گلبي يوجعني ما شبعت منه اني اخاف عليه انومه يمي لا يختنك شلوووون
شلون انطاهم گلبهم يخلونه جوه التراب يااا يمه
سوده بوجهي سوده بوجهي رااح وليديي راحح
فاطمه:: يابه مردت گلبي ظلت تبجي واحنه حتى
الحجي ضاع منه رفعت راسي من طبت مروى
تگود بتبارك بس شفتها راحت روحي كمت ركض
شبكتها وخرت منها ادحك وجهه أصفر، عيونها ذابلات، وما بيها حيل حتى تگف على رجلها.
كعدتها مروى على الكرسي، بس أول ما سمعت صوت ريام، انهارت شهكت شهگة قوية، وكعدت بالكاع وهي تضرب على صدرها.
تبارك:: والله مو قصدي... والله ما خليته جان بحضني... والله جان بحضني...
فاطمه:: تبجي وتشهك تگطع الگلب.
تبارك:: والله حاولت... حاولت أسكته... والله ما عفتـه لحظة... شلون راح مني... شلون
-ركضت مروى تضمها، وهي هم تبچي.
مروى:: تبارك دخيلج. هذا قضاء الله لا تلومين نفسج. اشش كافي ريام مو زين عليها
مهى:: ادحك شلون وضعهن يفتت الگلب تبارك حالتها حاله وكل شويه تعيد نفس الحجي
تبارك:: لو آني متت ولا هو... والله لو آني...
-شهكت ريام من سمعت حچيها، وصرخت وهي تبچي:
ريام:: لااا... لا تكولين هيچ مو ذنبج تعاي تبارك تعاي ما اكدر اكوم
مهى:: كامت تبارك تسحل برجليها وحضنت
ريام ويتابچن وكلنه نبجي على بجاهن الا عمتي
صاحت بينه
امنه:: كافي بنياتي كافي هذا امر الله الله هو
اللي انطاه والي اخذه و هذا امتحان من الله... والله يعلم شكد هو صعب، بس لا تلومن أنفسچن
-سكتت ادحك عليهن وكعدت بالطرف الثاني بسدهن وتمسح بدموعهن ودخل عمي محمد
واول ما شافته ريام كامت تبجي بصوت عالي
وگالتله...
ريام:: عمييي...
وخرت عمتي من يمها، وتگدم عمي محمد بسرعة.
كعد بسدها، وسحبها لحضنه مثل البنية الصغيرة.
ظلت تبچي بحرگة وهي مچلبه بدشداشته.
ريام:: عمي ابني ابني راح مني والله ما شبعت منه...
بعده ريحته بحضني يوميه انومه وأضمّه بحضني أخاف يبرد أو يختنك وما ادري بي
-سكتت تشهك وتضم وجهه بحضن عمي وكملت
كلامها
عمو... ليش يعوفني ويروح؟
شنو ذنبه يندفن بالتراب وشنو ذنبي انحرم منه
حطت إيدها على صدرها وهي تبچي بحرگة.
ريام:: گلبي عمي... والله گلبي يوجعني...
أحس روحي انشالت وندفنت وياه
شلون أرجع للبيت وما ألگاه شلون أشوف الكاروك. و هو فارغ والله ما أگدر... ما أگدر أتحمل عمو ما اتحمل
مهى::ضمها لصدره وهو يحاول يسيطر على دموعه ويسمح على راسها..
محمد: ابجي بابا وطلعلي اللي بگلبج محد
يلومج بس لا تعترضين هذا امر الله هو الي
انطاه وهو الي اخذه كلنه ارواحنا امانه يجي يوم
ونرد الامانه لصاحبها وهو طير من طيور الجنه
وإن شاء الله سبقكم للجنة، ويكون شفيع إلچ ولابوه يوم القيامة
مهى:: ظلت ريام بحضن عمي وما ينسمع غير
صوت شهكاتها كلنه ساكتين محد عنده كلام
يواسيها ويخفف وجع گلبها وتبارك ايديها ترجف
ودموعه ما وگفن غمضت عيوني وادعي...
-دخيل اسمك يارب شنو من اختبار يارب اربط
على گلب ريام وجهاد وصبرهم وعوضهم بالاحسن
مهى:: وخر عمي ريام وكعد گبالها وگاللها
محمد:: بابا ريام أدري بوجعچ، وأدري هالمصيبة تكسر الظهر.وأعرف ماكو كلام يرجّع جود، ولا يطفي النار اللي بگلبچ بس بابا لازم تتقوين.
مو لأن وجعچ قليل... لا والله.
