البارت الاول ..
الظابط بعصبيه : قتلتيه ليه ؟
ياسمين بعياط : مقتلتهوش صدقني .. هو اللي قتلني.
الظابط بإستهزاء : هو اللي قتلك ؟ على كدا انتي عفريته !
ياسمين زادت في العياط : محدش هيفهمني ، محدش عاش اللي انا عيشته.
الظابط بهدوء : احكي اللي حصل من الاول .
زادت ياسمين في العياط ومكنتش قادره تتكلم
الظابط خرج من الاوضة و كلم شخصين جايين مع ياسمين ..
الظابط : موقفها صعب في القضية لأنها هي اللي مبلغه عن نفسها وكمان مش راضيه تقول حاجه يمكن اقدر اساعدها ..
# : طب احنا نقدر نعمل اي ؟
الظابط : لازم محامي يمكن يقدر يقنعها وتتكلم .
# : حاضر ..
وبعدها دخل الظابط ومعاه عسكري و أمره أنه يرجع ياسمين على الحجز وعدت ليلة صعب عليها ، وعينها مغمضتش فيها وفضلت طول الليل تعيط و مش مصدقه اللي عملته..
وتاني يوم خدوها وروحوا على المكتب تاني لكن المره دي كان في شخص اول مره ياسمين تشوفه ..
_ : ازيك يا ياسمين ؟
ياسمين بإستغراب : انت مين ؟
_: انا استاذ هشام المحامي .. جيت عشان أدافع عنك و عاوزك تساعديني ..
ياسمين بدموع : اساعدك ازاي !
هشام : بإنك تحكيلي كل حاجه و إن شاء الله هلاقي لقضيتك حل .
ياسمين بهدوء : حاضر
وبدأت ياسمين تحكيله من الاول خالص ..
( أنا ياسمين الوكيل عندي 18 سنه اهلي كانوا من الطبقة الفقيره وكانوا قاسين عليا وبيضربوني و في يوم من الايام كان لسه عمر 13 سنه)
ايمان (أم ياسمين) بعصبيه : اصحي يا مقصوفة الرقبه ..
ياسمين بحزن : يا ماما حرام عليكوا انا مبلحقش انام .
إيمان بزعيق : نامت عليكي حيطه يا بعيده .. قومي يابت جهزي الفطار والشاي ل ابوكي و اخوكي .
ياسمين بدموع : انا مش خدامه ، اللي زيي لسه بيتعلموا ويروحوا المدرسه .
إيمان ضحكت بصوت عالي : مدرسة اي يا عنيا هو إحنا لاقيين ناكل ؟
ياسمين نزلت دموعها : قايمه يا ماما يكش انام ما اقومش تاني.
إيمان رفعت أيدها للسماء : يارب ياختي ..
خرجت من الاوضة بعيط وكان ابويا قاعد هو واخويا ..
شاهين (ابو ياسمين) : انتي صحيتي يا غلطه ؟
فضلت واقفه قدامه مبتكلمكش و دموعي بتنزل .. ومفوقتش غير لما ابويا حدفني بالكوباية في وشي ..
شاهين بزعيق : اي اتطرشتي مش سمعاني .
ياسمين بعياط : انا زهقت منكم وكرهتكم وكرهت نفسي ونفسي اموت حرام عليكم ..
محمود (اخو ياسمين ) : نفسك تموتي ؟ انا هموتك ..
وقام محمود و بدأ يضرب فيا و ابويا كان قاعد بيتفرج ويضحك ..
وبعد ما محمود زهق من الضرب سابني واقعه ف الأرض وانا جسمي كله بيوجعني ومناخيري و بوقي بينزفوا ..
شاهين بضحك بارده : طب مش كنت تدغدغها بعد ما تحضرلنا الاكل ؟ مين هيعملنا دلوقتي !
محمود ببرود : دلوقتي تقوم زي القرده و تحضر الاكل .
خرجت امي على ضحكهم ..
إيمان بجمود : دي على العلقه دي هتنام اسبوع في السرير..قومي يابت نامي جوه .
كنت بحاول اقوم ادخل الاوضه لكن مكنتش قادره و بعد دقايق قدرت استجمع اللي باقي من قوتي و اقوم ادخل اوضتي ، دخلت وانا مش عارفه اعيط من الوجع ولا من اللي بشوفه ، وفضلت اعيط لحد ما نمت .. وبعد ساعات باب الاوضه خبط .