بس لأن زلمتچ هسه محتاجچ أكثر من أي وكت.
جهاد من يوم الحادث وهو شايل همچ، ويكول: "المهم ريام تگوم بالسلامة."
ولمن فقد جود انهار والله بعيني شفته، ما بقى بيه حيل جسمه تعب من صدمة حادثچ، ومن صدمة فگدان ابنه ذاك الجهاد اللي چنت أحچي بصبره وقوته اليوم انكسر بابا هسه صار دورچ.
أدري جرحچ ما يلتئم، وأدري حضنچ فارغ، بس إذا شافچ منهارة، راح ينهار أكثر خافي عليه مثل ما يخاف عليچ والله صحته مو زينة، وما ظل بي قوه يتحمل ضربة ثانية إذا يريد يلكه قوة، راح يلكاها منچ وإذا شافچ صابرة راح يصبر وتتقوه بيج
وراح يتشجع ويوگف على رجليه لخاطرج بنيتي
-مد إيده ومسح دموعها وكمل.
محمد:: اصبري يابوي مو لأن الوجع خلص...
اصبري حتى تظلون سند لبعضكم ترى اللي بقى
إلچ هو جهاد... واللي بقى لجهاد.... إنتِ.
مهى:: سكتت ريام، بس شهكاتها بعدهن يطلعن بين نفس ونفس ظلت مسنودة على صدر عمي محمد، ودموعها ما نشفن وشوية، رفعت عيونها عليه، وصوتها جان مكسور گالت
ريام:: عمي... أخاف عليه من يوم الحادث وهو ما نايم كل ما أفتح عيوني ألكاه گاعد يمّي وإذا غمضت، أگوم ألكاه صافن وما يحچي أخاف يضيع منّي هو هم
-مسح عمي محمد على راسها، وابتسم ابتسامة كلها وجع وگاللها
محمد:: ما يضيع بابا... دامچ يابه إنتي وهو هسه ما عدكم غير بعض حطي ايدج بيده ، ولا تخلّون المصيبة تاخذ واحد منكم
-هزت راسها وهي تمسح دموعها وعمي بقى شويه وطلع وعمتي مدري وين راحت وراه
ظليت يم ريام وضعها يمرد الگلب وتبارك كل عين
صارت شكبره منفخات من البجي حتى صوتها راح
رفعنا روسنه من انفتح الباب بهدوء ودخل جهاد.
تعبان، وملامحه ذابلة، وعينه حمر صوت نفسه
يخرش أول ما شافته ريام، مدت إيدها إله بدون ما تحچي راح يمها بسرعة، وشبك إيدها بإيده.لا هو حچه...ولا هي. بس مجرد نظرتهم لبعض جانت
كافية حتى تعرف شكد كل واحد بيهم مكسور، وشكد محتاج الثاني نزل عمي محمد عينه، وكام بهدوء أشرلنا نطلع ونخليهم وحدهم.
طلعنه من الغرفة، وسديت الباب وراي ودعيت بگلبي...
"يا رب... اربط على گلوبهم، وعوضهم صبرًا يجبر خاطرهم"......
ريام:: من طلعوا كلهم، بقت الغرفة هدوء بشكل يخوف. واني اتخيل بعد ما اسمع صوت جود...
ولا اشوفه ...ولا راح احس حتى بذاك الإحساس اللي كل يوم يمله حياتي.كلشي صار فارغ رفعت عيني على جهاد.واگف يم يمي ادحك بعيونه عبالك كبر سنين بهاي الايام وجهه شاحب، عيونه غاطسة، ولحيته طالعة، وملابسه مخربطه.أول مرة أشوفه هيچ... أول مرة أشوف الرجل اللي أحتمي بيه... مكسور.... مد إيده إلي، وشبك أصابعه بأصابعي.
برودة إيده خلاني أرجف.
نزلت عيني على إيدينا، وتذكرت شلون چان يشيل جود بين إيديه، ويظل يدحك عليه بالساعات، وكل ما يبچي يركضله گبلي.
غمضت عيوني، وحسيت سچين وتنغرز بگلبي.
شلون انتهت حياتي كلها بثواني
-شلون صار حضني فارغ؟
-وشلون الله كتب عليّ أرجع للبيت... بدون ابني؟
-رفعت عيني عليه مرة ثانية.
لكيته يحاول يبتسم إلي... بس ابتسامته انكسرت قبل لا تكمل بهاللحظة عرفت...مو آني وحدي الي فقدت.جهاد هم مات بيه شي.گرب مني اكثر ورفع إيدي وباسها، وبقى ساكت.لا حچى، ولا آني حجيت.
جان سكوتنه هو الي يحجي كمية الألم الي بداخلنه
مديت إيدي وتلمست خده وكتله بخنكه
ريام:: تعبت...تعبت جهاد كل الي احبهم يعوفوني
سكت بس صوت شهكته جانت كفيله تعبر عن
وجع گلبه سند راسه على راسي، وغمض عيونه.
وأني غمضت عيوني وياه لأول مرة، حسيت إن وجعنه صار واحد...مو وجعين.
ويمكن هذا الشي الوحيد اللي بقى يخليني أتمسك بالحياة... إن إحنا بعدنا سوه، حتى لو فقدنا أغلى قطعة من أرواحنا..
- ظل ساكت، وإيده بعده لازمه إيدي.
رفع راسه ببطء، وويدحكلي بعيون ذابلات من السهر والبچي.
جهاد:: ريام...سامحيني.
ريام:: شهكت بسرعة وهزيت راسي.
-لا... لا تكول هيچ.
جهاد:: سامحيني لأن ما گدرت أحافظ عليه.
جان كل أملي أطلعج من الحادث سالمة، وأرجع اضمكم اثنينكم بحضني بس الله كتب غير شي.
مديت إيدي وحطيتها على حلكه وگلت
ريام:: لا تلوم نفسك لو ضميتنه بنص غرفه ومحد
يشوفنه هن جان ما تغير المكتوب هذا امر الله
مو انت تكول الي عنده ايمان قوي بالله رب العالمين ما راح يعوفه اني تعلمت قوة الايمان
والصبر منك لا تنكسر وتكسرني وياك جهاد
-سكت شوية، و نزلت دمعة من عينه.
هاي أول مرة أشوفه يبچي جدامي بدون يحاوب ما يخفي دمعته.
جهاد:: والله كلشي يهون... إلا حضنه.
كل ما اتخيل أدخل الغرفة وما راح أسمع صوته
كلبي يوجعني... ريام لا تعوفيني اني اللي تعب تعب
ريام:: جهاد يمكن الله أخذ أمانته...بس ما أخذ إيمانه ورحمة وسعت كل شي خل نساعد بعض... لأن إذا واحد بينه وگع، الثاني لازم يسنده
هز راسه، ومسح دموعه.وقرب سند جبينه بجبيني.
بقينه ساكتين...بس هالمرة، السكوت ما جان خوف...جان رضا ممزوج بوجع ما راح يختفي، بس علّمنا إن المصيبة إذا تقاسموها اثنين يحبون بعض، تصير أخف من حملها وحدك.
ومن ذاك اليوم...
عرفت إن بعض الفقد ما ينسي أبدًا.لكن الإنسان يتعلم يعيش وهو يحمله بگلبه، ويستودع أحبابه عند الله، حتى ينجمع بيهم يومً في دارٍ ما بيها فراگ
ريتاج: مر شهر كامل بس بالنسبة إلنه، جنه سنه اصعب الايام عشناها كل واحد بينه حاول يرجع لحياته، بس أكو أشياء مستحيل ترجع مثل قبل... الحمد لله خلصنه امتحاناتنه، وارتاحينه منها، وما بقى غير رباب ورحاب، لأن هنَّ سادس، وكل يوم شايلات كتبهن وحايرات بالمراجعة.. هلـ فترة، دخل علينا شهر رمضان.
أول يوم رمضان كان غير السفرة نفسها اللمة نفسها...
-ريام وجهاد رجعوا للبيت، بس التغيير جان واضح عليهم ريام صارت هادئة أكثر من اللازم، وإذا سمعت صوت طفل، تفز وجهاد نفسها
أما جهاد، فصار قليل الحچي، وأكثر وقته بالشغل أو بالبيت، ويحاول يلهي نفسه حتى ما يرجع يفكر وصحته تعبانه دائما ريام تشكي
لامي لان صدره يوجعه وما يروح للدكتور
ومحد منا گاللها على وضعه ما تدري صار عنده سكته بسبب خوفها واهسها الزايد وهو يطلع
للسوك تحرك الموبايل عليه بس هو مقدر خوفها ومجاريها من ادك گبل يجاوبها.....
وإحنه محد بينه عاف ريام وحدها كل يوم نلتم يمهم وامي يوميه تروح لو الصبح، لو العصر، لو على الفطور وحتى الشباب، يومية يلتمون بمضيف خالي لو يطلعون بالساحه الجدام بيوتنا وره التراويح، وسوالفهم وضحكهم رجعت شويه شويه ورمضان هالسنة، رغم الوجع بس حسيته جان بيه جو غير.