ياسمين بتعب : مين ؟
& : انا أميرة ..
(دي بقا اميره جارتي وصحبتي من واحنا صغيرين ،" أميرة بيضة وشعرها بني و عيونها عسلي و كانت دايما مبتسمه " هي دخلت المدرسة لكن أنا لا فكانت بتيجي كل يوم تعلمني حاجه من اللي بتاخدها في المدرسة و بسببها انا بقيت اعرف اكتب و اقرأ .. اميره من عيلة مش غنيه اوي لكن حالهم احسن من حالنا كتير ، و دا السبب اللي بيوافقوا أنها تيجي عندنا بسببه ، أميرة مامتها متوفيه من سنين و ابويا كان عاوزني اتجوز ابوها وراح طلب من ابو اميره أنه يتجوزني عشان يلاقي حد يخدمه هو وبنته لكن الراجل كان محترم وموافقش وقاله اني زيي زي اميره بالظبط ) المهم ...
قومت جري فتحتلها الباب و اول ما شوفتها حضنتها وبدأت اعيط تاني ..
أميرة بحزن : مالك يا ياسمين ، هما ضربوكي تاني ؟
ياسمين بعياط : انا تعبت اوي يا اميرة ومبقيتش قادره استحملهم .. هو في أهل بيعملوا كدا في عيالهم ؟
اميره دخلتني و قعدتني على السرير وقفلت الباب..
أميرة بدموع : انا عارفه انك استحملتي كتير اوي ، صدقيني انا حاسه بيكي ..
ياسمين بعياط : طب قوليلي اعمل اي ! اموت نفسي؟
أميرة بجديه: لا طبعا حرام ، اوعي تعملي كدا ولا حتى تفكري مجرد تفكير .. عاوزه تموتي وربنا غضبان عليكي ، يبقا عذاب في الدنيا و الآخرة ؟
ياسمين بخفوت : لا بس انا تعبت ..
أميرة : اكيد في حل..
ياسمين : اي هو ؟
أميرة بتفكير : مش هقولك دلوقتي غير لما اظبط كل حاجه .. قومي بقا اغسلي وشك عشان الدم دا وتعالي ..
ياسمين بهدوء : حاضر .
وفي مكان تاني في البلد و تحديداً قصر العمدة .
(غانم بيه .. دا ابن العمدة الكبير عنده 35 سنه ، راجل معروف عنه التكبر و الظلم " هو طويل وعريض وشعره اسود لكن عنده كام شعراية لونهم ابيض " ولما كنا واحنا صغيرين نلعب جنب القصر كان بيطلع يجري ورانا و اللي كان بيمسكه كان بيربطه في النخله لحد ما أهله يروحوا ياخدوه و و قتها العقاب كان بيبقا للاهل .. محمود اخويا بيشتغل عنده ف الأراضي بتاعته .. لكن أبوه راجل طيب جدا عكس ابنه) ..
غانم بعصبية : محصول اي اللي باظ ؟ انت اتجننت ؟
علي (شغال عند غانم مع محمود) بخوف : يا بيه انا مش مسئول عن العنب ..
غانم بزعيق : اومال مين اللي مسؤول ياخويا ! انا ؟
علي بترد : محمود يا بيه ..محمود هو المسؤول .
غانم بعصبية : تغور من وشي دلوقتي وبعد شويه ترجعلي بمكان الكلب دا .
علي بخوف : حاضر يا بيه حاضر ..
أما أنا فكنت غسلت وشي و دخلت الاوضة و بدأت أميرة تشرحلي براحه وانا فهمت وبسرعه وكمان بدأت اسمعلها ..
أميرة بإبتسامة : انتي ذكيه اوي يا ياسمين خسارة انك مش بتتعلمي ..
ياسمين بتنهيده : هعمل اي يعني يا أميرة ، كله غصب عني ..
أميرة بتطبطب على كتف ياسمين : مصيرها في يوم تتحل ..
ياسمين بحزن : اتمنى..
أميرة : إن شاء الله خير يا حبيبتي .. انا لازم اروح دلوقتي عشان متأخرش .
ياسمين بزعل : انا مبحبكيش تمشي ، انتي اللي مهونه عليا .
أميرة بحزن : هجيلك بكرا تاني متقلقيش .
طلعت أنا و أميرة و جيت افتح الباب لكن كانت الصدمة من اللي شوفته قدامي ..
يتبع ....
علا عبد العظيم ♥️✍🏻
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