الشباب سوّوا بينهم منافسة على القرآن، وكل واحد يحسب شكد قره، واتفقوا يسوون ختمة جماعية، وكل يوم واحد يذكر الثاني إذا قصر.
و وره الفطور، يطلعون كلهم يصلون التراويح سوه، ويرجعون يكعدون يتسامرون لحد السحور.
أما إحنا البنات...بالبداية چنا نلتّم ببيت ريام، حتى لا نحسسها بالوحدة بعدين گمنا ناخذها ونروح كلنه يم فاطمة.
يابه... هاي البطّة صايرة مدام نفيخة.
دخلت بشهرها، وبطنها كبرانه، وكل ما تكعد ويانه شويه تگوم تتأفف وتحط إيدها على ظهرها.
فاطمة:: ولكم شوفوا هاي المعاناة... لا أكدر أگعد، ولا أكدر أوگف، ولا أعرف أنام. والله إذا هالولد ما يطلع مؤدب، أزعل عليه من هسه.
-انفجرنه كلنه ضحك وكعدنا نصنف عليها
گالتلها مروى
مروى:: لا يمعودة، هو من هسه حافظ سوالفج، من يطلع أول كلمة يكولها: "آخ ظهري."
-ضحكت حتى ريام، وهزت راسها تكول:
ريام:: الله يستر منكم انتو وابنكم هسه بس يجي ويكبر شويه تلگين فاطمه وفرات اصواتهم
واصله لبيت ام سمير
تبارك: اي والله وتجيها ام سمير تهف هي وعبايتها
ريتاج:: ادحك على لمتنه رجعت ولو شي بسيط
ضحكتنه اگعداتنه الحلوه لل12واحنه ضحكنه
وسوالفنه لحد خربها جهاد من اتصل على ريام
عاد كلنه كمنا رجعنل للبيت واني بس رجعت
حطيت راسي ونمت ما حسيت الا على امي تكعدني
نتسحر وهاي لان غسلت وجهي طارت نومت عيني
وره الصلاه كلها نامت اني ظليت اقره قران لحد
ما كشف الجو صدقت وحبيت القران ورجعته
بمكانه رجعت لفراشي تگلبت اريد بس انام ما كدرت لبست شالي وطلعت افتر بالحوش الجو يخبل الفجريات فتحت الباب ادحك على البستان
العنب بعده ما لاحك زين ويابه غير طارت روحي
من شفت المشمش لا بيه اطلع اجيب ظليت
بس اتحسر همه هاي الفتره راح يلمّون المشمش ويعبّوه بالصناديگ حتى يبيعونه افتريت الا ما تعبت
رجعت لفراشي گبل نمت ما حسيت الا على صوت امي ترزل بينا لان انام الضحى تخاف اتطير النعمه
من بيتنا
أمي:: ولكم گوموا... شنو هالنوم نوم الضحى يطير النعمة من البيت... گوموا سووا شي ينفعكم.
فتحت عيوني وضحكت، وگلبي گلت:
- والله هاي السالفة بكل بيت عراقي نسمعها
حتى لو كبرنه... تبقى أمي تشوف نوم الضحى أكبر جريمة بالدنيا كمت توضينه ونظفنا البيت وتوضيت
وصليت الضحى ادحك الساعه صارت بال11 الظهر
طبو الولد كعد يم ابوي وكل واحد بلش يسولف على شغله وآني رحت وكعدت بسد حامد، وصرت أتلواكله
ريتاج:: حامد... حبيبي .. اخوي.. حزام ظهري، روح جيبلي مشمش من البستان... صد عليه ورافع حاجبه
حامد:: صدك تحجين انتي
ريتاج:: اي والله صايمه ومشتهيته يلا حباب اروحلك فدوه مروى وخواتها وجناينهم هم
حامد:: صدگ تحچين إنتِ؟
ريتاج:: إي والله، صايمة ومشتهيته. يلا حباب، أتروحلك فدوة... مروى وخواتها وجناينهم هم.
دحك وهز راسه.
حامد:: ولج هاي شبيچ اليوم كل هالدلال علمود مشمش؟
ريتاج:: أي والله، وإذا جبتلي صنـدوگ كامل أدعيلك من هسه ليوم العيد.
حامد:: هئ لا بطلت ما اجيب ليش تكولين تروح فدوه مروى لو تموتين ما تذوگين المشمش
ريتاج:: اني اني كلت تروح فدوه ابدد كتلك اروحلك
فدوه يلا عيوني السود انت شعندي غيرك وحيدي
وحزام ظهري
وسام:: لا جلبه واحنه شنو ولج
ريتاج:: صديت عود اغمزلهم هز ايدها ما عاجبه
واني ظليت اتوسل ذلني ذل تالي بزع مني گام گال
حامد:: اذا لحكت اجيبلج عود اذا ما نسيت لان
حضرتج تعرفين البستان مو بس النه لا تنسين
ريتاج:: ميخالف من حصت ابوي صندوگ جيب
ضحك أبوي من على سوالفنه، وكال:
أبوي:: لا تدللوها چثير.. باچر تكلكم أريد البستان كله اذا من هسه تريد صندوگ من حصة ابوها
ريتاج:: ضحكوا الولد، وكل واحد كام: صلى ونام ماكعدو للعصر."
أما آني، فـ عيني على حامد.
كل شوي أگول: "لا ينسى المشمش... لا ينسى."
بس أول ما كعد، توضى وصلى العصر، وطلع بسرعة، وما لحكت حتى أذكره.
بقيت ألوب بالبيت، مرة أطلع للحوش، ومرة أرجع للمطبخ.
والبنات واگفات يسون فطور ويدحگن عليه ويضحكن.
رباب:: استغفر الله العظيم... خما تنسين علمشمش.شبيچ عمي لو كل الناس مثلچ، جان محد صام، بس يشتهون ويطلبون.
رحاب:: ههههه اي والله ولج دوختينا راح اضربها.
شدعوة تره مشمش، مو كنز.
ريتاج:: ولكم ما تفهموني مو سالفة مشمش...
هاي أول لمة الموسم، وطعمه برمضان غير.
رباب:: إي إي... سمعتيها رحاب
هسه إذا حامد رجع وإيده يفارغه هاي راح تعلن الحداد بالبيت
ريتاج:؛ طنگرت وطلعت ادحك من باب الحوش
ماكو احد سديته وبداخلي احجي على اخوتي
فزيت على دگت الباب رحت اركض وگبل گلت
-هلااااا حمووود هلا بالمشمش
غسان:: نعمم منو هذا حمود؟
ريتاج:: فزيت من شفته گبالي سديت الباب
بوجهه وكفت احاجي من وره الباب
-هلا شتريد
غسان:: احمم شكرا على سلوبج الراقي
عمي موجود
-ضجت منه شبي اسلوبي گبل زمخت بي
ريتاج:: هييي اسلوبي شگتلك عيني اخو مسره النازوكيين
-نازوكين؟
ريتاج:: شوف رمضان ما اريد اتعارك واطير حسناتي
اذا على ابوي فـ طلع راح لبيت جهاد تريد بعد شي
غسان:: لا سلامتج من رخصة النازوكيه
ريتاج:: غميته من وره الباب توه اريد ارد اتذكرت
ركضت وراه فتحت الباب وصحت عليه
-هيووو غسااان ياا ولدد
صد عليه وهذا جنه ولدنه گبل گلب الجهره وجيه
ركض عاط بوجهي...
غسان:: شلون تصيحين شنو ما تستحين بالله
احد مر منا وشافتج امشي دخلي جوه يلااا
ريتاج:: ماكو احد وما عليك بيه خوش حير باختك
ما ناقصه اخوه وتجي تتحكم ظلت عايزتني بس انت
-خزرني ودار وجهه يريد يمشي وتذكر ورجع بدون
ما يدحك عليه گال
غسان:: شتريدين صحتيني
ريتاج:: ضيگت عيوني وبداخلي كلت ميخالف
لخاطر المشمش كتله... اوكف هسه اجي
هز راسه واني طبيت للمخزن ادور سحبت
سله مالت تمر اصير من السعف اخذتها وطلعت
اركض وعيني على البيت همزين محد طلع وكفت
وره الباب بس مديت راسي ومديت السله اله
وهو يدحك على وجهي وعلى السله
غسان:: هاي شنو شسوي بيها
ريتاج:: رحمه لابوك ولامك بس جيبلي من هذا
المشمش بس كون تنگي المشمش الزين المستوي يلا حباب ابن حباب... ظل يدحك مصدوم هز ايده ودنگ يضحك رفع راسه گال
غسان:: يابه مالي حق بي اني ترديني ابوگلج عود
خلي اخوتج يجيبولج منه عذريني اني
ريتاج:: هو منو يجيبلي اهلي صار شكد اتوسل
ما يجيبون واني تره لو ما ابوي جان طلعت يلا
حباب والله مشتهيته والك الاجر والثواب
ضحك ومشى وخلاني واني سديت الباب بقوه
واغلط عليه شكد غثيث هنه مشمات الله اكبر
عزوهن عليه كعدت ادردم عشر دقايق واندك الباب
واني من يمي صحت...
-اهووو منووو
محد رد كمت وادردم عود صايمه ما اريد اغلط
فتحت الباب صار غسان بوجهي وهو وجهه
يضحك وابتسامته تخبل مد چفوفه كمزت بفرح
من شفت جايبلي مشمش گبل مديتله ايده
وهو حطهن بيدي بدون ما يطخني رفعت راسي
والضحكه شاكه حلگي وهو يضحك على ضحكتي
غسان:: عمي لو ادري هل مشمش هيج يفرحج
جان ما زعلتج هذا الي اكدر عليه عمي صايم وخليتيني ابوگ مشمش من البستان
ريتاج:؛ ضحكت وما جت ابالي غير هاي الدعوه گبل
گتله....
-الله يزوجك والله كون تاخذ مره تسعدك سعاده
ماصايره ولا دايره يااابوييي شلون مشمش
ضحك ضحكه من كل گلبه وعافني وراح واني
طبيت وادعيله ولا عبالك گبل شويه جنت اغلط عليه......
رقيه:: بالبداية چانت مجرد لعبة كل يوم نطب لودو، مرة نفوز ومرة نخسر، وأكثر حچينا چان باللعبة نفسها بس يوم طلب حسابي على الإنستا، والله ترددت بس گلت بيني وبين نفسي: "شدعوة، مجرد حساب وانطيته إياه ومن ذاك اليوم صار أكو تواصل بسيط بيناتنه مو سوالف هواي، ولا رسائل طول الليل مثل ما يسوون الناس.أغلب شي يرسل:
"تلعبين؟"
وأرد:
"إي، دقيقة وأطب."
وبس نلعب، يظل يحچي بالمايك وأنا مرات أرد كتابة، ومرات أنسى نفسي وأحچي وياه.
احساسي غريب من اختفى فترة حادث مرت اخوه
صرت كل ما يطول وما يطب، أفتح اللعبة وأطلع كل شويه وأول ما أشوف اسمه ظاهر "متصل"، أحس گلبي يدگ أسرع ما اعرف شنو مشاعري
مو حب حتى أگدر أگول حب بس تعلّق وهو دخل لحياتي شويه شويه بدون ما أحس صار جزء من يومي، من سوالفي، وحتى من انتظاري.وأكثر شي خوفني...إني صرت أبتسم من مجرد رسالة بسيطه منه، حتى لو جانت بس كاتب:
"يلا نلعب؟"
- الأيام مشت، وصار وجوده جزء من روتيني.
وإذا دخل اللعبة وما دز دعوة، أظل أطالع الشاشة وأگول
- يمكن ما انتبه إني موجودة.وإذا دز أبتسم بدون شعور الغريب إن سوالفنه بعدهن مثل ما هن.
لا هو تجاوز حدوده، ولا آني أغلب حچينه عن اللعبة، أو يضحك اذا اخطأ من اطلع حجر وهو ياكله
زياد:: لج شلون وياج كل مرة تگعين بالفخ واخسرج
كتبتله..
رقيه:: والله مو قصدي يمكن اللعبة تكرهني.هههههه
-ههههههههه
ضّحك، واني احس ضحكته تفزز گلبي
.و مرة خلصنه لعب، وما طلع مثل عادته.
بقى باللعبة ساكت گلت يمكن عنده شغلة.
ثواني ووصلتني رسالة بالإنستا.
زياد:: اليوم هادئة... شبيچ؟
وگاضبه الموبايل واعاين بالرسالة يمكن دقيقة كاملة أول مرة يسألني بعيد عن اللعبة.
كتبت ومسحت أكثر من مرة.وبالأخير دزيت
رقيه:: ما بيه شي. بس لان جنت صايمة ودايخة شوي... رد بسرعة.
زياد:: الله يتقبل... روحي ارتاحي، واللعبة نعوضها بوكت ثاني واني هم اروح اقره قران لا يسبقوني
ويختمون الولد گبلي
رقيه:: هههههه تمام جا روحي انت واني هم اروح انام گبل السحور
زياد:: تصبحين على خير
-انت من اهلو...
رقيه:: ابتسمت يمكن لأن أول مرة يهتم بتفصيلة صغيرة تخصني.غمضت الموبايل، وحطيته يمّي.
وضليت أفكر...شلون شخص قبل فترة ما أعرف عنه اي شي ما اعرف غير أصدقاءاخوتي وهسه
صار اليوم اللي يغيب بي، أحس يومي ناقص.
خفت من هالإحساس لأن التعلق بالبدايات، مرات يكون أخطر من الحب نفسه .....
نمت واني الإبتسامة شاكه حلگي وكلامه يدور براسي كعدتني زينب حتى نتسحر كعدت يمهم
جانن البنات مكملات السحور جاي نتسحر
وكرار وليث يداهرون بينهم وفز گلبي من جابو
طاري زياد...
كرار:: والله عجيب اريد الحك بيهم اختم وياهم
بس عمي هذول لا تلهيهم واظائف لا شغل لا عمل
ليث:: جهاد من قهر گلبه اعتزلنا كلنه
حيدر:: هههههههه خرب زياد يكول هذا تالي الحب
اخوي جان قوي من حب وتزوج صار مثل سيد ليث
-هههههههه
ليث:: خلي ياكل تبن هذا بس يصنف ما اكدرله يابه
كرار:: احبه احبه احبه
ليث: افتهمنا افتهمنا كافي ما اعيدها مثلكم
رقيه:: ظلينه نضحك ونسولف كملنه السحور
واني غسلت المواعين ونظفت المطبخ بين
ما أذن صلينه وكل واحد بينه رجع لفراشه
مدري شلون جيه بالي وفتحت الموبايل فز گلبي فزه من شفت رسالة من زياد كاتب..
زياد:: ست ممكن سؤال؟
-سريع رديت كتبت
رقيه::أكيد اسأل... وعذرًا، جنت بالمطبخ وما انتبهت للرسالة.
زياد::حصل خير يابه، ست روره راح أسألج سؤال، وأتمنى تجاوبيني بكل صراحة.
(ملاحظه علماً جان اسم حسابي روره)
رقيه::إي... اسأل.
زياد::سيد كرار شيصير منج؟
رقيه::أول ما قريت الرسالة، حسيت جسمي كله تكهرب گلت بيني وبين نفسي:
"ليش يسأل.. شنو عرف؟"
خفت.مو من السؤال...خفت من جوابه إذا عرف الحقيقة أصابعي ظلت فوق الكيبورد.
أكتب...وأمسح.أگول أعرفه لو أگول ما أعرفه؟
لو أسكت مرت دقايق، لا آني رديت... ولا هو دز شي وفجأة شفته طلع من المحادثة.
گلت يمكن ندم وسأل بالغلط.
بعد ربع ساعة تقريبًا، رجع إشعار منه.
فتحت الرسالة، وگعدت أقرها أكثر من مرة.
زياد::وصلني الجواب من يوم ذاك اليوم... يوم سمعت صوتج.ومن ذاك الوقت وآني أجذب على نفسي.أگول مستحيل...بس نفس الصوت، نفس البنية اللي شفتها بسيدنا الشيخ وكل مرة أقنع نفسي وأكول: لا، يمكن مجرد تشابه.لأن ما أريد أسمح لنفسي حتى أفكر بهالشي.إنتِ عرض صديقي وأخوي وتبقين تاج على الراس بأخلاقج وأدبج.
الله يستر عليج ويحفظج بس والله حزت بگلبي...
خلتيني أحاچيچ، وآني الإنسان اللي ما أرضى على نفسي شلون أحاچي أهل ربعي من وراهم.
اخذي راحتج...وإذا قررتِ تحظريني، فأني مقدّر موقفج بس أحب أوضحلج...كرار أخوي قبل لا يكون صديقي، وعمري ما أرضى أكسر هالثقة.
رقيه:: قريت رسالته، وظليت صافنة بيها.
ما توقعت يوم من الأيام أشوف هيچ كلام منه.
لا تجاوز حدوده، ولا حاول يبرر لنفسه.كل اللي همه... يوضح موقفه ويحافظ على صداقة كرار
ومن ذاك جانت اخر رساله واخر تواصل بينا.....
فاطمة:: يابه، أول ما دخلت شهري، تعبت تعب بس الله العالم بي.كل يوم أكول هذا أصعب يوم، ويطلع اللي وراه أصعب. وره العيد بأسبوع صارت عندي الولادة...والله شفت الموت بعيني.بهذيچ اللحظة عرفت ليش الجنة تحت أقدام الأمهات، وليش الأم تبقى أغلى إنسانة بالدنيا مو لأن الولادة وجع وبس...لا، لأن الأم بهذيچ الساعات تنطي من روحها حتى تجيب روح للدنيا ولمن حطوا ابني بحضني والله كل الوجع، وكل التعب، وكل الخوف راح بلحظة.نسيت كلشي ما بقى ببالي غير وجهه الصغير، وريحته وإيدي وهي تضمه.
بهذيچ اللحظة فهمت...ليش الأم إذا يمرض طفلها تمرض وياه، وإذا يضحك تضحك من كل گلبها.
-فاطمة:: فرحتي كملت من شفت أهلي كلهم جو، وفرات فرحان بيهم أكثر مني. كل واحد يطب من الباب، يركض يتلاگه ويگله:
فرات:: هلا هلا بخوال الجهال... هلا بيكم، نورتوا.
جهاد:: بالمهلي يلا خويا... كومي، أنريد نرجع بنتنه.
ريام:: لا لا، شترجع؟ ناخذ بس الفايدة.
علاوي وكرم شتكول جهاد؟
جهاد:: تفهمين والله، هاي هي شتگولين همه يطبّقون كلهم.
ريام:: إي طبعًا، خليهم همه يجون علينه يشوفونهم شكو ، شبيها؟ بيتنه بيتهم.
ضحكوا كلهم، وجهاد لف عينه عليها وهو يبتسم.
جهاد:: والله لو مو أعرف سوالفج، جان صدگتج.
فرات:: لا يمعود، هاي من تصير ام بعدما تلفينه.. هسه كل يوم عدها خطة حتى تلم العائلة.بس باجر عگبه تطردنه من الباب
فاطمة:: ضحكت عليهم، وعلاوي چان بحضني، وكرم كل شوي واحد يشيله ،البيت كله امتلى ضحك وسوالف، وأمي كل شوي تكوللهم:
أمي:: يابه كافي حچي... خلوا المره ترتاح شويه.
-بس منو يسمع كل واحد عنده سالفة، والثاني يضحك، والثالث يگاطع، ورجعت لمتنا مثل كل مرة... لمّة ترد الروح..
فاطمة:: بعد ولادتي تگويت شوي شوي، ومهى رجعت لبيتها.وفرحتنه كملت أكثر من حللت مهى وطلعت حامل.معاذ عباله أول مرة يصير أب، ما مخلي أحد بحاله.أما ريام، صارت يومية تروح يمهم، ما تخلي مهى تشتغل ولا ترفع شي ومتنه ضحك من وره ثلاث أيام گالوا رحاب هم حامل
فرحتنه بيها چانت غير شكل، لأن صارلها فتره طويله تنتظر هالخبر.ومعاذ كل ما يشوف حسين، يگله وهو يضحك:
معاذ:: تغارونه منه؟
وحسين مطنش الكل، وجدامنه يتغزل برحاب وكأنه ماكو أحد غيرهم.
چنت گاعدة بالحديقة، وعلاوي يلعب جدامي، وكرم بحضني، وفرات يعدل بالحديقة اللي زرعها كلها ورد، لأن يعرف شكد أحب الورد.ظلّيت أدحك عليهم وأحمد الله.بعد كل اللي مرينه بيه، حسيت أخيرًا رجعت الضحكة للبيت، ورجعت لمتنا وسوالفنه. نام كرم، كمت وحطيته بالكاروك، وطلعت اساعد فرات جان يزرع شتلات الطماطه جيت وكفت يمه، گلتله:
فاطمه:: يابه وخر خلي آني أزرعها رفع راسه وضحك.
فرات:: إنتي...وين تعرفين تزرعين
فاطمة:: ،مو كالتلي هاي حديقتي خليني اني ازرعها
ناوشني الشتلة، وكعد يدحك عليّ وآني أحاول أثبتها بالتراب أول ما خلصت، جاب السطل وصب عليها شوية مي.
فرات:: هسه صارت رسمية... هاي شتلتج، وكل ما
هسه اول ما تثمر انكوم نصدر منها طماطه للعرب
ضحكت وهو يقلد عليها دحكت عله كتله.
فاطمه:: لا تخاف... راح أهتم بيها وتشوف شلون
تصير طماطه هز راسه يضحك وعلاوي، وكطع علينا اللحظه وشال الكرك الصغيرة ويركض بالحوش وفرات يحجي عليه يخاف لا يگع ويعوره
.
فرات:: ولك تعال... هاي مو للعب لا تتعور
فاطمه:: ظل يركض وراه وهو يضحك، وعلاوي يلتفتله صوت ضحكته ملت البيت علينه
وگفت أدحك عليهم، وابتسمت من كل گلبي.
بهاللحظات البسيطة... حسيت إن السعادة ما تحتاج شي چبير، يكفينا بيت هادئ، وضحكة طفل، والناس الي تحبهم حواليك
